Read Lelemi Rut 1 Bible Online

Rut 1 - Lelemi bible

Rut 1

¹Uwi ɔni kemmo na Bekpone Baga mɔɔdi Israel kalɔ lɛlɔ ni, kɔka kubendi kɔdi kúbo kalɔ kammɔ lɛlɔ. Na ɔnana ɔdi nási Betlehem na Yudaƒuɔ kalɛkɛ lɛlɔ ku ulekudi ku nwuna bebi bananabi inyɔ bálɛ ɔma ɔmɛni kemmo na bátɔlɔ bésie Moab kalɔ lɛlɔ.

²Na ɔnana ɔmɛni baalɔ banii Elimelek. Na ulekudi baalɔ banii Naomi. Na nwuna bebi bananabi inyɔ bammɔ baalɔ banii Mahlon ku Kilion. Bekyuli bamɛni bási Eƒrat kaba kemmo na Betlehem na Yudaƒuɔ kalɛkɛ lɛlɔ. Na bátɔlɔ bésie Moab kalɔ lɛlɔ, na bétélie mmɔ.

³Ɔmɛni kama ni, Elimelek ɔni ndi Naomi ɔgyani úbekpi na Moab kalɔ lɛlɔ mmɔ. Na úbu Naomi ku nwuna bebi bananabi inyɔ bammɔ.

⁴Na bananabi inyɔ bamɛni béti Moabƒuɔ beleku. Unwi úti uleku ɔni baalɔ banii Orpa, na unyɔdi lɛnɔ úti uleku ɔni baalɔ banii Rut.

⁵Uwi ɔni na bétélie kalɔ kammɔ lɛlɔ ƒui ɔbla aani akwa leevu. Na ɔmmɔ kama ni, Mahlon ku Kilion bani ndi Naomi bebi bananabi bammɔ lɛnɔ bébekpi. Na Naomi lɛti kani nébu, ɔsika ɔgyani lɛnɔ úukpi úbavi.

⁶Uwi ɔni kemmo na Naomi ɔmu ɔkya Moab kalɔ lɛlɔ ni, únu ka Blɔti úbo úbanu nwuna bekyuli kɔnyana na Israel kalɔ lɛlɔ na úte-ma adila.

⁷Anwuɔsu ɔ́ta na ɔ́klibi lɛlɔ ku nwuna bebi bele bammɔ ka batɔlɔ Moab kalɔ lɛlɔ. Amu na báta banii beteesie Yudaƒuɔ kalɔ lɛlɔ.

⁸Uwi ɔni bésela ni, Naomi ɔ́su nwuna bebi bele bamɛni ɔnini, “Binwini biteesie bina ɔma na bitélie bina beni kudɔ. Na muuvele Unwoti nnii ɔbla lɛƒɔndia ute-mii aani kalɛ na bɛ́bla lɛƒɔndia bíte-mi ku bina bagya bani nékpi mmɔ.

⁹Na muuvele Unwoti nnii ubimi kuƒi ute bina ɔdi biala na ɔsɔ ɔkɛ kɔgya ulie.” Amu na Naomi ɔ́kya-ma kɔgbu na ɔ́kada-ma. Mmɔ na nwuna bebi bele bamɛni bése kalɔ beewulo na básu-nwu banini, “Oowo! Bulatɔlɔ ƒula kudɔ. Bɔdubo-ɔ bɔsiaku na buteesie ƒula bekyuli kudɔ.”

¹¹Nsu Naomi ɔ́su-ma ɔnini, “Mina bebi belekubi, ɔdi ka binwini. Bi ɔsu na bɛɛyɔ́ ka bɛsiaku-mi kama? Nsɔ naaakana bebi bananabi babambadi bɔwɔ bute-mi na bilieku-ma.

¹²Anwuɔsu binwini biteesie bina ɔma. Ɔƒɛni lɛnɔ ni, lɛ́ɛbi ɔni na nsɔ naaakana kɔgya bulie. Ina banii lɛkɛ kɔgya kɔdi ɔmwi limeyi na banii lɛwɔ bebi bananabi usien ɔmɛni kani ni, bɛɛɛdubo bɔkana bunye bɔgya bebi bammɔ na balɛ lili asa na bilieku-ma.

¹³Na ɔmɛni ɔsu bɛɛɛdubo kɔgya kɔdi bulie. Mina bebi, bɛgyi ka ɔmɛni ɔɔɔdubo bɔtɛ lɛni. Uuduo ami ɔlati teetulo amii muedi. Unwoti náya na úbo úte-mi lɛni.”

¹⁴Ɔmɛni ɔsu básɔ bése kalɔ beewulo. Na Orpa ɔ́kya nwuna ugyieni kɔgbu na únwini ɔ́tɔlɔ úsie kaduli. Nsu Rut ɔmu úƒie Naomi ɔda kpakplaa.

¹⁵Na Naomi ɔ́su Rut ɔnini, “Nu! Ƒ'ɔgyani ɔnwani ulekudi únwini ɔ́tɔlɔ úsie nwuna bekyuli ku bana baƒiɔ kudɔ. Anwuɔsu awɔ lɛnɔ nwini na atásiaku-nwu kama na eteesie bina ɔma.”

¹⁶Nsu Rut ɔ́su Naomi ɔnini, “Tasu-mi anii nnwini nteesie mina ɔma. Ya na lɛsiaku-ɔ. Mɔɔsu-ɔ nnii kesi kesii na ésela ni, ndubɔsiaku-ɔ. Na kesi kesii na adubuduo ni, ami lɛnɔ ndubuduo mmɔ. Na ƒula kadi bekyuli ndubɔbla mina bekyuli, na ƒula Katɔti ɔni ntulo ƒui ndubɔbla mina Katɔti. Na kesii kani na adubukpi bɔtɛ ni, mmɔ kani na ami lɛnɔ ndubukpi bɔtɛ na bava-mi mmɔ. Si ńtabla ɔmɛni ni, Unwoti ɔni-mi kɔtu kunengudi kɔni na ɔɔyɔ́. Kukpi kani ndubule ami ku-ɔ ntɛ.”

¹⁸Amu ka Naomi ɔ́nu ɔ́ti ka lɛla biala liiibo na ɔsu Rut na unwini ɔsu ni, ɔ́da-nwu bɔtɛmiku ɔ́ya.

¹⁹Amu na beleku inyɔ bamɛni básiaku lɛlɔ bétédu Betlehem. Na ka béduo Betlehem ni, owogyo ubendi ɔdi úwi ɔma ɔmmɔ kemmo na ama ɔsu. Na beleku bani nkya ɔma ɔmmɔ kemmo beeye banini, “Naomi geen mɛni?”

²⁰Amu na Naomi ɔ́su-ma ɔnini, “Bitalɔ-mi Naomi. Mmomu bɛlɔ-mi Mara, ɔsika Katɔti útaya na keyi kayɔku-mi.

²¹Uwi ɔni na lɛ́tɔlɔ mɛni ni, mbo ala geen. Nsu Unwoti ɔ́ya na linwini libo ku enukplu. Na bi ɔsu na bɛɛlɔ-mi Naomi? Unwoti ɔ́ya na líbo abi, na ɔ́ya na ɔgbankpi ɔ́siaku-mi.”

²²Udu ɔmɛni kemmo na Naomi únwini ɔ́si Moab kalɔ lɛlɔ úbo nwuna ɔma ku Rut ɔni ndi Moabni na ɔdi ubidi ule. Bébeduo uwi ɔni kemmo na Betlehemƒuɔ bése kalɔ baaƒɛ bana edula.