Read Lelemi Budie Taatina 15 Bible Online

Budie Taatina 15 - Lelemi bible

Budie Taatina 15

¹Na lɛ́sɔ lɛ́nu akɔla budie taatina bonwu bɔbambadi na katɔ bɔni nábla-mi kalɛ kadi. Lɛ́nu batu maatɛ ka bada lɛbibo maatɛ lɛni ndi lɛbibo maatɛ likplodi. Ɔsika ɔmɛni kemmo na Katɔti kɔnyi kúdu kɔ́wɔlɔ.

²Na lɛ́nu kalɔ kani nwi aani ɛpu na use kede kede aani asogya kani kemmo na ogya ɔɔda. Na ɛpu ɔmmɔ amadɔ ni, bekyuli benye beedie lɛnu na baagyá lɛbentaa lɛni na Katɔti úte-ma. Ama nádi eƒiebuo ɔmmɔ ku nwuna baƒiɔ ku bumomo bɔni nnye nte nwuna lɛnyi lɛlɔ.

³Na lɛnu lɛni na beedie mmɔ ni, lɛdi Mose ɔni ndi Katɔti kabla ɔblane ku Koƒonu Ubi ɔmmɔ lɛnu. Na beedie banini, “Blɔti ɔni mbo ɔyikun ƒui, ƒula ala bɔbla ébomo, na bulakana-nya kalɔ bunu. Na ƒula ablala ese siin, na ƒula etemila adi litemi geen. Awɔ ndi Uwi Ƒui Ɔga.

⁴Ɔma makana-a anumi bunye na ulayia awɔ Blɔti, na uleti bumwi ulete ƒula lɛnyi? Ɔsika awɔ lɛti nse kedee, na kalɔ ƒui bekyuli badubo babakya-a lili kalɔ. Ɔsika bédie bátina ka aabla lɛla biala ulu siin lɛlɔ.”

⁵Ɔmɛni kama ni, lɛ́nu ka bálɛmi kakpakɔ kedee na katɔ. Na adaka ɔni kemmo na Katɔti bunyimi bɔkya ni, use mmɔ.

⁶Na Katɔti batu maatɛ bani nda lɛbibo maatɛ bammɔ bálɛ bási Katɔti kakpakɔ mmɔ. Na bakya lɛwu lɛƒualadi lɛni muukeye na sika ugyiedi kɔbuli kɔ́da kɔ́mana-ma kayi.

⁷Amu na ngba batu ine bammɔ kemmo unwi úti sika ugyiedi kɔlaku kɔni na Katɔti ɔni nli ngba uwi ƒui kɔnyi kúyi úte batu maatɛ bammɔ.

⁸Na Katɔti kakpakɔ kammɔ kemmo kéyi ku uyɔ ɔni nási Katɔti ɔyikun ku bukeye kemmo. Na ukyuli biala ulakana kakpakɔ kammɔ kemmo buduo, amu ntu batu maatɛ bammɔ béti lɛbibo maatɛ lɛmmɔ béboku kayawi báwɔlɔ.