Read Lelemi Budie Taatina 8 Bible Online

Budie Taatina 8 - Lelemi bible

Budie Taatina 8

¹Lebo lɛni na Koƒonu Ubi ɔmmɔ ɔ́mami kɔma likpo maatɛdi ni, katɔ mmɔ ƒui kábla diin, na ɔdubɔbla aani ɔdɔ bubo kakɛ kemmo.

²Amu na lɛ́nu Katɔti batu maatɛ bani muunye Katɔti anumi, na úte-ma kɔkpɛɛ maatɛ.

³Na Katɔti ɔtu ɔbambadi ɔ́da ɔ́lɛ ɔni nda sika ugyiedi libwi lɛni kemmo na baakyula oloƒui, na úbenye lɛkpabi lɛmmɔ kudɔ. Béte-nwu oloƒui pii kalɛ na ɔkyula-nwu na sika ugyiedi lɛkpabi lɛni nnye lɛgaboku lɛmmɔ anumi lɛlɔ. Na oloƒui ɔmmɔ ku Katɔti bekyuli ƒui katɔ bɔkpali bɔbla akpala enwi.

⁴Oloƒui ɔni mɔɔkywí mmɔ uyɔ ku Katɔti bekyuli bammɔ katɔ bɔkpali ƒui bɔ́kɔ búsie Katɔti kudɔ ɔ́si Katɔti ɔtu ɔmmɔ enu kemmo.

⁵Ɔmɛni kama ni, Katɔti ɔtu ɔmmɔ úti oloƒui libui lɛmmɔ na úyile-ni ku ogya ɔni na údie na lɛbi lɛmmɔ lɛlɔ, na úbo éwi kalɔ lɛlɔ na kayawi. Mmɔ ni, línu ɔnantu budu kudu ku kɔku bonwu, na kayaa kaabwɛ ogya, na kalɔ kaakunku.

⁶Amu na batu maatɛ bani nda kɔkpɛɛ maatɛ kɔmmɔ báklibi lɛlɔ kalɛ na bavwi bana kɔkpɛɛ.

⁷Katɔti ɔtu udeedi ɔ́vwi nwuna kakpɛɛ. Mmɔ kani ni, etubankɛ ku ogya ɔni násalaku ubugya ɔ́bwɛ úbewi kalɔ lɛlɔ na kalɔ kemodi ku egyii lɛkpa lɛtɛdi lɛ́kywi. Na livo ƒui lɛ́kywi.

⁸Ɔmɛni kama ni, Katɔti ɔtu unyɔdi lɛnɔ ɔ́vwi nwuna kakpɛɛ. Amu na úbo lɛla lɛni nálɛ aani kɔbi kɔni mɔɔda ku ogya útákya ɛpu kemmo. Na ɛpu lɛkpa lɛtɛdi ƒui línwini ubugya.

⁹Na ketu kemmo bebweyi lɛkpa lɛtɛdi ƒui békpi. Na lɛkɔlɔ linengudi ƒui lɛkpa lɛtɛdi lɛ́kywi.

¹⁰Katɔti ɔtu ɔtɛdi ɔ́vwi nwuna kakpɛɛ. Amu na lɛyabi bonwu lɛdi lɛni mɔɔda aani ogya lɛ́lɛ líbo lɛ́si kayaa na lɛ́yu ntukpa ƒui lɛkpa lɛtɛdi ku abiɔ ƒui lɛlɔ.

¹¹Lɛyabi lɛmmɔ lɛnyi ndi Ɔdu Kati Kati. Ntu lɛkpa lɛtɛdi lɛmmɔ ƒui lɛ́yu ɔdu, na bekyuli pii badi békpi na ntu bɔmmɔ ɔdu ɔsu.

¹²Amu na ɔtu unedi ɔ́vwi nwuna kakpɛɛ. Na lɛla lɛdi lɛ́yila ɔƒɛ ku kɔbuli ku ayabi lɛkpa lɛtɛdi bukeye. Anwuɔsu usien ku ɔƒɛ limeyi lɛkpa lɛtɛdi lɛ́sɔ lítanu bukeye.

¹³Amu ka nnye mɔɔnu budie bɔtina bɔmɛni ni, lɛ́nu kɔdigbo aasɛ ɔdi ɔni néveyi ɔkɛ kayaa kakaaka, na ɔ́su ku lɛdi momoomo ɔnini, “Si uwi ɔni na Katɔti batu ɛtɛ bani nébu mɛni bávwi bana kɔkpɛɛ ni, muute bekyuli bani ƒui nli kalɔ lɛlɔ bɔbuɛ, bɔbuɛ, bɔbuɛ kɔtɛ!”