Read Lelemi Budie Taatina 10 Bible Online

Budie Taatina 10 - Lelemi bible

Budie Taatina 10

¹Amu na lɛ́nu Katɔti ɔtu ɔyikune ɔbambadi ka ɔ́si katɔ ɔɔyu. Na ɔ́ka ɔ́mana-nwu aani kɔdi, na bukeye bɔ́ka bɔ́mana-nwu lili. Nwuna anumi eekeye aani ɔƒɛ kalɛ, na nwuna lɛgba lise aani akpa ani nnye kalɔ na aada aani ogya.

²Kakunkɛ blii suɛ kadi kébimi kakya-nwu kɔnu. Na úti nwuna kɔdianu ɔgba únyene ɛpu lɛlɔ, na úti kɔmiinu ɔgba únyene kalɔ lɛlɔ.

³Amu na údie lɛdi momoomo aani gyata kalɛ. Na ka ɔ́va ni, kayaa kábwɛ ogya ku kɔku bonwu maatɛ!

⁴Ka línu kɔku bonwu kɔmɛni ni, líse kalɔ nnii muunweni lɛla lɛni na línu. Nsu lɛdi lɛdi lɛ́si katɔ na lɛ́su-mi lɛnini, “Ɔlɛka abɛla lɛla lɛni na énu na kɔku bonwu kɔmmɔ kemmo ese, na tenweni-nya.”

⁵Amu na lɛ́nu ka ɔtu ɔni nnye kalɔ ku ɛpu lɛlɔ mmɔ ɔ́talaku kɔdianu kɔnu katɔ.

⁶Na ɔ́kpali ala ɔ́lɔ Katɔti lɛnyi. Ɔ́lɔ Anwu ɔni nli ngba ɔ́si ɔƒɛni úsela ƒui ɔni nédie katɔ ku kalɔ ku ɛpu ku ala ani nkya-nya kemmo ƒui. Na ɔ́su ɔnini, “Katɔti ɔsɔ ulebile uwi!

⁷Kabla kabɛdi kani na ɔ́su nwuna kenye bediene bani ndi nwuna kabla bablane ka kadubɔlɛ ni, kadubo kete lɛni si Katɔti ɔtu maatɛdi ɔmmɔ ɔ́vwi nwuna kakpɛɛ.”

⁸Ɔmmɔ kama ni, lɛdi lɛni nátɛmiku-mi lɛ́si-ku katɔ mmɔ lɛ́sɔ lɛ́su-mi lɛnini, “Sie na atáƒɔ kakunkɛ kani nkya Katɔti ɔtu ɔni nnye ɛpu ku kalɔ lɛlɔ mmɔ kɔnu kemmo.”

⁹Amu na lísie ɔtu ɔmmɔ kudɔ na lɛ́su-nwu nnii uti kakunkɛ kammɔ ute-mi. Amu na ɔ́su-mi ɔnini, “Ƒɔ, na eti-ka akun! Mɔɔsu-ɔ ka ɔdubo ɔdu bɔyu na ƒula kaƒɔ kemmo, nsu ɔdubɔyu-ɔ emini aani uwɔ na ƒula kenye kemmo.”

¹⁰Amu na lɛ́ƒɔ kakunkɛ kammɔ, na lɛ́kun. Na ɔ́yu-mi emini na kenye kemmo. Nsu ka líbweli-ka lɛ́wɔlɔ ni, ɔ́yu ɔdu na mina kaƒɔ kemmo.

¹¹Nwuna kama ni, ɔtu ɔmmɔ ɔ́su-mi ɔnini, “Ɔlɛka asɔ esie anumi eteedie Katɔti litemi lɛni ndanku bekyuli lidu lidu na kalɔ pii lɛlɔ ku adi lidu lidu batɛmine ku baga pii lɛlɔ ete bekyuli.”