Read Lelemi Budie Taatina 17 Bible Online

Budie Taatina 17 - Lelemi bible

Budie Taatina 17

¹Amu na batu maatɛ bani nda kɔlaku kɔmmɔ kemmo unwi úbo-mi kudɔ na ɔ́su-mi ɔnini, “Bo, na lɛtina-a kalɛ na badubo ɔyalɛ ɔni náƒɔ lɛnyi mmɔ kɔtu bɔni. Anwu ndi ɔma unengudi ɔni na bátu bényene ntukpa pii kudɔ.

²Na kayawi baga bákya béteesie teesie ɔma ɔmmɔ kemmo aani kalɛ na banana beesié ɔyalɛ kudɔ. Na ɔma ɔmmɔ ekpidi bɔbla bɔ́ƒɔ kayawi bekyuli lɛlɔ kemmo aani kalɛ na baaní ntɛ teekpi.”

³Ɔtu ɔmmɔ ɔ́kpanku-mi úsienku ketele kemmo na kɔyu kemmo. Mmɔ na lɛ́nu uleku ɔdi ka ulie eƒiebuo ugyiedi lɛlɔ. Na bénweni anyikpi ani muudumi Katɔti ƒui básia eƒiebuo ɔmmɔ lɛlɔ. Na eƒiebuo ɔmmɔ mbo eli maatɛ ku ese leevu.

⁴Uleku ɔmmɔ unyimi adi otondi ku egyiedi na úti sika ugyiedi ku asɛɛ ku aseebi ɔ́klibi lɛlɔ. Na ɔda sika ugyiedi ɔɔƒɛɛ ɔdi ɔni kemmo na ala ani na Katɔti ukisi na eesé lɛlɔ éyi tɛtɛɛtɛ ɔkɛnku nwuna lɛyalɛ ala bɔbla ɔsu.

⁵Na nwuna lɛtɛntɛ ni, bénweni lɛsugba lɛnyi lɛdi básia. Babilon, Ɔma Unengudi. Bayalɛ Ƒui Uni Ku Ekisila Ƒui Uni.

⁶Amu na lɛ́nu ka uleku ɔmmɔ úkpi ntɛ na Katɔti bekyuli bani ubugya na ɔ́ni ku bani na ɔ́du ɔsika benye Yesu kama kpakplaa ɔsu. Uwi ɔni na lɛ́nu-nwu ni, ɔ́bla-mi kalɛ kadi.

⁷Amu na ɔtu ɔmmɔ úye-mi ɔnini, “Bi ɔsu na ɔ́bla-a kalɛ kadi? Ndubudie lɛsugba lɛmɛni kalɔ lite-ɔ. Lɛkɛnku uleku ɔmmɔ ku eƒiebuo ɔni lɛlɔ na uleku ɔmmɔ ulie mmɔ lɛlɔ. Na eƒiebuo ɔmmɔ mbo eli maatɛ, na ese leevu alɛ eli ammɔ lɛlɔ.

⁸Eƒiebuo ɔmmɔ ni, úlie ngba dii, nsu ɔsɔ uuubo. Na ɔdubo bɔlɛ bɔsi kasuudikɔ ubu bonwu ɔmmɔ kemmo, na usie na Katɔti ɔyila-nwu udu ƒui. Na bekyuli bani nli kayawi lɛlɔ na bétenweni-ma anyi bátakya ngba ɔku kemmo asa na Katɔti údie kayawi ni, ɔdubo-ma bɔbla kalɛ kadi si banu eƒiebuo ɔmmɔ. Ɔsika úlie ngba dii, nsu ɔsɔ uuubo, na ɔsɔ ɔdubo bɔda bɔlɛ.

⁹“Asa na ukyuli wenu lɛsugba lɛmɛni kalɔ ni, amu ntu ubo lɛnunda. Eƒiebuo eli maatɛ ku uleku ɔyalɛ ɔmmɔ benye bete ɔma ɔni bátu bálɛ abi maatɛ lɛlɔ. Na eli ammɔ lɛnɔ enye ete baga maatɛ badi.

¹⁰Baga ɛlɔ bádi lɛga bávi, na unwi ɔmu ɔɔdi lɛga, na ɔkladi anwu útadi tɔ lɛga. Nsu si úbo ni, ɔdubo lɛga bɔdi uwi klukui ɔdi kani.

¹¹Eƒiebuo ɔni nélie ngba dii nsu ɔsɔ uuubo mmɔ ni, anwu ndi ɔga maanedi. Na nwuna udu use aani baga maatɛ bammɔ kalɛ, na ɔdubo busie na Katɔti ɔyila-nwu udu ƒui.

¹²“Na ese leevu ani na ánu mmɔ ni, adi baga leevu bani nétese tɔ kalɔ ku lɛga bɔdi. Nsu badubo-ma kuƒi bute uwi klukui na badi lɛga ku eƒiebuo ɔmmɔ.

¹³Baga leevu bamɛni ƒui bada kasusu kenwi, na beeti bana ɔyikun ku kenyekɔ teete eƒiebuo ɔmmɔ.

¹⁴Na badubɔta na bekpoku Koƒonu Ubi ɔmmɔ. Nsu Koƒonu Ubi ɔmmɔ ku nwuna bekyuli baƒunadi ku nwuna baƒɔtaadine geen badubo-ma lɛlɔ bɔdi. Ɔsika anwu ndi Blɔti ɔni ndi Bati Ƒui Ɔti ku Baga Ƒui Ɔga.”

¹⁵Amu na ɔtu ɔmmɔ ɔ́su-mi ɔnini, “Ntukpa bɔni kudɔ na ánu ka ɔyalɛ ɔmmɔ ulie ni, amu nnye nte kalɔ ƒui bekyuli ku bani nkya kaba ku kadi ku kalɔ ku adi ƒui kemmo.

¹⁶Ese leevu ani nnye nte baga bani na ánu ku eƒiebuo ɔmmɔ ni, badubukisi ɔyalɛ ɔmmɔ. Na badubo ala ani nse-nwu ƒui bɔƒɔ bɔsiku-nwu kudɔ na ɔsɔ ɔkɛ utaavi kasɔngya. Badubo-nwu lɛna bɔkun na bakyula lɛni nébu.

¹⁷Ɔsika Katɔti úti ɔ́kya-ma kayi kemmo kalɛ babla lɛla lɛni na anwu Katɔti ɔɔwia. Na bénu lɛlɔ kalɔ ka beti bana ɔyikun bete eƒiebuo ɔmmɔ na ɔdi lɛga uti utédu ka Katɔti etemila ani na ɔ́su úse ébo-nwu kemmo lɛni.

¹⁸Uleku ɔni na ánu mmɔ ni, anwu unye ute ɔma unengudi ɔni mbo ɔyikun na kayawi baga ƒui lɛlɔ.”