Read Lelemi Litemi Batɛne 6 Bible Online

Litemi Batɛne 6 - Lelemi bible

Litemi Batɛne 6

¹Na uwi bamba ɔdi lɛlɔ ni, Israelƒuɔ básɔ bábla likpidi na Unwoti anumi. Ɔmɛni ɔsu ɔ́ya na Israelƒuɔ bénwini kabla bablane béte Midianƒuɔ akwa maatɛ sɔɔn.

²Ka Midianƒuɔ bamɛni bebo ɔyikun bétulo Israelƒuɔ ɔsu ni, Israelƒuɔ bátáwia kɔkyakɔ na abi akɔ ku atakpɛ libu ku kɔgyumanakɔ kpakplaa kemmo.

³Na uwi biala na Israelƒuɔ bákya edula ni, na Midianƒuɔ ku Amalekƒuɔ ku bekyuli bamba bani nási ɔƒɛ katukɔ kakɛ beebo teebeyu-ma taatu na bekpoku-ma.

⁴Baabla kuliekɔ na mmɔ, na bebile bana edula ani ƒui bákya mmɔ kede kede úti útédu Gasa amadɔ. Na Israelƒuɔ bebuo bani ndi baƒonu ku bese ku bebuo ala betine ƒui ina unwi pɛ muedi baláda teenyene-ma.

⁵Beeti bana bebuo lisu bonwu ku bana nvo teeboku, na bebewi mmɔ aani baalɔlɔ, na bebile ala ƒui ɔni na lɛla lɛdi lɛsɔ lilebu. Na ukyuli ɔdi ulakana-ma bɔka na bana bumomo ɔsu.

⁶Midianƒuɔ bésusu Israelƒuɔ ɔni na uuubo bɔsu, anwuɔsu bákpali Unwoti ka ubebunku-ma.

⁷Ka Israelƒuɔ béwulo bákpali Unwoti ka ubedie-ma na Midianƒuɔ bukpoku bɔmɛni ɔsu ni,

⁸Unwoti, Israelƒuɔ Katɔti, ɔ́tala kenye udiene ɔdi úmene-ma ka utásu-ma ɔnini, “Ami nédie-mi lɛ́lɛku Egyipte kalɔ lɛlɔ kesii kani nka bɛkya bɛɛbla kabla teete-ma.

⁹Ami náƒɔ-mi lɛ́lɛku Egyipteƒuɔ enu kemmo ku bekyuli bani nékpoku-mii na kalɔ kani bilie lɛlɔ mɛni enu kemmo. Na uwi ɔni bísie bísela anumi ni, na mɔɔbɔku-ma na liti bana kɔlɔ lite-mii.

¹⁰Lɛ́su-mii ka ami ndi bina Unwoti Katɔti, na ɔdi utakpa Amoriƒuɔ baƒiɔ na kalɔ kani lɛlɔ na bilie mɛni ɔƒɛni. Nsu bítenu mina litemi.”

¹¹Amu na Unwoti ɔtu ɔdi úbo na úbelie kugyii bonwu kɔdi kalɔ na Oƒra ɔma kemmo. Na kugyii kɔmmɔ kɔdi Yoas ɔni nási Abi-Eser kɔdi. Mmɔ na ubidi Gideon ɔkya uuwiile edula ebi teewi ntɛ kebulokɔ kalɛ na Midianƒuɔ balanu-nya beledie kemmo.

¹²Amu na Unwoti ɔtu ɔmmɔ údie lɛlɔ ɔ́tina Gideon na mmɔ na ɔ́su-nwu ɔnini, “Unwoti ulieku-ɔ, awɔ ukpone ɔyikune.”

¹³Amu na Gideon údie kenye ɔnini, “Ati, si Unwoti ulieku-bu ni, bi ɔsu na ala amɛni aalɛ́ku-bu lɛni? Wɛ na nwuna akɔla ala budie taatina akya? Ɔɔɔdi bɔsu na bati básu-bu banini, ‘Unwoti nédie-bu ɔ́lɛku Egyipteƒuɔ enu kemmo.’ Nsu ɔƒɛni amu údie-bu atu na ɔ́nyonu-bu ɔ́kya Midianƒuɔ enu kemmo.”

¹⁴Amu na Unwoti ɔ́su-nwu ɔnini, “Ami mɔɔtala-a nnii teesie ku ɔyikun ɔni ƒui na ebo na etédie Israelƒuɔ alɛku Midianƒuɔ enu kemmo.”

¹⁵Amu na Gideon údie kenye ɔnini, “Unwoti, dɛ na ndubo bɔbla asa na makana Israelƒuɔ bukpo bɔƒɔ? Na Manase kɔdua bekyuli akɔ ni, abu nse kpɛtɛ kpɛtɛ ntulo ƒui, na ami lɛnɔ ndi ukplodi na mina ɔtɔ badi akɔ.”

¹⁶Amu na Unwoti ɔ́su Gideon ɔnini, “Nnyeku-ɔ, na adubukpoku Midianƒuɔ ƒui na abla-ma kpɛtɛ kpɛtɛ.”

¹⁷Amu na Gideon údie kenye ɔnini, “Unwoti, si sɔsɔ na mina lɛlɔ lɛ́ƒɔ-ɔ anu bɔdi ni, ya na lɛnu ƒula akɔla budie taatina adi na lɛti ka awɔ geen mɔɔtɛmiku-mi.

¹⁸Na buvele kemmo ni, tatɔlɔ mɛni úti útédu ka liti mina etela líboku ḿbese-ɔ anumi.” Amu na Unwoti ɔ́su-nwu ɔnini, “Línu, na ndubulie mɛni lɛgya-a wetédu ka énwini ébo.”

¹⁹Amu na Gideon únwini úsie kaduli na útádu ese ɔkɔdi ɔdi na ɔ́bla kutu ƒɛƒɛɛ na úti ɔlaaƒɔ ɔni kemmo na bɔnyii buubo, na úƒi bodobodo na úti ala ammɔ ƒui ɔ́kya kagyigyɛ kemmo ku lɛna ku kutu lɛnwabui lɛmmɔ ƒui úboku kugyii kubendi kɔmmɔ kalɔ úbete-nwu.

²⁰Amu na Katɔti ɔtu ɔmmɔ ɔ́su Gideon ɔnini, “Ti lɛna ku bodobodo ɔmmɔ na eti asia lɛtakpɛ lɛmɛni lɛlɔ, na ewilimi kutu kɔmmɔ ewi-nwu lɛlɔ.” Na Gideon lɛnɔ ɔ́bla ɔ́sia kalɛ ɔ́su-nwu mmɔ.

²¹Na Katɔti ɔtu ɔmmɔ úti ugyii ɔni ɔ́da mmɔ kenye útuku lɛna ku bodobodo ɔmmɔ. Na ogya ɔ́buɛ ɔlɛ lɛtakpɛ lɛmmɔ lɛlɔ na ɔ́kyula lɛna ku bodobodo ɔmmɔ. Mmɔ kani na Unwoti ɔtu ɔmmɔ ɔ́yii ɔ́kya.

²²Uwi ɔni na Gideon ɔ́nu ɔ́ti ka Unwoti ɔtu na ɔdi ni, ɔ́va kɔnakunwi na ɔ́su ɔnini, “O Unwoti, Ɔyikune Ƒui! Lɛ́nu Unwoti ɔtu anumi ku anumi!”

²³Nsu Unwoti ɔ́su-nwu ɔnini, “Keyi buɛɛ kasiaku-ɔ! Na ada bɔyia aya. Ɔsika elekpi.”

²⁴Amu na Gideon ɔ́tu lɛkpabi úte Unwoti na ɔ́sia-nwu lɛnyi ɔnii, “Unwoti Ɔdi Keyi Buɛɛ Unwoti.” Na lɛkpabi lɛmmɔ lɛmu lɛ́lɛ Oƒra Abi-Eser kalɔ kemmo.

²⁵Amu na usien ɔmmɔ ni, Unwoti ɔ́su Gideon ɔnini, “Ti ƒula ɔti ɔmantɛ akɔ ɔni nsiaku ebuo unengudi kama unyɔdi ɔni náakɛ akwa maatɛ. Na atáƒɛ ƒ'ɔti Baal baƒiɔ bani na ɔ́tu ɔ́lɛ mmɔ. Na amɛnɛ Asera kugyii kɔni kunye-nwu kudɔ mmɔ ewi kalɔ.

²⁶Na atu lɛkpabi buni lɛni nákuku ete ƒula Unwoti Katɔti na katɔ mmɔ. Na eti ɔmantɛ akɔ ɔmmɔ abla bɔkyula akpala ete-mi. Na eti kugyii kɔni na amɛnɛ mmɔ ekyweni abla akpala ammɔ.”

²⁷Ɔmmɔ ɔsu Gideon úti nwuna kabla bablane leevu ɔ́da aani kalɛ na Unwoti úbo-nwu ɔda. Nsu ka ɔyia nwuna bawɔne ku ɔma ɔmmɔ bananabi ɔsu ni, usien mmomu na ɔ́bla ala ammɔ, na ɔɔɔdi ɔƒiiwi.

²⁸Ka kadi kégye na ɔma ɔmmɔ bananabi báta ni, bánu ka Baal lɛkpabi lɛ́ƒɛ lɛtɛ kalɔ, na Asera kugyii kɔni nnye-nwu kudɔ lɛnɔ bámɛnɛ-ku báva kalɔ. Na bátu lɛkpabi lɛwɔdi na bádu ɔmantɛ akɔ unyɔdi ɔmmɔ bábla akpala na lɛkpa lɛwɔdi lɛmmɔ lɛlɔ.

²⁹Amu na bakya beeye lɛlɔ banii, “Ɔma geen nábla ala amɛni?” Amu ka beduo ala kemmo kaduɛ ni, bábanu bati ka Yoas ubidi Gideon nábla ala ammɔ.

³⁰Amu na ɔma ɔmmɔ bananabi bátásu Yoas banii, “Ti ƒ'ubidi Gideon boku. Ɔ́manku ka badu-nwu, ɔsika ɔ́ƒɛ Baal lɛkpabi uwi kalɔ na ɔ́sɔ ɔ́mɛnɛ kugyii kɔni nnye lɛkpabi lɛmmɔ kudɔ ɔ́va kalɔ.”

³¹Amu na Yoas údie kenye na otogyi ɔmmɔ anumi ɔnini, “Amii ndubɔtɛ litemi lɛmmɔ bite Baal? Munuu amii mɔɔwia ka bɛƒɔ-nwu ngba? Na mɔɔsu-mii nnii ukyuli biala mata mekpo mete-nwu ni, ɔlɛka badu-nwu ɔtanta ɔmɛni kani. Na nsɔ mɔɔsu lɛnɔ ka si Baal ɔgyi ka ɔyikune na ɔdi ni, na anwu ɔlati ukpo ute lɛlɔ si ukyuli ɔdi ɔ́ƒɛ nwuna lɛkpabi.”

³²Anwuɔsu ɔ́si limeyi lɛmmɔ básia Gideon lɛnyi banii Yerubaal, ɔni kalɔ ndi “Bɛya na Baal alati ukpoku Gideon.” Ɔsika ɔ́ƒɛ Baal lɛkpabi.

³³Ɔmɛni kama ni, Midianƒuɔ ku Amalekƒuɔ ku bani ƒui nli ɔƒɛ katukɔ kakɛ bátu akpagya na bávia Yordan Ketu, na bésie batásala lisu na Yesreel Kɔwɛ kemmo.

³⁴Amu na Unwoti Kɔyu kɔ́ƒɔ Gideon lɛlɔ kemmo na úti kakpɛɛ na ɔ́vwi momoomo ɔ́kpali Abi-Eserƒuɔ ka batu akpagya bábasiaku-nwu.

³⁵Na ɔ́tala bekyuli ɔ́kya Manase ku Aser ku Sebulon ku Naƒtali kɔdua bekyuli ƒui ka batu akpagya na besie betékpo. Na ama lɛnɔ báta sɔsɔ na básiaku-ma.

³⁶Amu na Gideon ɔ́su Unwoti ɔnini, “Si sɔsɔ na ásu ka adubɔƒɔ Israel ngba asiaku mina lɛlɔ ni,

³⁷na ndubuti kpekpe liwi kakpa kamɛni lɛlɔ, na si amii áyu éwi na ɔ́ƒɔyi kpekpe ɔmmɔ, nsu kalɔ kataƒɔyi ni, na ndubɔƒɔ lɛdi ka adubɔsia-mi lɛlɔ, na áƒɔ Israelƒuɔ ngba aani kalɛ na ásu ése.”

³⁸Na úbo ute lɛni pɛpɛɛpɛ. Ka Gideon ɔ́ta ɔtanta tutuutu ni, úti kpekpe ɔmmɔ na ɔ́ka-nwu. Na ntu bɔni nálɛ kpekpe ɔmmɔ lɛlɔ buyii lɛkpibui.

³⁹Amu na Gideon ɔ́su Unwoti ɔnini, “Buvele nda-a, teti kɔnyi takya-mi. Ya na lɛsɔ lɛsu-ɔ na abla lɛla lɛdi na kpekpe ɔmɛni lɛlɔ ete-mi. Ɔƒɛni ya na kpekpe ɔmmɔ utaƒɔyi, na aya na amii ammɔ ɔƒɔyi kalɔ kammɔ mmomu.”

⁴⁰Na usien ɔmmɔ ni, Katɔti ɔ́bla lɛni kani. Koƒo kɔmmɔ kútaƒɔyi, nsu amii áƒɔ kalɔ kammɔ na káƒɔyi.