Read Lelemi Rut 2 Bible Online

Rut 2 - Lelemi bible

Rut 2

¹Na uwi ɔmɛni kemmo ni, ɔnana ɔdi ɔ́kya ɔni nási Naomi ɔgyani Elimelek ɔtɔ kemmo na Betlehem mmɔ. Baalɔ-nwu banii Boas. Ɔnana ɔmɛni ɔdi ɔlakɛne na nwuna lɛlɔ libo ɔbu lɛnɔ.

²Amu limeyi lɛdi ni, Rut ɔni ndi Moabni mɛni ɔ́su Naomi ɔnini, “Ya na nteesie kemo na ntála edula ani na kabla bablane báda béwi. Ngyi ka ukyuli ɔdi ɔdubɔnu-mi kɔnyana.”

³Amu na Naomi ɔ́su-nwu ɔnini, “Ɔdia! Mina ubi, teesie.” Anwuɔsu Rut ɔ́ta na úsie kemo kadi na ɔkpɛ kemo kammɔ kabla bablane kama na ɔɔla edula ani na báda béwi. Asa wanu wati ni, ɔdi Boas ɔni nási Elimelek ɔtɔ kemmo. Nwuna kemo kani na Rut ɔkya ɔɔla edula amɛni.

⁴Na uwi útetu asa na Boas ɔlati ɔ́si Betlehem na ɔ́da ɔ́lɛ kemo mmɔ. Na ɔ́kya kabla bablane bammɔ kenye ɔnini, “Blɔti ulieku-mii.” Na kabla bablane bammɔ lɛnɔ bédie kenye banini, “Blɔti ute-ɔ kusɛ kusɛ.”

⁵Amu na Boas úye kabla bablane bammɔ unengu ɔnini, “Wɛ na ugblebi ɔmɛni ɔ́si?”

⁶Amu na kabla bablane unengu ɔmɛni údie kenye ɔnini, “Ulekubi ɔmɛni ndi Moabni ɔni nási Moab kalɔ lɛlɔ na ɔ́siaku Naomi úbo mmɔ.”

⁷Na kabla bablane unengu ɔmɛni ɔ́sɔ ɔ́su Boas ɔnini, “Ulekubi ɔmɛni úvele-mi ɔnii nte kuƒi na ɔsiaku kabla bablane bamɛni kama na utaala edula ani na báda béwi. Na unye kabla kamɛni lɛlɔ ɔ́si ɔtanta tutuutu úbedu ɔƒɛni. Na ɔƒɛni kani na ɔ́ta úlie kalɔ ɔɔnwuna.”

⁸Amu na Boas ɔ́su Rut ɔnini, “Mina ubi, nu mina litemi. Tesie ukyuli bamba kemo tatála edula adi ntu mina kemo kani. Ɔmɛni ɔsu sɔ kya mɛni kani, na asiaku beleku bamɛni kama na ataala ƒula edula.

⁹Nu ekpo ani bakya baaƒɛ edula na ablaku-ma kabla. Na líbo mina kabla bablane ɔda ka ɔdi biala utabla-a lɛla lɛdi. Na uwi biala na utukwɛ ɔɔda-a ni, sie na atáni ntu bɔni na bédu béyile kutubui kɔni nlɛ mmɔ kemmo.”

¹⁰Amu na Rut ɔ́lɛ akɔnkɔ na úti anumi úbi kalɔ na ɔ́su Boas ɔnini, “Bi ɔsu na ami kadi bamba ukyuli lɛlɔ lɛɛkywí-ɔ kaƒɔ lɛni?”

¹¹Amu na Boas údie kenye ɔnini, “Ƒula ugyieni ɔ́su-mi lɛla biala na ábla éte-nwu úti ɔ́si uwi ɔni na ƒ'ɔgyani úkpi. Na ngyi kalɛ na áda ƒ'ɔti ku ƒ'ini ku ƒula kadi bekyuli ése na ébo élieku bekyuli bani na aaagyi kudii mɛni.

¹²Muuvele Blɔti nnii ɔƒɔ-ɔ kayu na lɛla lɛni na ábla mɛni ɔsu. Na nsɔ muuvele Unwoti Israel Katɔti ɔni kudɔ na ébo mɛni ka ɔgyumana-a na ɔƒɔ-ɔ kayu ƒui.”

¹³Amu na Rut údie kenye ɔnini, “Ati, átɛmiku-mi buɛɛ na ákya-mi ɔkplu lɛnɔ, ina ka ńtamanku ƒula kabla bablane ɔdi biala muedi.”

¹⁴Ɔmmɔ kama ka uwi údu ka badi ni, Boas ɔ́su Rut ɔnini, “Bo na abaƒɔ adila adi na akya kutu kemmo na adi.” Anwuɔsu anwu ku kabla bablane bélie kalɔ, na Boas úti adila ani bánwa bada mmɔ adi úte Rut ka ɔdi. Na ɔ́di na úmo na ɔdi muedi úbu.

¹⁵Amu ka Rut ɔ́ta na úsie ɔkya ɔɔla edula ammɔ ni, Boas úbo nwuna kabla bablane bammɔ ɔda ɔnini, “Bɛya na utaala edula ammɔ. Na si ina ɔ́buma ani nlɛ lisu mmɔ adi muedi ni, biteye-nwu lɛla lɛdi.

¹⁶Na bɛƒɛ edula ammɔ adi bɛlɛ lisu na bɛda bise-nwu na ubabuma. Na ɔdi biala lɛnɔ utadɔnku-nwu.”

¹⁷Anwuɔsu Rut ɔ́la edula na kemo kammɔ ɔ́si ɔtanta úti útédu useyi uwi. Ka úbo edula ebi ammɔ ni, ɔ́kɛ kagyigyɛ bonwu keyile.

¹⁸Ka ɔ́gyu edula amɛni úti ni, ɔ́tɔlɔ úsie kaduli na úti-nya útátina nwuna ugyieni. Na ɔ́su-nwu ka edula amɛni na ɔ́kɛ. Na ɔ́sɔ úte ugyieni ɔmɛni adila ani na Boas ɔ́nwa na ɔ́di úbu mmɔ adi na ɔ́di.

¹⁹Amu ka Naomi ɔ́nu edula amɛni ni, úye Rut ɔnini, “Wɛ kakɛ na átála edula ɔmwi kadi? Na ɔma kemo na ákya ábla kabla? Muuvele Unwoti nnii ute ukyuli ɔmmɔ kusɛ kusɛ na lɛƒɔndia lɛni ɔ́bla-a mɛni ɔsu.” Amu na Rut ɔ́su Naomi ka ukyuli ɔni kemo na ɔkya ɔɔbla kabla mmɔ baalɔ banii Boas.

²⁰Naomi ɔ́su Rut ɔnini, “Muuvele Unwoti ɔni mɔɔdi nwuna linyese lɛlɔ teete bekyuli bani nlie ngba ku bani nékpi ka ute ukyuli ɔmmɔ kusɛ kusɛ.” Amu na úsie anumi na ɔ́su ɔnini, “Ukyuli ɔni nétɔ-ɔ ala mmɔ ni, ɔ́si bula ɔtɔ kemmo. Na ɔdi ɔtɔ ɔmmɔ kemmo bekyuli bammɔ badi akɔ unwi ɔni na ɔkana na ute-bu kebunku.”

²¹Amu na Rut úye Naomi ɔnini, “Lɛkana ntaabla ku nwuna kabla bablane kabla uti utédu ka báƒɛ edula ammɔ báwɔlɔ?”

²²Na Naomi ɔ́su Rut ɔnini, “Ɛɛn, mina ubi, ɔdia ka ataabla kabla na Boas kemo ku beleku bammɔ. Ɔsika si ésie átábla kabla na ukyuli bamba kemo ni, badubo-ɔ kalala kadi bɔbla.”

²³Anwuɔsu Rut ɔ́bla kabla ku Boas beleku úti útédu ka báƒɛ edula ammɔ báwɔlɔ. Nsu Rut ɔ́ƒɔ lɛlɔ ɔ́kya ugyieni kudɔ.