Read Lelemi Samuel 1 1 Bible Online

Samuel 1 1 - Lelemi bible

Samuel 1 1

¹Kuuku ni, ɔnana ɔdi ɔ́kya na baalɔ-nwu Elkana. Ɔnana ɔmɛni ɔ́si ɔma ɔni baalɔ banii Ramataim na Eƒraim abi lɛlɔ kalɛkɛ. Na ɔ́si Suƒ ɔtɔ kemmo na Eƒraim kɔdua kemmo. Elkana ɔmɛni ɔti baalɔ Yeroham. Na ɔtieku baalɔ Elihu ɔni ndi Tohu ubidi.

²Elkana úti beleku inyɔ. Unwi baalɔ Hana na unyɔdi baalɔ Penina. Na Penina ubo bebi, nsu Hana ɔdi udinkɔ.

³Lɛkwa ndi lɛkwa ni, Elkana ɔɔsí nwuna ɔma mmɔ teesie Silo kesii kani na uusié taatákpa Unwoti Katɔti Ɔyikune Ƒui. Na mmɔ na Unwoti Katɔti bakpane inyɔ badi bákya na badi Eli bebi. Ama baalɔ Hoƒni ku Pinehas.

⁴Uwi biala si limeyi lídu ka Elkana ɔkpa Unwoti Katɔti ni, uule lɛna teete ulekudi Penina ku nwuna bebi bananabi ku belekubi ƒui.

⁵Nsu ulekudi Hana anwu ni, uute-nwu lɛna lɛni na úte bakladi akpa anyɔ, ɔsika ɔɔyɔ́-nwu geen, nsu Katɔti útete-nwu kɔwɔ.

⁶Hana tawɔ tawɔ ɔmɛni ɔsu ni, ogyulo ɔɔyɔ́-nwu kenye uwi biala kalɛ na uteewulo kɔnyana.

⁷Udu ɔmɛni nákya-ma ntɛ lɛkwa biala. Na si bésie Unwoti kakpakɔ lɛni ni, ogyulo ɔdubukpoku Hana lɛni laa utédu ka uuwulo na ɔsɔ uladi muedi.

⁸Si úbo lɛni ni, na Elkana ɔlɔ ulekudi na ɔdɔdɔ-nwu na uye-nwu ɔnini, “Hana, bi ɔsu na eewulo na anii aladi na kayi keekpóku-ɔ lɛni? Ami lɛti pɛ ńtabɔ-ɔ liiitulo si ina bebi leevu na áwɔ?”

⁹Limeyi lɛdi ka bésie Silo mmɔ na báwɔlɔ bɔdi ku bɔni ni, Hana ɔ́ta únye. Na uwi ɔmmɔ ni, Katɔti Ɔkpane Eli ulie kalɔ na kakpakɔ kayakun kenye, na liboku lɛdi lɛlɔ.

¹⁰Mmɔ ni, Hana ɔ́nu lɛlɔ na nwuna lɛlɔ lɛ́bla-nwu kɔnyana na úse kalɔ uuwulo na ɔɔkpali Katɔti ku keku.

¹¹Amu na ɔ́kpali ala úse kenye ɔnini, “O Unwoti Ɔyikune Ƒui, ƒula kabla ɔblane na ndi, nsu mina lɛlɔ libo kɔnyana. Taya na kɔnyana kɔdu-mi. Kɛ te-mi ubi ɔnanabi unwi pɛ na lɛwɔ. Na si énu-mi bɔkpali na ábla éte-mi lɛni ni, ndubɔsɔku ubi ɔmmɔ lite-ɔ kusɛ kusɛ nwuna ngba emeyi ƒui. Na ukyuli ɔdi ulékulo-nwu linwini kudii.”

¹²Ka ɔɔkpali Katɔti lɛni ku kabɛnsɛ ni, Eli unye ɔɔnu-nwu kpoo.

¹³Ɔƒɛni kabɛnsɛ ɔsu ni, nwuna lɛdi lilalɛ momoomo, nwuna enyekuli kani muubóku lɛlɔ na lɛla biala lɛɛsí-nwu kayi ku lili kemmo. Na ɔmmɔ ɔsu ni, Eli ɔ́kali ka ntɛ bɔdi mɔɔda-nwu.

¹⁴Anwuɔsu ɔ́su Hana ɔnini, “Uwi ɛlɛ sɔɔn na ntɛ bɔmmɔ bɔdubɔda-a butédu na ada ntɛ ekpila ammɔ bɔbla aya na mɛni?”

¹⁵Amu na Hana údie kenye ɔnini, “Mina ati, buvele ɔɔɔdi ntɛ mɔɔda-mi, ala muukpóku-mi kayi lɛni na anya na mɔɔká taasu Unwoti.

¹⁶Tanu ami ƒula kabla ɔblane aani uleku ukpidi ɔdi, ɔsika ala ani muukpóku-mi mmɔ ɔsu na mɔɔkpali Katɔti kalɛ na mina lɛlɔ lɛɛbla-mi kɔnyana ɔsu.”

¹⁷Mmɔ ni, Eli ɔ́su-nwu ɔnini, “Teesie ku keyi buɛɛ. Na Israel Katɔti ɔdubɔbla lɛla lɛni na aawia ute-ɔ.”

¹⁸Amu na Hana údie kenye ɔnini, “Ati, mɔɔgyá-a enu na ƒula kenye kani na ásu ɔsu. Ubo-nwu kemmo lɛni.” Na ɔ́gyu ɔ́tɔlɔ útáwia lɛla lɛdi ɔ́kya kenye na kayi káyɔ-nwu.

¹⁹Ka kadi kégye ni, Elkana ku nwuna badi ƒui báta na ka bátákpa Katɔti báwɔlɔ ni, bátɔlɔ bésie bana ɔma na Rama. Na Elkana ku ulekudi Hana bátɛ, na Unwoti anu asia-nwu lɛlɔ.

²⁰Ɔmmɔ kama ni, Hana úbada kaƒɔ na ɔ́wɔ ubi ɔnanabi. Na ɔ́sia-nwu lɛnyi ɔnii Samuel, na ɔ́su ɔnini, “Ɔsika Unwoti na lívele na únu-mi bɔkpali na úte-mi ubi ɔmmɔ.”

²¹Ka lɛkwa línwini na uwi ɔmmɔ ɔ́sɔ údu ni, Elkana ku nwuna kaduli bekyuli ƒui béti akpala na bésie batákpa Katɔti.

²²Nsu Hana anwu útasiaku-ma mmomu ɔ́su ɔgyani ɔnini, “Si ɔnamu ɔmmɔ úkulo lɛnyi ni, ndubuti-nwu lisienku Katɔti na ɔsɔ ɔkya mmɔ nwuna ngba bulie uwi ƒui.”

²³Amu na Elkana údie kenye ɔnini, “Ɔdia, awɔ ngyi lɛla lɛbuni lɛni na ɔlɛka bɔbla. Anwuɔsu bɛsɔ bɛkya kama na ada-nwu kaduɛ utédu ka úkulo lɛnyi. Mmomu buuvele bɔnii Katɔti ɔdi nwuna litemi lɛlɔ na ɔnamu ɔmmɔ lɛlɔ.” Ɔmmɔ ɔsu Hana ɔ́sɔ ɔ́kya kama na ɔ́nu ɔnamu ɔmmɔ lɛlɔ útédu ka úkulo lɛnyi.

²⁴Na ka ɔnamu ɔmmɔ úkulo lɛnyi kama ƒui ni, uni útiku-nwu blii suɛ lɛni ku ɔmantɛ akɔ ɔkɔdi ɔni náƒɔ aani akwa atɛ na bésie Unwoti kakpakɔ na Silo. Na lɛnɔ ni, úti ɔlaaƒɔ koƒo ku ntɛ ɔsii lɛnɔ ɔ́da.

²⁵Na ka bádu ebuo ɔmmɔ ni, béti ɔnamu ɔmmɔ béboku Eli kudɔ.

²⁶Mmɔ na Hana ɔ́su Eli ɔnini, “Ati, akwa alɛɛ adi návi ni, ami nébenye ƒula kudɔ mɛni lɛ́kpali Unwoti.

²⁷Na lívele-nwu nnii ute-mi ubi na lɛwɔ. Na Unwoti únu-mi bɔkpali sɔsɔ, na ɔ́ya lɛ́wɔ ubi ɔni na nda mɛni.

²⁸Ɔmɛni ɔsu ni, líti-nwu muute Unwoti na unwini nwuna ɔdi nwuna ngba bulie uwi ƒui.” Na ɔmɛni kama ni, bákpa Unwoti na mmɔ.