Read Lelemi Samuel 1 13 Bible Online

Samuel 1 13 - Lelemi bible

Samuel 1 13

¹Akwa avlaatɛ na Saul ɔ́ƒɔ asa na bése-nwu lɛga. Na ɔ́di Israel lɛlɔ akwa aavlene-anyɔ.

²Saul ɔ́ƒuna bekpone mpim ɛtɛ ɔ́siku Israel. Na bekpone mpim inyɔ basiaku-nwu na Mikmas ku Betel abi kalɛkɛ lɛlɔ. Na apim unwi basiaku ubidi Yonatan na Gibea na Benyamin kalɛkɛ lɛlɔ. Na bekpone bakladi bani ƒui nébu ni, Saul ɔ́ya na bátɔlɔ bésie bana kɔduli.

³Amu na limeyi lɛdi ni, Yonatan útéyu Ƒilistiƒuɔ ɔ́tu na útékpoku-ma na kesii kani baalɔ Geba. Na kɔku kɔmmɔ kúwi Ƒilistiƒuɔ bakladi bani nkya ekpo bamba. Lɛni kani na Saul lɛnɔ únu kɔku kɔmɛni, na ɔ́ya na bávwi kakpɛɛ bávi Hebriƒuɔ lɛma ƒui kemmo ka basala lɛlɔ na betékpo.

⁴Ɔmmɔ ɔsu na Israel lɛma kemmo ƒui ni, bekyuli bammɔ bénu ka Saul ɔ́di Ƒilistiƒuɔ kakɛ kadi lɛlɔ. Na bagyi lɛnɔ ka Ƒilistiƒuɔ beekisi Israelƒuɔ geen. Anwuɔsu bálɔ bekyuli bammɔ ka besie batásiaku Saul na Gilgal.

⁵Na uwi ɔmmɔ kani lɛlɔ ni, Ƒilistiƒuɔ básala lɛlɔ ka bekpoku Israelƒuɔ. Na bebo bapɔnkɔ kɛɛkɛ mpim ɛtɛ lɛni kemmo na bekpone mpim ɛku beli. Na ɔmmɔ kama ni, Ƒilistiƒuɔ bekpone pii bamba badi lɛnɔ bakya. Na bemomo geen aani ɛpu kɔnwinimi na ɛpu kɔtu ɔni na ukyuli ɔdi ulakana-ma bɔka. Na bana ƒui bátɔlɔ bésie Mikmas na bátada keliekɔ na mmɔ na Bet-Awen ɔƒɛ katukɔ kakɛ.

⁶Ka Israelƒuɔ bánu ka bana kenyekɔ kaaadia na baabɔku bana bekpone bammɔ geen ɔsu ni, ketulodikɔ bábɛ. Na badi bábɛ na atakpɛ libu kemmo ku abiɔ akukudi ku libu lɛnɔ kemmo.

⁷Israelƒuɔ bammɔ badi muedi bávia Yordan Ketu bonwu kammɔ bésie Gad ku Gilead kalɛkɛ. Na Saul ku bekpone báƒɔ lɛlɔ bakya Gilgal ɔni na liƒu lɛɛda-ma na lɛlɔ lɛɛtɔ́-ma geen.

⁸Na Samuel anwu ni, ɔ́su Saul ka emeyi maatɛ kama asa na ɔdububo. Nsu emeyi maatɛ ammɔ áavi na Samuel útebeduo tɔ Gilgal. Ɔmmɔ ɔsu Saul bekpone bése kalɔ baatɔlɔ-nwu kudɔ unwi unwi.

⁹Anwuɔsu Saul ɔ́su ɔnini, “Biti bɔkyula akpala ebuo ku unwi bɔbla akpala ebuo ɔmmɔ biboku.” Amu na Saul ɔ́du bebuo bammɔ na anwu ɔlati ɔ́bla akpala ammɔ.

¹⁰Na uwi ɔni kani na ɔ́wɔlɔ akpala ammɔ bɔbla kani na Samuel lɛnɔ úbeduo. Mmɔ na Saul úte-nwu eduo.

¹¹Mmɔ kani ni, Samuel úye-nwu ɔnini, “Bi ndi lɛla lɛni na ábla mɛni?” Amu na Saul údie kenye ɔnini, “Lɛ́nu ka banana bammɔ beegyingya. Na lɛnɔ ni, étebeduo uwi ɔni na ése lɛlɔ, na Ƒilistiƒuɔ badaku lɛlɔ bɔsala na Mikmas.

¹²Anwuɔsu lɛ́bla kasusu ka Ƒilistiƒuɔ bammɔ badubɔta banii bebekpoku-mi na Gilgal uwi ɔni na ngyi ka ńtakpali tɔ Unwoti ka ubebunku-mi. Ɔmmɔ ɔsu na lɛ́bla akpala ammɔ.”

¹³Amu na Samuel ɔ́su Saul ɔnini, “Adɔlɔla geen na adi na ábla mɛni. Bi ɔsu na átadi Unwoti etemila lɛlɔ. Si banii bɔdi na ádi nwuna etemila lɛlɔ ni, nka Unwoti ɔdubɔya na awɔ ku ƒula kaba kemmo bebi bɛdi lɛga na Israelƒuɔ lɛlɔ uwi ƒui.

¹⁴Nsu ɔƒaani ni, ƒula lɛgadi lɛsɔ lilenye uwi ƒui. Ɔsika Unwoti ɔ́ɔƒuna ukyuli bamba ɔni na nwuna kayi kaayɔ́ ka ɔtɔnku nwuna kadi bekyuli. Ɔsika awɔ átadi nwuna ɔda bubo lɛlɔ.”

¹⁵Ɔmmɔ kama ni, Samuel ɔ́yu ulu na ɔ́tɔlɔ Gilgal mmɔ. Na Saul ku bekpone bani nébu basiaku-nwu bátɔlɔ Gilgal mmɔ bésie bátásiaku nwuna bekpone bakladi na Gibea na Benyamin kalɛkɛ lɛlɔ. Na Saul ɔ́ka nwuna bekpone bani nébu basiaku-nwu. Na bana bumomo bɔbla aani nkyuli eti leevu-anyɔ kani.

¹⁶Saul ku ubidi Yonatan ku bana bekpone báda keliekɔ na Geba na Benyamin kalɛkɛ mmɔ. Na Ƒilistiƒuɔ bekpone ama bakya Mikmas.

¹⁷Ɔƒɛni uwi uwi ni, Ƒilistiƒuɔ bekpone aani akpa atɛ baalɛ́ teesie teetékpoku bekyuli na bana lɛma na beƒie-ma ala baƒɔ. Lɛkpa lideedi lɛɛsia teesie Oƒra ɔma unengudi na kalɛkɛ kani baalɔ Sual lɛlɔ.

¹⁸Na linyɔdi liti lisie Bet-Horon. Na lɛkpa lɛtɛdi lɛsia ɔmii lɛlɔ kalɔ kesii kani na si enye ni, na aanu Seboim Kɔwɛ teemene kesii kani mɔɔtina kalɔ kakwiidi kakɛ.

¹⁹Na uwi ɔmmɔ kemmo ni, ala bakywɛne badi beeebo Israel kalɔ lɛlɔ kesii kadi, ɔsika Ƒilistiƒuɔ bétete-ma kuƒi. Na básu banii, “Si búte-ma kuƒi ni, Hebriƒuɔ bamɛni badubo kuwii ku atula bɔkywɛ bute lɛlɔ!”

²⁰Ɔmmɔ ɔsu ni, Ƒilistiƒuɔ lɛma kemmo na Israelƒuɔ beesié taatádɔ bana katuma abuala aani oloma ku anwami ku asaka.

²¹Na baakya-ma kayu aani kaplɛ si bádɔ abuala ebliidi. Nsu si bádɔ abuala enengudi anya ni, na baaƒɔ́ kɔplɛ inyɔ.

²²Ɔmmɔ ɔsu ni, uwi ɔni na Ƒilistiƒuɔ ku Israelƒuɔ békpo ni, Saul ku ubidi Yonatan kani nda kuwii ku atula.

²³Na Ƒilistiƒuɔ bekpone badi bésie bátágyumana abi atɛ ulu ɔni ntɛ úsie Mikmas.