Read Lelemi Budie Taatina 3 Bible Online

Budie Taatina 3 - Lelemi bible

Budie Taatina 3

¹Ɔ́sɔ ɔ́su-mi ɔnini, “Nweni te Sardi baƒɔtaadine lɛkpa ɔtu anii, “Lɛni na ukyuli ɔni mɔɔdi ayu maatɛ ani mɔɔbla Katɔti kabla na nwuna lɛga boku anumi lɛlɔ na ɔda ayabi maatɛ ammɔ na nwuna kɔdianu ɔɔsu.

²Ngyi kalɛ na bɛɛbla bina kabla, na ngyi lɛnɔ ka bekyuli baanu-mii ka bili ngba, nsu bíkpi na kɔyu kemmo! Anwuɔsu bɛgyinya na bɛkya lɛla lɛni nébu lise-mii ogya kalɛ na bilekpi ƒui! Ɔsika lɛ́nu ka lɛla lɛni na bɛɛbla ni, lítedu tɔ lítawɔlɔ na Katɔti anumi.

³Ɔmɛni ɔsu ni, binyimo lɛla lɛni na bátina-mii na bínu lɛnɔ, na bɛda-ni kaduɛ na bina ekpidi eduo-mii na binwini kama bɛkya-nya. Nsu si bítagyinya ni, ndubo-mii kudɔ aani uyune kalɛ na biláti uwi ɔni kemmo na meti mada malɛ-mii lɛlɔ.

⁴Nsu bibo nkyuli ɛlɛɛ badi na Sardi mmɔ bani nétebile bana adala. Na ami ku-ma bɔdubɔda ala aƒualadi na bɔkɛ butaavi, ɔsika bámanku ka babla lɛni.

⁵Ukyuli ɔni madi ekpidi lɛlɔ ni, ɔdubɔda ala aƒualadi aani bana kalɛ. Na lɛɛɛdubo-ma anyi bɔda budie ngba ɔku kemmo. Na ndubudie-ma kenye na mina Ɔti ku Katɔti batu ƒui anumi ka badi ami badi.

⁶“Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ.”

⁷Ɔmmɔ kama ni, ɔ́su-mi ɔnini, “Nweni te Ƒiladelƒia baƒɔtaadine lɛkpa ɔtu anii, “Lɛni na anwu ɔni nse kedee na nwuna litemi lɛdi litemi geen ɔɔsu. Anwu nda Ɔga Dawid ɔyikun ɔni na si ɔ́lɛmi kayakun kadi ni, ɔdi ɔsɔ ulakana-ka bɔkalɛ. Na si ɔ́kalɛ-ka ni, ɔdi ulakana-ka bɔlɛmi.

⁸Ngyi kalɛ na bɛɛbla bina kabla na ngyi ka bibo ɔyikun blii ɔdi. Bɛ́siaku mina ala bɔtina kama na bɛ́di mina etemila lɛnɔ lɛlɔ ulu lɛlɔ. Lɛ́lɛmi kayakun kadi líte-mii na bina anumi na ukyuli biala ulakana-ka bɔkalɛ.

⁹Bɛnu! Ɔkɔ banyine bani násala bewi Satan ku nwuna badi kasalakɔ ngye na baalɔ-ma Yudaƒuɔ nsu baaadi Yudaƒuɔ ni, ndubɔya na balɛ akɔnkɔ na ƒula lɛgba akɔ. Na bana ƒui badubɔsu banii mɔɔyɔ́-ɔ.

¹⁰Na ka bɛ́di mina ɔda ɔni na líbo-mii lɛlɔ, na bínye kpakplaa na bɛ́siaku ala ani ƒui muukpóku-mii ɔsu ni, ndubɔda-mii lidie lɛbibo lɛni mebo kayawi ƒui lɛlɔ libakɔku bekyuli bani nlie kalɔ lɛlɔ lɛnu kemmo.

¹¹“Ndubo uwi klukui kemmo. Anwuɔsu bɛda lɛla lɛni nse-mii kaduɛ kalɛ na ukyuli ɔdi uláƒɔ bina lɛyuƒɔla ulásiku-mii enu kemmo.

¹²Ndubo ukyuli ɔni madi lɛlɔ bɔbla aani lɛkpa na mina Katɔti kakpakɔ ɔni na lɛsɔ lilágyu mmɔ kudii. Ndubo mina Katɔti lɛnyi ku nwuna ɔma kedee ɔmmɔ lɛnyi bunweni bɔsia-nwu lɛlɔ. Na ɔdi Yerusalem ɔwɔdi ɔni mayu masi katɔ na Katɔti kudɔ. Na ndubo ami ɔlati lɛnyi lɛwɔdi lɛnɔ bunweni bɔsia-nwu lɛlɔ.

¹³Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ.”

¹⁴Na ɔ́sɔ ɔ́su-mi ɔnini, “Nweni te Laodikea baƒɔtaadine ɔtu anii, “Lɛni na anwu ɔni mɔɔyá na lɛla biala lɛɛsia lɛni ɔɔsu. Na ɔdi Katɔti kenye udiene geen ɔni mɔɔbla ala ulu lɛlɔ, na anwu mɔɔdi Katɔti ala ani ƒui na údie lɛlɔ.

¹⁵Ngyi lɛla lɛni na bɛ́bla na ngyi ka bítaba na bítaƒɔ ogya lɛnɔ. Nsu nka mɔɔyɔ́ si bɛ́ƒuna linwi.

¹⁶Nsu ka buse kani na bise gugungu na bítaba iye bítaƒɔ ogya lɛnɔ ɔsu ni, ndubo-mii butuo bɔlɛku mina kenye kemmo!

¹⁷Bɛɛsu bɛnii, ‘Mbo ala na ɔdianku-mi, na mbo ala ani ƒui na mɔɔwia.’ Nsu bɛɛɛgyi bɛnii biisé lɛlɔ na bina lɛlɔ libo kɔnyana, na biiibo lɛla lɛdi, na anumi ábwɛ-mii, na bɛkɛ kasɔngya.

¹⁸Anwuɔsu mɔɔlɛ-mii kpakplaa nnii bibo na bibeye sika ugyiedi ɔni bábla kede kede na ogya kemmo na mina kudɔ na binwini balakɛne. Na bibeye adiƒuala ani na binyimi na bekyuli basɔ balanu bina kasɔngya ku kɔƒa. Na biye kuvo bɛkya anumi na bitaanu kaduɛ.

¹⁹“Bekyuli bani na mɔɔyɔ́ ni, ama na mɔɔdɔnku na mɔɔní-ma kɔtu. Anwuɔsu bɛsia lɛlɔ anu kpakplaa na binwini kama bɛkya bina ekpidi.

²⁰Binu! Nnye kayakun muubó kɔnu. Na si ukyuli ɔdi únu-mi lɛdi na ɔ́lɛmi úte-mi ni, ndubuduo-nwu kudɔ na ami ku-nwu bɔsala bɔdi.

²¹“Anwu ɔni madi ekpidi lɛlɔ ni, ndubute-nwu kuƒi na ulie-mi kudɔ na lɛgaboku lɛlɔ aani kalɛ na lɛ́di lɛlɔ na nli mina Ɔti kudɔ na lɛgaboku lɛlɔ.

²²Si bibo atu ni, na binu lɛla lɛni na Katɔti Kɔyu kɔɔsu baƒɔtaadine akpa ammɔ.”