Read Lelemi Litemi Batɛne 13 Bible Online

Litemi Batɛne 13 - Lelemi bible

Litemi Batɛne 13

¹Amu na Israelƒuɔ básɔ bábla likpidi na Unwoti anumi. Ɔmɛni ɔsu Unwoti ɔ́nyonu-ma ɔkya Ƒilistiƒuɔ enu kemmo akwa aavlene sɔɔn.

²Na okloƒu ɔdi ɔ́kya na ɔ́si Sora na ɔ́si Dan kɔdua kemmo na baalɔ-nwu banii Manoa, na ulekudi ɔdi udinkɔ.

³Mmɔ na Unwoti ɔtu ɔdi údie lɛlɔ ɔ́tina-nwu na ɔ́su-nwu ɔnini, “Udinkɔ na adi na átawɔ kudii, nsu adubo kaƒɔ bɔda na awɔ ubi ɔnanabi.

⁴Ɔƒɛni mɔɔsu-ɔ ka tani ntɛ kpakplaa iye ntɛ biala, na anu lɛnɔ ka atadi adila ani muusé lɛlɔ.

⁵Ɔsika adubo kaƒɔ bɔda na adubɔwɔ ubi ɔnanabi. Na si áwɔ-nwu taya na bekpeyi-nwu lili kudii. Ɔsika ubiwɔ ɔmmɔ ɔdubo buse bute Unwoti lɛti. Na anwu ndubuse kalɔ uteekpo taaƒɔ Israelƒuɔ ɔlɛku Ƒilistiƒuɔ enu kemmo.”

⁶Amu uleku ɔmɛni únwini úsie ɔgyani kudɔ na ɔ́su-nwu ɔnini, “Katɔti ukyuli ɔdi úbo-mi kudɔ. Na ukyuli ɔmɛni ɔ́lɛ Katɔti ɔtu ɔdi. Na ka ɔɔda liƒu ɔsu ni, ńtakana na liye-nwu nwuna lɛnyi ku kesii kani ɔ́si.

⁷Nsu bɔsu kani na ɔ́su-mi ɔnii ndubo kaƒɔ bɔda na lɛwɔ ɔnanabi. Ɔƒɛni ntani ntɛ kpakplaa iye ntɛ biala. Na ntadi adila ani muusé lɛlɔ lɛnɔ. Ɔsika ubi ɔmmɔ ɔdubunwini Unwoti ukyuli ɔƒunadi ɔ́si nwuna bɔwɔ uwi úti útédu nwuna kukpi uwi.”

⁸Mmɔ na Manoa ɔkpali Katɔ úvele Unwoti ɔnini, “O Unwoti, ya na ƒula ɔtu ɔni na átala mmɔ ɔsɔ ubo na ubatina-bu ulu ɔni lɛlɔ bɔdubɔsia na bɔnyuɛ ubi ɔmmɔ si báwɔ-nwu.”

⁹Na sɔsɔ ni, Katɔti únu Manoa bɔkpali na Katɔti ɔtu ɔmmɔ ɔ́sɔ úbo ulekudi kudɔ uwi ɔni na ɔkya kemo. Nsu uwi ɔmmɔ na ɔgyani Manoa uuubo mmɔ.

¹⁰Mmɔ na uleku ɔmɛni ɔ́babla na úkeli útásu ɔgyani ka, “Katɔti ɔtu ɔni nédie lɛlɔ ɔ́tina-mi dii mmɔ ɔ́sɔ úbo.”

¹¹Na Manoa ɔ́ta na ɔ́siaku ulekudi kama. Na uwi ɔni báni béde ɔtu ɔmmɔ ni, Manoa úye-nwu ɔnini, “Awɔ ndi ɔtu ɔni nátɛmi-ku mina ulekudi?” Na ɔtu ɔmmɔ údie kenye ɔnii, “Ɛɛn, ami mmɔ.”

¹²Amu na Manoa úye ɔtu ɔmmɔ ɔnini, “Si úbo úte lɛni ni, bi na ubi ɔmmɔ ɔdubo bɔbla? Na bi ngba udu ɔdubo bulie?”

¹³Na ɔtu ɔmmɔ údie kenye ɔnini, “Ƒ'ulekudi ɔdi ka ɔbla ɔsia lɛla biala na lɛ́su-nwu lɛlɔ.

¹⁴Na anya ndi ka útalɛka ɔdi lɛla biala na bébulo iye ɔni ntɛ kpakplaa iye ntɛ bɔdi biala iye ɔdi adila ani muusé lɛlɔ biala. Na ɔlɛka ɔdi ɔda ɔni ƒui líbo-nwu lɛlɔ.”

¹⁵Amu na Manoa ɔ́su Unwoti ɔtu ɔmmɔ ɔnini, “Tatɔlɔ útédu ka bɔ́du ese ɔkɔdi na búti bɔ́nwa adila adi bute-ɔ.”

¹⁶Amu na Unwoti ɔtu ɔmmɔ údie kenye ɔnini, “Ina ka bɛ́ƒɔ-mi bɛ́kya mɛni ni, lɛɛɛdubo bina adila adi bɔdi. Nsu si bɔkyula akpala bɛdubɔbla amu ni, na biti akpala ammɔ bite Unwoti.” Na Manoa útati ɔnii Unwoti Ɔtu na ɔdi.

¹⁷Mmɔ na Manoa úye ɔtu ɔmmɔ ɔnini, “Su-bu ƒula lɛnyi kalɛ na si ƒula litemi líbo líte lɛni ni, bɔdubɔkɔliku-ɔ lɛnyi katɔ.”

¹⁸Na ɔtu ɔmmɔ údie kenye ɔnini, “Bi ɔsu na aawia mina lɛnyi ati? Ɔmmɔ uuubo kalɔ bunu.”

¹⁹Mmɔ na Manoa úti ese ɔkɔdi ku ɔlaaƒɔ, na úti ɔ́bla akpala na lɛtakpɛ lɛdi lɛlɔ úte Unwoti. Na Unwoti ɔ́bla akɔla budie taatina bɔdi na Manoa ku ulekudi anumi.

²⁰Uwi ɔni na baakyula akpala ammɔ na aada taakɔ katɔ ni, Unwoti ɔtu ɔmmɔ ɔ́sia ogya ɔmmɔ kemmo úsie katɔ. Ka Manoa ku ulekudi bánu lɛla lɛni nálɛ mmɔ ni, báyu bátɛ na béti bana anumi bébi kalɔ.

²¹Na ka Unwoti ɔtu ɔmmɔ ɔ́sɔ útedie lɛlɔ útatina Manoa ku ulekudi ni, mmɔ na bánu báti ka Unwoti ɔtu na ɔdi.

²²Amu na Manoa ɔ́su ulekudi ɔnii, “Bɔdubo bukpi, ɔsika búti bula anumi bɔ́nu Katɔti.”

²³Nsu ulekudi udie kenye ɔnini, “Si banii Unwoti bɔbla na ɔbla kasusu ka wadu-bu ni, nka útaƒɔ bula akpala ani bɔ́bla búte-nwu. Iye nka útasu-bu ala ani na ɔ́su-bu mɛni na udie lɛla lɛdi ɔtina-bu.”

²⁴Amu na uleku ɔmɛni úbawɔ ubi ɔnanabi na ɔ́sia-nwu lɛnyi ɔnii Simson. Na ɔnanabi ɔmɛni ɔ́lɛ lili na Unwoti úte-nwu kusɛ kusɛ.

²⁵Na Unwoti Kɔyu kúse kalɔ kɔɔƒɔ́-nwu lɛlɔ kemmo uwi ɔni na ɔkya Dan kalɛkɛ, na Sora ku Estaol ntɛ.