Read Lelemi Budie Taatina 7 Bible Online

Budie Taatina 7 - Lelemi bible

Budie Taatina 7

¹Na ɔmɛni kama ni, lɛ́nu Katɔti batu ine badi ka benye kayawi ekpo ene ammɔ. Na bada ɔƒɛƒɛɛ ɔni muukpó taasi ekpo ene ammɔ ƒui kenye, kalɛ na ɔƒɛƒɛɛ biala ulékpo na kalɔ lɛlɔ iye ɛpu anumi iye na egyii akɔ.

²Katɔti úte-ma ɔyikun ka babla kalɔ ku ɛpu kalala na beti bani bekyuli kɔtu. Nsu lɛ́nu Katɔti ɔtu ɔbambadi ɔdi ka ɔ́si ɔƒɛ katukɔ ɔdubo na ɔda lɛla lɛni na Katɔti ɔni nli ngba ɔdubuti use bekyuli likpo. Na ɔtu ɔmmɔ ɔ́kpali batu ine ku lɛdi momoomo,

³na ɔ́su-ma ɔnini, “Bitabla kalɔ iye ɛpu iye egyii adi kalala weti wetédu lebo lɛni na búse Katɔti kabla bablane likpo ku likposela lɛmɛni na bana atɛntɛ.”

⁴Na básu-mi ka bekyuli bani na béti Katɔti likposela lɛmmɔ bése-ma likpo na bana atɛntɛ bumomo bɔdubɔbla aani bekyuli mpim eti anyɔ ku aavlene-ine. Na bekyuli bammɔ bási Israel kaba leevu-inyɔ kammɔ kemmo.

⁵Nkyuli mpim leevu inyɔ bási Yuda kaba kemmo. Na mpim leevu-inyɔ bási Ruben kaba kemmo. Na mpim leevu-inyɔ bási Gad kaba kemmo.

⁶Na mpim leevu-inyɔ bási Aser kaba kemmo. Na mpim leevu-inyɔ bási Naƒtali kaba kemmo. Na mpim leevu-inyɔ bási Manase kaba kemmo.

⁷Na mpim leevu-inyɔ bási Simeon kaba kemmo. Na mpim leevu-inyɔ bási Lewi kaba kemmo. Na mpim leevu-inyɔ bási Isakar kaba kemmo.

⁸Na mpim leevu-inyɔ bási Sebulon kaba kemmo. Na mpim leevu-inyɔ bási Yoseƒ kaba kemmo. Na nkyuli mpim leevu-inyɔ na bése likpo na Benyamin kaba lɛnɔ kemmo.

⁹Na ɔmɛni kama ni, lɛ́nu ka bekyuli pii badi benye mmɔ bani na ukyuli ɔdi ulakana bɔka! Bekyuli bamɛni bási kalɔ biala kemmo ku kadi biala akɔ ku bekyuli lidu lidu ƒui akɔ ku adi lidu biala kemmo ka bénye lɛgaboku lɛmmɔ ku Koƒonu Ubi ɔmmɔ anumi, na bákya lɛwu lɛƒualadi na bada like.

¹⁰Na básu ku lɛdi momoomo banini, “Ngba bɔƒɔ bɔɔsí bula Katɔti ɔni nlie lɛgaboku lɛlɔ ku Koƒonu Ubi ɔmmɔ kudɔ.”

¹¹Batu ƒui benye báka bámana lɛgaboku ku benengu ku ngba batu ine bani nnye mmɔ.

¹²Na báyu bébi kalɔ na lɛgaboku lɛmmɔ anumi na beemwi Katɔti, na baasu banini, “Ɔsia lɛni! Bula Katɔti uukeye, na ubo lɛnunda ku ɔbu ku kenyekɔ ku ɔyikun, na ɔ́manku bumwi ku linugya ɔ́si ɔƒɛni úsela ƒui! Ɔsia lɛni.”

¹³Amu na benengu bammɔ akɔ unwi úye-mi ɔnini, “Ɔma bene ndi bekyuli bani nkya lɛwu lɛƒualadi mɛni lɛni? Na wɛ na bási?”

¹⁴Amu na lɛ́su-nwu nnini, “Ati, lɛɛɛgyi-ma. Awɔ ngyi bekyuli bamɛni.” Amu na ɔ́su-mi ɔnini, “Bekyuli bamɛni ndi bani nénye lɛbibo bonwu lɛmmɔ kenye, na bálɛ-nwu kemmo. Bábla sɛɛn na Koƒonu Ubi ɔmmɔ ubugya ɔsu, aani kalɛ na baaƒɔ lɛwu na lɛɛƒuala.

¹⁵“Anwuɔsu na benye Katɔti lɛgaboku lɛmmɔ anumi na baabla-nwu kabla usien ku ɔƒɛ na nwuna kakpakɔ. Ka anwu ɔni nlie lɛgaboku lɛmmɔ lɛlɔ ɔkya-ma akɔ ɔsu ni, ɔdubo-ma bɔgyumana.

¹⁶Na kɔka iye utukwɛ ɔsɔ uladu-ma kudii. Na ɔƒɛ iye liwulu lɛdi lɛsɔ lileƒi-ma.

¹⁷Ɔsika Koƒonu Ubi ɔni nlie lɛgaboku lɛlɔ na mmɔ ni, anwu ndubɔda-ma aani baƒonu ɔdane buni. Na ɔdubo-ma bɔtɔnku busienku abiɔ ani kemmo na ntu bɔni muute ngba buwi uwi biala. Na Katɔti lɛnɔ ɔdubo-ma imii buni.”