Read Lelemi Rut 3 Bible Online

Rut 3 - Lelemi bible

Rut 3

¹Limeyi linwi Naomi ɔ́su Rut ɔnini, “Ɔlɛka libunku-ɔ na akɛ kɔgya kɔni na elie na ataakɛ ala ani na aawia.”

²Amu na Naomi úye Rut ɔnini, “Eenyimo ɔnana ɔni baalɔ Boas ɔni kabla awɔ ku beleku bammɔ bɛɛbla mmɔ? Ɔnana ɔmmɔ ɔdi bula ɔtɔ ukyuli. Na mɔɔwia ka enu litemi lɛni ndubo-ɔ bɔsu mɛni. Usien ɔmɛni ni, ɔnana ɔmmɔ ɔdubo nwuna edula bubo.

³Anwuɔsu ta na awia ntu bɔdi na akpi, na awia oloƒui ƒɛƒɛɛ ɔdi awɛɛ, na eti ƒula awu ani mɔɔdia bɔnu teetulo akya. Na eteesie kesii kani na beebó edula ammɔ. Nsu taya na Boas ɔnu ɔti ka akya mmɔ uti utédu ka ɔ́wɔlɔ.

⁴Si úsie útátɛ ni, na anu kesii kani na ɔtɛ mmɔ ese likpo. Na si ɔlɛɛ ni, bla buɛɛ na ebimi nwuna kɔdi na ayu atɛ-nwu kudɔ. Na ɔdubɔsu-ɔ lɛla lɛni na adubɔbla.”

⁵Amu na Rut údie kenye ɔnini, “Línu lɛla lɛni na ásu-mi. Ndubɔbla bɔsiaku kalɛ kani na ásu mmɔ.”

⁶Anwuɔsu Rut úsie kesii kani beebó edula ammɔ, na útábla lɛla lɛni na ugyieni ɔ́su-nwu mmɔ.

⁷Ka Boas ɔ́di na ɔ́wɔlɔ lɛla biala ni, ɔ́vi úsie útátɛ edula lisu lɛni bébo béwi mmɔ eli.

⁸Usientɛ ka Boas úkeyi lɛlɔ ɔ́gyinya kɔnakunwi ni, ɔ́nu ka ulekubi ɔdi ɔtɛ-nwu kudɔ. Na ɔ́bla-nwu kalɛ kadi.

⁹Amu na úye ɔnini, “Awɔ, ɔma ntɛ mɛni?” Amu na Rut údie kenye ɔnini, “Ati, ami Rut mmɔ.” Na Rut ɔ́su-nwu ɔnini, “Ka adi mina ɔtɔ ukyuli ɔsu ni, mɔɔnu ka awɔ na ɔlɛka anu-mi lɛlɔ. Anwuɔsu muuvele-ɔ nnii ti-mi.”

¹⁰Amu na Boas ɔ́su-nwu ɔnini, “Katɔti kusɛ kusɛ ɔsiaku-ɔ, ɔsika bɔyɔ bɔni na édie átina-mi mɛni butulo bɔni na édie átina ƒula ugyieni ɔ́si lɛla lɛni na ábla mɛni ɔsu. Ɔƒɛni lɛnɔ átawia okloƒu ɔni ndi ɔlakɛne iye ɔwabane ka elieku-nwu.

¹¹Na ɔƒɛni mɔɔsu-ɔ ka taya na lɛla lɛdi likpoku-ɔ. Ɔsika ukyuli biala na ɔma ɔmɛni kemmo ɔgyi ka adi uleku ɔbuni. Ɔmɛni ɔsu lɛla biala na aasu-mi mɛni ni, ndubɔbla-ni lite-ɔ.”

¹²Amu na Boas ɔ́sɔ ɔ́su-nwu ɔnini, “Sɔsɔ na ɔdi ka ndi ƒula lɛlɔ ukyuli na ɔdi ka ntaanu-ɔ lɛlɔ, nsu ukyuli ɔdi ɔkya na ɔsɔ ude-ɔ utulo-mi.

¹³Anwuɔsu tɛ mɛni usie ɔmɛni na si kadi kégye ni, bɔdubɔwia ukyuli ɔni na ɔlɛka uti ƒula etila mmɔ kama ulu. Na si bɔ́nu-nwu na ɔ́tuna ni, na ɔdia. Nsu si útatuna lɛnɔ ni, lɛkpali Katɔti ɔni nlie ngba muusé kenye ka ndubuti ƒula etila. Anwuɔsu sɔ tɛ mɛni utédu ka kadi kégye.”

¹⁴Ɔmɛni ɔsu ɔ́sɔ ɔ́tɛ mmɔ útédu lɛdigye. Nsu úyile bɔta ɔtanta tutuutu, ɔsika Boas ulayɔ ka ukyuli ɔdi ɔti ka Rut úbatɛ mmɔ.

¹⁵Amu na Boas ɔ́su-nwu ɔnini, “Ta na egyingya ƒula kɔdi ewi kalɔ.” Amu na Rut ɔ́bla lɛni na Boas úwilimi edula ɔbla aani akyami aavlanyɔ-ene úwi-ku kemmo na únyimi-ku. Na ɔ́gyu útile-nwu ɔnii uti uteesienku kaduli.

¹⁶Amu ka Rut útéduo kaduli ni, Naomi úye-nwu ɔnini, “Ubi, dɛ na Boas ɔ́ƒɔ-ɔ?” Amu na Rut ɔ́su-nwu lɛla biala lɛni na Boas ɔ́bla úte-nwu.

¹⁷Kawɔlɔkɔ ni, ɔ́su Naomi ka Boas úwilimi edula ɔbla aani akyami aavlanyɔ-ene úte-nwu na ɔ́su-nwu ɔnii útalɛka unwini usie kaduli ku enu kplu.

¹⁸Amu na Naomi ɔ́su Rut ɔnini, “Kɛ kayi, na anu kalɛ na lɛla biala lɛdubo libavi. Ɔsika Boas ulákɛ bɔnwuna ɔmwi limeyi lɛmɛni wetédu ka ɔnu litemi lɛmmɔ lili ku lɛgba.”