Read Lelemi Litemi Batɛne 19 Bible Online

Litemi Batɛne 19 - Lelemi bible

Litemi Batɛne 19

¹Uwi ɔmmɔ kemmo ni, Israelƒuɔ beeebo ɔga ɔdi. Na Lewini ɔdi nlie ɔgyu kalɔ kadi na Eƒraim abi lɛlɔ. Na úti ulekubi ɔdi ɔni na ɔ́si Yuda kalɔ lɛlɔ na Betlehem ɔ́bla nwuna ɔsɔnɔ.

²Nsu uleku ɔmɛni úbeti kɔnyi ɔ́kya ɔgyani ɔmɛni. Anwuɔsu ɔ́tɔlɔ-nwu kudɔ na úsie ɔkya ɔti kudɔ na Betlehem. Na ɔ́kya mmɔ abuli atɛ.

³Amu na Lewini ɔmmɔ ɔ́sia-nwu kama ka utásia-nwu kɔnu na ɔsɔ unwini ubo-nwu kudɔ. Na ɔdanku nwuna kabla ɔblane ku bebuo ala betine inyɔ. Na ka údu mmɔ ni, uleku ɔmmɔ úti-nwu utéduoku ɔti kaduli. Ka ɔti ɔ́nu-nwu ni, ɔ́ƒɔ-nwu ku ebiti.

⁴Na ulekubi ɔmɛni ɔti ɔ́su-nwu kpakplaa ka ɔkya-nwu kudɔ blii. Ɔmɛni ɔsu ɔ́kya-nwu kudɔ emeyi atɛ. Na baadi na baaní na ɔɔtɛ kaduli mmɔ.

⁵Na limeyi linedi ɔtanta tutuutu ni, báta na banii bésela. Nsu uleku ɔmɛni ɔti ɔ́su Lewini ɔnini, “Ya na bɔwia lɛla lɛdi na adi na akɛ kubiti. Na ɔmmɔ kama akana na atɔlɔ.”

⁶Anwuɔsu bana inyɔ bélie kalɔ na bádi na báni básala. Mmɔ na uleku ɔmɛni ɔti ɔ́su Lewini ɔmmɔ ɔnini, “Buvele nda-a, ka atɛ usien ɔmɛni na akɛ kubiti.”

⁷Nsu Lewini ɔmɛni ɔ́ta ka úsela, nsu ulekubi ɔmɛni ɔti únye-nwu lɛlɔ ka utatɔlɔ. Ɔmɛni ɔ́su ɔ́sɔ ɔ́kya usien ɔmmɔ.

⁸Na limeyi lɛlɔndi ɔtanta tutuutu ɔ́ta ka úsela na ulekubi ɔmɛni ɔti ɔ́su-nwu ɔnini, “Buvele nda-a, wia lɛla lɛdi na adi asa. Na si kadi káta blii akana na atɔlɔ.” Anwuɔsu nkyuli inyɔ bamɛni bádi básala.

⁹Uwi ɔni na Lewini ɔmmɔ ku nwuna ɔsɔnɔ ku nwuna kabla bablane bábla kasusu ka bagyu ni, Lewini ɔsɔnɔ ɔti ɔ́sɔ ɔ́su-nwu ɔnini, “Nu, useyi úudu ɔ́wɔlɔ na uwi uletu asa na kadi kasa. Anwuɔsu tɛ na akɛ kubiti kɔkladi. Na kɔnaadi ata ɔtanta tutuutu na atɔlɔ.”

¹⁰Nsu ɔnana ɔmɛni úni ɔnii ɔsɔ ulatɛ. Ɔmɛni ɔsu anwu ku ulekudi ku kabla bablane ku nwuna bebuo ala betine inyɔ báta na béti anumi bátina Yebus ɔni baalɔ banii Yerusalem.

¹¹Na uwi ɔni na badaku Yebus bɔni bude ni, kadi kása. Na kabla bablane ɔmmɔ ɔ́su nwuna unwoti ɔnini, “Bibo na busie butátɛ Yebusiƒuɔ bamɛni kudɔ usien ɔmɛni.”

¹²Mmɔ na nwuna unwoti ɔ́su-nwu ɔnini, “Oowo! Bulésie bulatátɛ bekyuli bamɛni kudɔ, ɔsika baaadi Israelƒuɔ. Mmomu bɔdubusie Gibeaƒuɔ kudɔ.”

¹³Na úsie anumi ɔ́sɔ ɔ́su-ma ɔnini, “Bɛya na bɔtalaku lɛgba na butéduo Gibea iye Rama na busie butátɛ lɛma lɛmɛni kemmo unwi.”

¹⁴Anwuɔsu bésie na bétéduo Gibea na Benyamin ɔmii lɛlɔ. Na uwi ɔmmɔ kemmo ni, na ɔƒɛ úuduo lɛyu.

¹⁵Ɔmɛni ɔsu bésie bétélie ɔma ɔmmɔ ɔblɔnu ɔdi lɛlɔ. Nsu ukyuli ɔdi útakpete-ma na ɔwia-ma katɛnkɔ.

¹⁶Usien ɔmmɔ ni, unengu ɔdi ɔ́si nwuna kemo. Ɔdi Eƒraimni ɔni nási abi lɛlɔ ɔma, nsu ɔƒɛni úbo úlie Gibea kesii kani na Benyamin kɔdua bekyuli belie.

¹⁷Uwi ɔni na unengu ɔmɛni ɔ́nu belusiene bamɛni ka belie ɔblɔnu lɛlɔ ni, ɔ́kpɛ úde-nwu na úye-nwu ɔnini, “Wɛ na bɛ́si na wɛ lɛnɔ bísela?”

¹⁸Amu na Lewini ɔmɛni údie kenye ɔnini, “Bɔ́si Betlehem na Yudaƒuɔ kalɔ lɛlɔ, na bɔ́vi búsela Eƒraim abi ɔma ɔni nágyu, kesii kani ukyuli na ndi. Mmɔ na mɔɔbla kabla na Unwoti kakpakɔ. Na nlie mɛni, ɔsika ńtakɛ ukyuli ɔdi kaduli na liduo lɛtɛ.

¹⁹Nsu bubo adila ku kakpa na bute bula bebuo ala betine bamɛni, na bɔda bodobodo ku ntɛ bɔni na ami ku ulekubi ɔmɛni ku mina kabla ɔblane bɔdi na bɔni. Na nka bɔsɔ buláwia lɛla lɛdi.”

²⁰Na unengu ɔmɛni ɔ́su-nwu ɔnini, “Bibeduo-mi kaduli na ndubɔnu-mii lɛlɔ, ɔsika útamanku ka bɛsɔ bɛtɛ ɔblɔnu lɛlɔ mɛni bigye kadi.”

²¹Anwuɔsu útiku-ma úsienku kaduli na úte nwuna bebuo adila na bádi. Ɔmmɔ kama ka báwia ntu bɔdi báƒɔ lɛgba ni, bádi na báni básala.

²²Uwi ɔni bakya baaní taakɛ ebiti ni, bekyuli bekpidi bani nkya ɔma ɔmmɔ kemmo bábaka bámana unengu ɔmmɔ kaduli. Na bakya beebó kaduli kammɔ kayakun, na baakpali unengu ɔni mbo kaduli kammɔ ka udie ɔnana ɔni néduo-ma kaduli mmɔ ɔlɛku na ama ku-nwu batɛ.

²³Kaduli ɔlati ɔmmɔ ɔ́lɛ keyi na útásu-ma ɔnini, “Oowo! Mina bakpana, bitaya na bɔbla likyulikpi lɛmɛni udu. Ɔsika ukyuli ɔmɛni ɔdi ɔƒɔ ɔni néduo-mi. Ɔmɛni ɔsu bitaya bɔkya lɛlɔ kɔƒa.”

²⁴Mmɔ na ɔ́su-ma ɔnini, “Bɛɛnu mina adagyaa ulekubi ku nwuna ɔsɔnɔ. Ndubo-ma budie búboku na bibo kuƒi ka bɛbla-ma lɛla biala na bɛɛyɔ́. Nsu ɔƒɔ ɔmɛni amu ni, bitakya lɛlɔ kɔƒa kɔmɛni udu.”

²⁵Nsu banana bamɛni banii belénu kalɔ kudii. Ɔmɛni ɔsu Lewini ɔmmɔ úsie na útetiku nwuna ɔsɔnɔ ɔlɛku keyi. Na úti-nwu úte-ma, na bánya-nwu bámana na ama ku-nwu bátɛ ulikplu usien umodi ɔmmɔ ƒui. Na uwi ɔni kadi késela bugye ni, bédie-nwu ulu.

²⁶Lɛdigye lɛmmɔ uleku ɔmɛni únwini úsie bana keduokɔ kammɔ, na útébuli ɔ́tɛ-nwu kayaku. Na ɔ́tɛ mmɔ útédu ka kadi kégye.

²⁷Uwi ɔni na Lewini ɔta na ɔ́lɛmi ɔtɔ ka uteesie nwuna ulu ni, ɔ́nu ka nwuna ɔsɔnɔ úbuli ɔtɛ kayakun na nwuna kɔnu kɔda kayakun ugyii.

²⁸Amu na ɔ́lɔ-nwu ɔnini, “Ta na beteesie.” Nsu útedie kenye. Anwuɔsu ɔ́gyu uleku ɔmmɔ ɔ́sia nwuna ebuo ala utine kama na úti-nwu ɔ́tɔlɔku úsienku ɔma.

²⁹Na ka úduo kaduli ni, úti kewii na úle ɔsɔnɔ ɔmmɔ eku eku leevu-inyɔ. Na úti lɛna lɛmmɔ umene Israel kaba leevu-inyɔ.

³⁰Na ukyuli biala manu lɛna lɛmɛni ɔ́su ɔnini, “Litemi lɛmɛni udu lítalɛ kudii ɔ́si uwi ɔni na Israelƒuɔ bálɛ Egyipte kalɔ lɛlɔ. Ɔlɛka bɔbla lɛla lɛdi bɔsiku litemi lɛmɛni lɛlɔ! Anwuɔsu bɛya na buti-ni kasusu! Na bɔnu kalɛ bɔbla-ni!”