Read Lelemi Budie Taatina 16 Bible Online

Budie Taatina 16 - Lelemi bible

Budie Taatina 16

¹Amu na línu lɛdi bonwu lɛdi ka lɛɛtɛmi taasiku Katɔti kakpakɔ mmɔ úte batu maatɛ bammɔ ɔnini, “Bisie na bitéwilimi Katɔti kɔnyi kɔlaku maatɛ kɔmmɔ biwi kayawi lɛlɔ!”

²Amu na Katɔti ɔtu udeedi úsie na útéwilimi nwuna kalaku úwi kayawi lɛlɔ. Ɔmmɔ ɔ́ya na alɛbi álɛ éwi bekyuli bani mbo eƒiebuo ɔmmɔ likpose na baalɛ akɔnkɔ teete nwuna baƒiɔ mmɔ lɛlɔ.

³Amu na Katɔti ɔtu unyɔdi úwilimi nwuna kalaku úwi ɛpu kemmo, na ntu bɔmmɔ búnwini ubugya aani ɔni nkya ukpine. Na lɛla biala lɛni mbo ngba na lɛkya ɛpu kemmo mmɔ líkpi.

⁴Amu na ɔtu ɔtɛdi úwilimi nwuna kalaku úwi ntukpa ku abiɔ ƒui kemmo na búnwini ubugya.

⁵Amu na línu ka ɔtu ɔni mɔɔnu ntukpa lɛlɔ ɔ́su ɔnini, “Awɔ ɔni nli na élie ni, awɔ nse kedee. Ɔsika átɛ etemila amɛni ƒui na ulu siin lɛlɔ.

⁶Bekyuli bamɛni nádu ƒula bekyuli ku kenye bediene. Anwuɔsu na éte-ma ubugya ukpidi ɔmɛni na báni. Lɛla lɛni námanku-ma na baaƒɔ́!”

⁷Amu na línu lɛdi lɛni nási Katɔti lɛbi lɛmmɔ kudɔ ka lɛ́su lɛnini, “Blɔti ɔni mbo ɔyikun ƒui, ƒula litemi bɔtɛ buse siin, na ƒula etemila adi litemi geen.”

⁸Ɔmmɔ kama ni, ɔtu unedi úwilimi nwuna kalaku úwi ɔƒɛ lɛlɔ na béte kuƒi ka nwuna ogya ɔkyula bekyuli.

⁹Na bekyuli bákywi ɔ́si ogya liwulu kpakplaa lɛmmɔ ɔsu. Na béwida Katɔti lɛnyi, ɔsika nwuna ɔyikun ɔsu na lɛbibo lɛmɛni líbo-ma lɛlɔ. Nsu ɔmɛni kama ƒui ni, bétenwini kama bátakya bana ekpidi na bemwi Katɔti.

¹⁰Amu na ɔtu ɔlɔndi úwilimi lɛla lɛni nkya nwuna kalaku kemmo úwi eƒiebuo ɔmmɔ lɛgaboku lɛlɔ. Na kalɔ kani lɛlɔ na eƒiebuo ɔmmɔ ɔɔdi lɛga ƒui kábla suu kɔnakunwi! Na bekyuli baadu anyi na lɛbibo ɔsu.

¹¹Na bekyuli bammɔ béwida Katɔti, ɔsika bana alɛbi áya na beenú ɔlɛ geen! Nsu bátada bana alaekpidi bɔbla bátaya.

¹²Ɔmmɔ kama ni, ɔtu ɔkundi úwilimi lɛla lɛni nkya nwuna kalaku kemmo úwi Euƒrate Ketu kebendi kammɔ kemmo. Na ketu kammɔ kákwii kalɛ na baga bani nási ɔƒɛ katukɔ bakɛ kavinkɔ.

¹³Amu na lɛ́nu ayu ekpidi atɛ ani nálɛ aani bapɔtɔlɔ ka bási baalɛ́ liƒu kɔlakpi kɔmmɔ kenye ku eƒiebuo udeedi ɔmmɔ kenye ku eƒiebuo unyɔdi ɔni baalɔ ɔkɔ kenye udiene kenye kemmo.

¹⁴Ayu ammɔ ndi ukisine ayu ekpidi ani muudie akɔla taatina. Na ayu atɛ amɛni muusié kayawi baga ƒui kudɔ kalɛ na basala lɛlɔ na bekpo Katɔti bekyuli na Katɔti ɔni ndi Ɔyikune Ƒui limeyi linengudi lɛmmɔ lɛlɔ.

¹⁵“Binu! Ami Yesu ndubo bɔda bɔlɛ-mii lɛlɔ kɔnakunwi aani uyune kalɛ! Lɛlɔ lɛdubɔyɔ ukyuli ɔni nnye kagyumana na ɔda adala ani mɔɔtina ka use siin uwi biala kemmo, kalɛ na ulakɛ kasɔngya ku kɔƒa na kadi akɔ!”

¹⁶Amu na ayu ekpidi ammɔ ásala baga bammɔ na likpo lɛni baalɔ na Hebri kemmo bani Armagedon.

¹⁷Amu na Katɔti ɔtu maatɛdi úwilimi lɛla lɛni nkya nwuna kalaku kemmo úwi kayaa. Na lɛdi bonwu lɛdi lɛ́ku lɛ́si lɛgaboku kudɔ na Katɔti kakpakɔ mmɔ, na lɛɛsu lɛnini, “Ɔ́sa!”

¹⁸Na kayaa kábwɛ ogya ku kɔku bonwu, na katɔ keedu taasia kama! Na kalɔ kaakunku ɔni na kalɔ bɔkunku bɔmmɔ udu bútalɛ kudii ɔ́si uwi ɔni na Katɔti údie ukyuli!

¹⁹Na ɔma unengudi ɔmmɔ ɔ́bwɛ úle akpa atɛ, na lɛma linengudi lɛkladi lɛni nkya kayawi ekpo ƒui lɛ́bwɛ ƒui. Mmɔ ni, Katɔti únyimo Babilon ɔma unengudi ɔmmɔ ekpidi na ɔ́ya na ɔ́ni nwuna kɔnyi lɛbibo ɔɔƒɛɛ ɔmmɔ ƒui.

²⁰Na ntuntɛ kɔlɔ ku abi ani ƒui nkya ni, áyii ákya.

²¹Etubankɛ bonwu adi aani atakpɛ áyu ási kayaa ábaƒiɛmi bekyuli, na béwida Katɔti ɔ́si ɔgbankpi ɔmɛni ɔsu.