Read Lelemi Litemi Batɛne 21 Bible Online

Litemi Batɛne 21 - Lelemi bible

Litemi Batɛne 21

¹Uwi ɔni na Israelƒuɔ banana básala belie Mispa ni, bése kenye ka ɔdi biala uleti nwuna ubi ulekubi ulete Benyamin kɔdua ukyuli ɔdi na weti.

²Na bekyuli bani nésie Betel ni, bétélie Katɔti anumi na beewulo momoomo ɔ́si ɔtanta útédu useyi uwi taasu banini,

³“O Unwoti, Israel Katɔti, bi ɔsu na ala amɛni udu álɛku Israelƒuɔ lɛni? Bi ɔsu na bula kɔdua kunwi kɔyii ɔmwi kadi?”

⁴Lɛdigye tutuutu ni, bekyuli bammɔ bátu lɛkpabi na bábla bɔkyula ku unwi bɔbla akpala.

⁵Amu ba béye lɛlɔ banini, “Ɔma bene nébu na bula kaba bekyuli akɔ na beeebo Unwoti anumi na mɛni?” Ɔsika bése kenye banii kɔdua kɔni néni ka ubo Unwoti anumi na Mispa ni, ɔlɛka bayila kɔdua kammɔ ƒui udu.

⁶Na mmɔ lɛnɔ na Israelƒuɔ béwulo Benyamin kɔdua lili. Ɔsika básu banii, “Ɔmwi limeyi lɛmɛni kɔdua kunwi kɔ́yii na Israel adua kemmo.”

⁷Na béye lɛlɔ banini, “Dɛ na bɔdubɔbla na bɔkɛ beleku bute banana bani nébu, ɔsika búse kenye na Unwoti anumi ka bɔɔɔdubo bula belekubi buti bute-ma na beti kudii?”

⁸Anwuɔsu béye lɛlɔ banini, “Ɔma bene nébu na bula kaba bekyuli akɔ na beeebo Unwoti anumi na Mispa mɛni?” Mmɔ na bánu báti ka ukyuli ɔdi útasi Yabes-Gilead útebo kasala kammɔ.

⁹Na ka báka bana bumomo ni, báti ka Yabes-Gileadni ɔdi uuubo mmɔ.

¹⁰Ɔmɛni ɔsu Israelƒuɔ bátala bekpone mpim leevu-inyɔ ka beteesie Yabes-Gilead na betékpoku-ma. Na si bésie ni, na badu ukyuli biala ku beleku ku banamu.

¹¹Na básu-ma banini, “Si bísie ni, bɛdu ɔnana biala ku uleku biala ɔni naaadi adagyaa.”

¹²Na ka bésie ni, bákɛ badagyaa belekubi eti maane ɔni na ama ku ɔnana ɔdi bátatɛ kudii. Na béti beleku bamɛni bésienku Israelƒuɔ kasalakɔ na Silo na Kanaan kalɔ lɛlɔ.

¹³Amu na Israelƒuɔ ƒui bátala bekyuli bákya Benyamin kɔdua bekyuli bani nkya Rimon atakpɛ kemmo, na bátásu-ma ka keyi kayɔ-ma.

¹⁴Anwuɔsu Benyamin kɔdua bekyuli bammɔ bénwini bésie ɔma uwi ɔmmɔ kemmo, na béti beleku bani na bátadu na bási Yabes-Gilead béte-ma. Nsu beleku bammɔ bétedu bana bumomo.

¹⁵Na Israelƒuɔ bekyuli béwulo kɔnyana béte Benyamin kɔdua bekyuli bammɔ. Ɔsika Unwoti ɔ́ya na Israel ɔ́yila kaba kadi na nwuna adua kemmo.

¹⁶Ɔmɛni ɔsu benengu bani násala lisu mmɔ básu banini, “Ka beleku badi basɔ beeebo Benyamin kɔdua kemmo mɛni ni, dɛ na bɔdubɔbla na bɔkɛ beleku bute banana bani nátakɛ tɔ beleku na beti-ma?”

¹⁷Amu na básu banini, “Ɔlɛka bɔkɛ kadikɔ kadi bute Benyamin kɔdua bekyuli bani nébu kalɛ na kɔdua kɔdi kalayii na Israel adua kemmo.”

¹⁸Na básu lɛlɔ banini, “Bulakana na buti bula belekubi bute-ma na beti-ma. Na kenye kani búse mmɔ ndi ka, ‘Bɔbuɛ bɔdi bute ukyuli ɔni meti nwuna ubi ulekubi wete Benyamin kɔdua kɔdi ka uti-nwu.’

¹⁹Nsu bɛnu! Uwi údu na bɔdi Unwoti lɛkwa ndi lɛkwa limeyi na Silo ɔni nkya Betel katɔ kakɛ. Na Silo ɔkya ɔƒɛ kanukɔ ulu ɔni néti úsela ɔ́si Betel úsie Sekem na útédu Lebon kada kakɛ.”

²⁰Ɔmɛni ɔsu bébo Benyamin kɔdua bekyuli ɔda banini, “Bisie na bitábɛ adingyii mmo kemmo,

²¹na binye kagyumana. Na si uwi ɔni na bɛnu ka beleku bani nási Silo bebo baatɔ́ ni, na bikeli bɛlɛ adingyii mmo bɔmmɔ kemmo, na ɔdi biala utéƒie uleku unwi ɔbla ulekudi, na bɛtɔlɔ bisie Benyamin kalɔ kemmo.

²²Na si beleku bammɔ bati ku banwani bananabi bebo-bu kudɔ bábakya-mii kakya na lɛla lɛni bɛ́bla mɛni ɔsu ni, bɔdubo-ma bɔsu bɔnini, ‘Bɛya na kaƒɔ kayɔ-mii na bite-ma kebunku. Ɔsika kekpo uwi kemmo ni, bútakɛ beleku unwi unwi butéte-ma. Nsu ɔɔɔdi amii néti beleku bammɔ bíte-ma. Anwuɔsu bina litemi libo ubo.’ ”

²³Ɔmɛni ɔsu lɛni na Benyamin kɔdua bekyuli bammɔ bábla uwi ɔni na beleku bammɔ bakya baatɔ́ mmɔ. Ɔnana biala úkeli na útéƒie uleku unwi na úti-nwu ɔ́bla ulekudi. Mmɔ na bénwini bésie bana kalɔ lɛlɔ, na bátásɔku bana lɛma báda na bélie-ni kemmo.

²⁴Uwi ɔmmɔ kemmo Israelƒuɔ bátɔlɔ kesii kani bakya mmɔ, na ɔdi biala únwini útéduo nwuna kɔdua lɛtɔ kemmo na bana kesii kani na bana kadikɔ kakya.

²⁵Na uwi ɔmmɔ kemmo kani na Israelƒuɔ beeebo ɔga ɔdi. Ɔmɛni ɔsu ɔdi biala ɔɔbla lɛla lɛni na ɔɔyɔ́.