Read Lelemi Budie Taatina 9 Bible Online

Budie Taatina 9 - Lelemi bible

Budie Taatina 9

¹Amu na Katɔti ɔtu ɔlɔndi ɔ́vwi nwuna kakpɛɛ. Na lɛ́nu ɔtu ɔdi ka ɔ́nu ɔ́si katɔ aani lɛyabi úbayu kalɔ. Na Katɔti úte-nwu ɔyikun ɔni mɔɔbala kasuudikɔ ubu bonwu ɔmmɔ kenye.

²Ɔtu ɔmɛni ɔ́lɛmi ubu bonwu ɔmɛni na uyɔ ɔ́lɛ ubu ɔmmɔ kemmo aani uyɔ ɔni mɔɔlɛ́ taasi lɛgyavonku bonwu lɛdi kemmo. Na ɔƒɛ bukeye ku kayaa kábla suu na uyɔ ɔmmɔ ɔsu.

³Baalɔlɔ bani muubile edula badi báyu bási uyɔ ɔmmɔ kemmo bébo kalɔ, na Katɔti úte-ma ɔyikun aani ɔni na batamlukpa bebo kalɛ.

⁴Na ɔ́su baalɔlɔ bammɔ ka batabla livete iye livo iye kugyii kɔdi kalala ntu bekyuli bani na Katɔti útese likpo na bana atɛntɛ.

⁵Útete baalɔlɔ bammɔ ulu ka baya na ukyuli ɔdi ukpi, nsu babla-ma kalala na bebo abi na benu ɔlɛ abuli alɔ. Na ɔlɛ bunu ɔni nkya lɛbibo lɛmɛni kemmo ni, buse aani kalɛ na katamlukpa kaata.

⁶Ɔƒɛni na abuli alɔ ammɔ kemmo ni, badubo kukpi bɔwia, nsu balákɛ-ku. Badubɔwia banii beekpi, nsu kukpi kɔdubo-ma bukeli.

⁷Baalɔlɔ bammɔ bɔnu buse aani bapɔnkɔ bani nnye kagyumana bete kekpo. Na kɔbwa kɔni nálɛ sika ugyiedi kɔgabwa kubi-ma eli. Na bana anumi álɛ bekyuli anumi.

⁸Bana lili linwini lise gyɔlɔɔ, na bana kenye kemmo anyi ese aani gyata anyi.

⁹Na béti ala ani nse aani abuala lɛwu lɛni mɔɔgyumana kayi bákya. Na kɔku kɔni na bana avwi aabla ni, aaku aani kɛɛkɛ pii ɔni bapɔnkɔ báni béselaku kekpokɔ.

¹⁰Baalɔlɔ bamɛni bebo lɛka ku akpɛlɛ aani batamlukpa kalɛ na bana lɛka lɛmɛni kemmo, na bebo ɔyikun ɔni na badubo buti bɔbla bekyuli kalala abuli alɔ.

¹¹Bebo ɔga ɔni ndi ɔtu ɔni mɔɔnu kasuudikɔ ubu bonwu ɔmmɔ lɛlɔ. Ɔtu ɔmmɔ lɛnyi na Hebri lɛdi kemmo ndi Abadon. Na Griki lɛdi kemmo ni, nwuna lɛnyi ndi Apolion ɔni kalɔ ndi Ɔkyulane.

¹²Bɔbuɛ lɛla lideedi lɛ́vi. Na alakpa anyɔ ani ndanku bɔbwɛ inyɔ bɔni nébu ni, adubo bɔlɛ.

¹³Amu na Katɔti ɔtu ɔkundi ɔ́vwi nwuna kakpɛɛ. Na línu lɛdi lɛdi ka lɛ́si sika ugyiedi lɛbi lɛni nnye Katɔti anumi ekpo ene ammɔ lɛlɔ lɛdubo.

¹⁴Lɛdi lɛmmɔ lɛ́su Katɔti ɔtu ɔkundi ɔmmɔ ɔnini, “Táƒɛnimi batu ine bani na bényimi bése Euƒrate Ketu bonwu kudɔ!”

¹⁵Amu na báƒɛnimi batu ine bamɛni bani na bényimi-ma bése mmɔ bete ka báƒɛnimi-ma na ɔdɔ ɔmɛni lɛlɔ na limeyi lɛmɛni kemmo na kɔbuli kɔmɛni kemmo na lɛkwa lɛmɛni tutuutu kemmo kalɛ na badu bayawine ƒui lɛkpa lɛtɛdi.

¹⁶Ɔƒɛni na lɛla lɛni bédie bátina-mi mɛni kemmo ni, lɛ́nu bekpone pii bani nlie bapɔnkɔ lɛlɔ bésela kekpokɔ. Na básu-mi bana bumomo ɔni ndi bekyuli bɔka etili eti ene. Na abuala lɛwu lɛni mɔɔgyumana-ma kayi mmɔ égyie aani ogya, na eekeye aani ɛpu ku ogya atabi. Bapɔnkɔ bammɔ eli ese aani bagyata eli, na ogya ku uyɔ ku agyakpabi aalɛ́ taasi-ma inye kemmo.

¹⁸Na alakpa atɛ ani ndanku kukpi na ási bapɔnkɔ bamɛni inye kemmo ɔsu ni, bekyuli lɛkpa lɛtɛdi sɔɔn békpi.

¹⁹Ɔsika bapɔnkɔ bammɔ ɔyikun ɔkya bana inye ku lɛka kemmo. Bana lɛka libo eli aani balakpi kalɛ, na beeti taadu bekyuli.

²⁰Bekyuli bakladi bani ƒui nétekpi na alakpa atɛ ani ndanku kukpi mmɔ kemmo ni, béténwini kama bátákya ala ani na ama alati béti bana enu bábla bése béte lɛlɔ ka bataakpa. Ala amɛni adanku ayu ekpidi ku bana baƒiɔ bani na béti sika ugyiedi ku ɔƒualadi bávɔ ku kalɔ kemmo abuala ku atabi ku egyii ani na bánwi. Nsu ala amɛni ƒui ni, alánu na elenu na elesie muedi!

²¹Bétenwini kayi na bana bekyuli bɔdu ku evo ala bɔbla kudɔ iye kɔsɔnɔ ala bɔbla ku kuyu kudɔ.