Read Lelemi Litemi Batɛne 20 Bible Online

Litemi Batɛne 20 - Lelemi bible

Litemi Batɛne 20

¹Amu na Israelƒuɔ kaba ƒui bekyuli ɔ́si Dan kɔdua lɛlɔ utédu Beer-Seba ku Gilead kalɔ bekyuli bábasa lisu na Unwoti anumi na Mispa.

²Na Israelƒuɔ batɔnkune lɛnɔ bása belie Unwoti bekyuli akɔ mmɔ ɔdi. Na bani náklibi lɛlɔ béte kekpo mmɔ babla nkyuli mpim eti leevu-maane.

³Uwi ɔmmɔ kemmo Benyamin kɔdua bekyuli bénu ka Israelƒuɔ bása na bakya Mispa. Amu na Israelƒuɔ béye Lewini ɔmmɔ banini, “Su-bu kalɛ ala ani muusé lɛlɔ mmɔ álɛ.”

⁴Amu na Lewini, ɔni ndi uleku ɔni bádu mmɔ ɔgyani, údie kenye ɔnini, “Ami ku mina ɔsɔnɔ bútéduo Gibea ɔni nkya Benyamin kɔdua kalɔ lɛlɔ ka butátɛ mmɔ.

⁵Usien ɔmmɔ ni, banana bani nási Gibea bébo bábaka bámana kaduli kani kemmo ntɛ mmɔ, na baakpali ka baawia-mi. Na bana kasusu ndi ka badu-mi. Na béƒie mina ɔsɔnɔ na bénye-nwu lɛlɔ na bátɛnku-nwu bádu.

⁶Na líti mina ɔsɔnɔ ukpine ɔmɛni na líle-nwu eku eku leevu-inyɔ na líti límene Israel kaba leevu-inyɔ bammɔ. Ɔsika bábla likyulikpi ku kɔƒa ala na Israel.

⁷Ɔmɛni ɔsu muuye-mii lɛla lɛni ndi bina kasusu.”

⁸Na bana ƒui báta na bédie kenye kenwi aani ukyuli unwi pɛ muutemi, na básu banini, “Ukyuli biala útesela kaduli, ina ukyuli unwi utenwini utesie nwuna kaduli!

⁹Ɔƒɛni lɛla lɛni na ɔlɛka bɔbla Gibeaƒuɔ bamɛni ndi ka bɔdubo akunkpa bɔtu na budie bekyuli badi na betékpoku Gibeaƒuɔ.

¹⁰Na bɔdubudie nkyuli leevu bɔlɛku eti anyɔ biala kemmo, na beteete bakladi adila. Na bula bakladi bɔdubusie butáni Gibeaƒuɔ bammɔ kɔtu na likyulikpi ala ani na bábla ɔsu.”

¹¹Anwuɔsu Israelƒuɔ banana ƒui básala lisu aani ukyuli unwi kalɛ ka betékpoku ɔma ɔmmɔ bekyuli.

¹²Na Israelƒuɔ bátala bekyuli bákya Benyamin lɛma ƒui ka betéye-ma banini, “Bi likyulikpi bɛ́bla mɛni?

¹³Anwuɔsu bidie bekyuli bani nábla likpidi lɛmmɔ biboku na bɔdu-ma, na likyulikpi lɛmɛni udu lɛlɛ Israel kalɔ lɛlɔ.” Nsu Benyamin kɔdua bekyuli bamɛni bátakpete litemi lɛni básu-ma mmɔ.

¹⁴Na Benyamin lɛma linengudi ƒui bekyuli bábasala lɛlɔ ka betékpoku Israelƒuɔ.

¹⁵Bekpone mpim aavlanyɔ-ɛku bási lɛma kemmo. Na básɔ básala nkyuli eti leevu-ene básiku Gibea.

¹⁶Na bekpone bammɔ ƒui akɔ ni, nkyuli eti leevu-ene bakya na badi kɔmii bekyuli bani na si ɔdi biala úƒwimi lɛtabi ɔ́lɛ lɛla lɛdi ni, uláyii ulu.

¹⁷Na Benyamin kɔdua bekyuli kama ni, Israelƒuɔ kaba bekyuli ƒui básala bekpone mpim eti maane ɔni na bana ƒui badi bekpone kpakplaa.

¹⁸Na Israelƒuɔ bésie Betel na bétéye básiku Unwoti kudɔ banii, “Kaba bekyuli bamani nka busie butákpoku Benyamin kɔdua bekyuli?” Amu na Unwoti údie kenye ɔnini, “Yuda kɔdua bekyuli baka busie.”

¹⁹Lɛdigye ni, Israelƒuɔ bátásala lɛlɔ na Gibea kudɔ.

²⁰Na báta banii betékpoku Benyamin kɔdua bekyuli. Anwuɔsu báya na bana bekpone bátu akpagya na béti anumi bátina Gibea ɔma ɔmmɔ.

²¹Na Benyamin bekyuli bálɛ bási Gibea na bétékpoku Israelƒuɔ. Na limeyi lɛmmɔ bádu Israelƒuɔ bekpone mpim aavlanyɔ-inyɔ.

²²Nsu Israelƒuɔ bekpone bákya lɛlɔ ogya na básɔ bénwini batásala lɛlɔ na kesii kani báka busie kudeedi.

²³Na Israelƒuɔ bésie Unwoti anumi na bétéwulo bakya-nwu laa útédu useyi uwi. Na béye Unwoti banii, “Bɔsɔ busie na butékpoku bula banwani Benyamin kɔdua?” Amu na Unwoti údie kenye ɔnini, “Ɛɛn, biteesie bitékpoku-ma.”

²⁴Na limeyi linyɔdi lɛlɔ ni, Israelƒuɔ bákpɛ béde Benyaminƒuɔ.

²⁵Mmɔ ka Benyaminƒuɔ bálɛ bási Gibea bébekpoku Israelƒuɔ ni, básɔ bádu Israelƒuɔ nkyuli mpim leevu-maane bani ƒui nátu akpagya.

²⁶Mmɔ na Israelƒuɔ ƒui bésie Betel na bátáyu bélie Unwoti anumi na beewulo. Na limeyi lɛmmɔ bátadi lɛla biala útédu useyi uwi. Na bábla bɔkyula ku unwi bɔbla akpala béte Unwoti.

²⁷Na Israelƒuɔ básɔ béye Unwoti si basɔ betékpo. Na uwi ɔmmɔ kemmo ni, Unwoti Bunyimi Adaka úse Betel mmɔ.

²⁸Na Aaron uwɔ Pinehas ɔni ndi Eleasar ubidi ndi ɔkpane. Na béye-nwu banii, “Bɔsɔ busie butékpoku bula banwa Benyaminƒuɔ, munuu butesie?” Amu na Unwoti údie kenye ɔnini, “Biteesie kɔnaadi na ndubo-ma buti bɔkya bina enu kemmo.”

²⁹Mmɔ na Israelƒuɔ bátábɛ bakya alakpi adi akɔ na Gibea amadɔ.

³⁰Na limeyi lɛtɛdi lɛlɔ ni, bésie bétékpoku Gibeaƒuɔ aani kalɛ na bábla dii.

³¹Na Benyaminƒuɔ báta bálɛ babasiaku Israelƒuɔ na bábɔku-ma bálɛku ɔma ɔmmɔ kemmo. Na bésie kalɔ baabla Israelƒuɔ kalala aani kalɛ na bábla dii. Na ɔkɛnku ɔmɛni ɔsu nkyuli avlaatɛ békpi na ulu ɔni ntɛ úse Betel ku Gilead ɔƒɛnyi kakɛ.

³²Uwi ɔni na Benyaminƒuɔ bákya baasu banini, “Búse kalɔ bɔɔdi Israelƒuɔ lɛlɔ aani kudeedi kalɛ” ni, na Israelƒuɔ lɛnɔ bakya baasu lɛlɔ banii, “Bɛya na bunwini busie kama na basiaku-bu busie ulu lɛlɔ kalɛ na balɛ ɔma ɔmmɔ kemmo.”

³³Anwuɔsu ka Israelƒuɔ bekpone geen bénweni bésie kama na básɔ básala lɛlɔ na Baal-Tamar ni, kɔnakunwi bakladi békeli bálɛ kesii kani bábɛ bakya alakpi ani náka ámana ɔma ɔmmɔ akɔ.

³⁴Na Israelƒuɔ bekpone bakpakpladi bamɛni mpim leevu bétéduo Gibea. Na ɔ́si kalɛ kekpo kammɔ kenye kebo ɔkplu ɔsu ni, Benyaminƒuɔ bátanu bátati tɔ ka badaku ɔgbankpi kemmo buduo.

³⁵Nsu limeyi lɛmmɔ ni, Unwoti ɔ́di Benyaminƒuɔ lɛlɔ. Na Israelƒuɔ bádu Benyaminƒuɔ akpagya batune nkyuli mpim aavlanyɔ-ɛlɔ ku eti anyɔ (25,100).

³⁶Mmɔ na Benyaminƒuɔ bánu báti ka Israelƒuɔ bádi-ma lɛlɔ. Na sɔsɔ ni, uwi ɔni na Israelƒuɔ bekpone bénwini bésie kama kalɛ na Benyaminƒuɔ bekpone basiaku-ma ni, Israelƒuɔ anu asia bana bekpone bani nábɛ bakya alakpi ani náka ámana Gibea akɔ lɛlɔ.

³⁷Na bani nálɛ alakpi ammɔ akɔ ni, békeli bétéduo Gibea na bádu ukyuli biala na ɔkya ɔma ɔmmɔ kemmo.

³⁸Asa na ala amɛni adubɔlɛ ni, Israelƒuɔ bekpone geen ku bani nábɛ ɔma ɔmmɔ amadɔ ni, bábla kakwɛ kadi. Na aka ndi ka si bánu uyɔ bonwu ɔdi ka ɔɔkɔ́ katɔ na ɔma ɔmmɔ eli ni,

³⁹na Israelƒuɔ bani nnye kekpo kemmo batu benwini. Nsu ka Benyaminƒuɔ básu banii, “Ɔƒɛni bɔ́du Israelƒuɔ bekpone avlaatɛ. Na bɔdaku-ma lɛlɔ bɔdi aani kudeedi” ni,

⁴⁰bénwini bánu ka uyɔ bonwu ɔdi úse kalɔ ɔɔkɔ́ katɔ na ɔma ɔmmɔ kemmo.

⁴¹Mmɔ na Israelƒuɔ bénwini na Benyaminƒuɔ béƒu na báti ka Israelƒuɔ baayɔ́ bayila-ma udu.

⁴²Na bábla kasusu ka bekeli na balɛ-ma enu kemmo. Anwuɔsu béti anumi bátina ɔma bamba ulu. Nsu bátakana bukeli bɔlɛ-ma enu kemmo. Na Israelƒuɔ bekpone geen ku bekpone bani nási baalɛ́ ɔma ɔmmɔ kemmo báda Benyaminƒuɔ bákya na báyila-ma udu.

⁴³Na Israelƒuɔ béyu-ma bátu na bétebile uwi ɔdi, mmomu bábi básiaku-ma bétédu Gibea ɔƒɛ katukɔ, na bakɛ baadú-ma ka béti bésela.

⁴⁴Na bádu Benyaminƒuɔ bekpone bani ngyi bukpo geen mpim leevu-maane (18,000).

⁴⁵Na bekyuli bani nékeli básia ulu ɔni ntɛ úsie Rimon atakpɛ kemmo ni, bádu nkyuli mpim ɛlɔ. Na Israelƒuɔ bábi básiaku bakladi bétédu Gidom, na bádu mpim inyɔ.

⁴⁶Na Benyaminƒuɔ bekpone bani ƒui bádu limeyi lɛmmɔ badi bekpone mpim aavlanyɔ-ɛlɔ. Na badi bekpone bani mbo kayi geen.

⁴⁷Nsu nkyuli eti leevu-anyɔ bákana bukeli butábɛ Rimon atakpɛ kemmo. Na bábɛ bákya mmɔ abuli ene sɔɔn.

⁴⁸Na Israelƒuɔ bénwini bétékpoku Benyaminƒuɔ bakladi na bádu bana banana ku beleku ku bana bebi ku bana bebuo ƒui kede kede. Na bátu ogya bákya lɛma lɛni nkya amadɔ mmɔ ƒui.