Read Lelemi Yohane 2 1 Bible Online

Yohane 2 1 - Lelemi bible

Yohane 2 1

¹Ami baƒɔtaadine unengu muunweni ɔku ɔmɛni lite awɔ uleku ɔni na Katɔti ɔ́ƒuna aani nwuna ɔdi ku ƒula bebi. Mɔɔyɔ́-mii na litemi geen lɛmmɔ kemmo. Na ɔɔɔdi ami lɛti mɔɔyɔ́-mii, mmomu ami ku bani ƒui ngyi litemi geen lɛmmɔ.

²Ɔsika litemi geen lɛmmɔ lɛ́ƒɔ abu ku-mii ƒui lɛlɔ kemmo na lɛdubulie-bu kudɔ uwi ƒui.

³Na si bulie na litemi geen lɛmmɔ ku bɔyɔ kemmo ni, lɛƒɔndia ku kɔnyana bɔnu ku keyi buɛɛ kadubɔsiaku-bu ɔ́si Katɔti ɔni ndi bula Ɔti Ku Yesu Kristo ɔni ndi Katɔti Ubidi kudɔ.

⁴Kubiti kɔ́da-mi geen ka lɛ́nu ka ƒula bebi badi bamu basiaku litemi geen lɛmmɔ kama aani kalɛ kani na Katɔti úbo-bu ɔda.

⁵Na ɔƒɛni ni, uleku ɔyɔne, muuvele-ɔ ka aya na bula ƒui bɔyɔ lɛlɔ. Ɔmɛni ɔɔɔdi ɔda bubo bɔwɔdi na muunweni lite-ɔ. Mmomu ɔdi ɔda bubo bɔni nkya ɔ́si kalɔ kesekɔ.

⁶Na bɔgyi ka bɔɔyɔ́ lɛlɔ si bɔsiaku Katɔti ɔda bubo bɔmmɔ kama. Na ɔda bubo bɔmɛni ndi ka bulie ngba na bɔyɔ kemmo aani kalɛ na bínu ɔ́si kalɔ kesekɔ mmɔ.

⁷Bekyuli bani mɔɔtɔ́lɔ bekyuli béebo bakɛ baaví kayawi. Bekyuli bamɛni muuní ka basu banii Yesu Kristo úbo kayawi aani ukyuli ɔyawine kalɛ. Na ukyuli ɔmɛni udu ni, unye ute ɔkɔ ɔnyine ɔni ndi Kristo ukisine ɔmmɔ.

⁸Anwuɔsu binye kagyumana kalɛ na bilatuma bilewiakun, mmomu na bina katuma kalɛ-mii kɔsia na kudu kɔwɔlɔ.

⁹Ukyuli ɔni náda ɔ́via Kristo ala bɔtina na ulásia-nya kama ni, uuubo kɔna ku Katɔti. Nsu ukyuli ɔni nsiaku Kristo ala bɔtina bɔmmɔ kama ni, uliku Katɔti ku Ubidi lɛnɔ.

¹⁰Ɔmɛni ɔsu si ukyuli ɔdi úbo-mii kudɔ na ɔɔɔda Kristo ala bɔtina bɔmɛni ni, bitegyingya enu bitaƒɔ-nwu na uduo-mii kaduli.

¹¹Ɔsika ukyuli ɔni megyingya enu waƒɔ-nwu ni, ɔ́blaku-nwu unwi na nwuna udunkpi ala bɔbla kemmo.

¹²Mbo ala pii na lɛsu-mii, nsu naaayɔ ka linweni ala ammɔ limene-mii. Mmomu mɔɔwia kuƒi ka libo-mii kudɔ na bɔtɛmi anumi ku anumi kalɛ na bula ebiti edu-bu ɔkwɛ.

¹³Ƒula ɔnwani ulekubi ɔni lɛnɔ na Katɔti ɔ́ƒuna bebi beegyele-ɔ kaduɛ.