Read Lelemi Samuel 1 15 Bible Online

Samuel 1 15 - Lelemi bible

Samuel 1 15

¹Na uwi ɔmmɔ kemmo ni, Samuel ɔ́su Saul ɔnini, “Ami na Unwoti ɔ́tala na ḿbese-ɔ likpo na énwini ɔga éte mina kadi bekyuli Israelƒuɔ. Na ɔƒaani ni, nu kenye kani nási Unwoti kudɔ.

²Unwoti Ɔyikune Ƒui ɔnini, ‘Ndubo Amalekƒuɔ kɔtu bɔni na lɛla lɛni na bábla Israelƒuɔ ɔni na béténye báda-ma ulu uwi ɔni na bási baalɛ́ Egyipte kalɔ kemmo ɔsu.

³Anwuɔsu sie na etékpoku-ma na ayila-ma lɛla biala na bebo udu. Tanu ɔdi biala kɔnyana. Banana ku beleku ku banamu ku bebiwɔ ku ɔmantɛ bakɔ ku baƒonu ku bebuo ala betine bani mbo keƒu ku baƒlumu ƒui, na tebu ɔdi tese.’ ”

⁴Ɔmmɔ ɔsu Saul ɔ́lɔ nwuna bekpone ɔ́siku kesii biala na bátásala na ɔma ɔni baalɔ banii Telaim kemmo. Na bebo bekpone mpim eti ene. Na bana mpim leevu bási Yuda kalɛkɛ lɛlɔ.

⁵Amu na Saul útiku bekpone bammɔ na bésie Amalek ɔma unengudi bátábɛ na ketu kakwiidi kadi kemmo.

⁶Na ɔ́su Keni kadi bekyuli bani nkya mmɔ ɔnini, “Uwi ɔni na Israelƒuɔ ƒui bási baalɛ́ Egyipte kalɔ lɛlɔ ni, amii bítekpoku-bu, mmomu bɛ́nu-bu kɔnyana. Anwuɔsu bɛkpɛ bɛlɛ-ma lɛlɔ kalɛ na naaadu-mii neeebunku Amalekƒuɔ.” Ɔmmɔ ɔsu Keniƒuɔ bammɔ báta Amalekƒuɔ kudɔ mmɔ bésie kesii bamba.

⁷Ɔmmɔ kama ni, Saul úkpoku Amalekƒuɔ ɔ́si ɔma ani baalɔ Hawila útédu Sur na Egyipte ɔƒɛ katukɔ kakɛ.

⁸Saul úƒie Amalekƒuɔ Ɔga Agag, nsu útadu-nwu. Mmomu nwuna kadi bekyuli ƒui ama ɔ́du-ma.

⁹Saul ku nwuna bekpone béni na bátadu Ɔga Agag ku baƒonu ku ɔmantɛ bakɔ ku bana bebi bani na bánu ka bélie lɛmwi kaduɛ mmɔ ƒui ku ala bamba ani lɛnɔ na bánu ka adia-ma. Na akladi ani ƒui naaadia-ma ni, báyila-nya udu.

¹⁰Amu na Unwoti kenye kébedu Samuel kudɔ ɔnini,

¹¹“Úduo-mi geen ka lɛ́ya na Saul ɔ́di lɛga, ɔsika únwini kama ɔ́kya-mi na útadi mina kenye kani na lɛ́su-nwu lɛlɔ.” Lɛla lɛmɛni líkpoku Samuel geen, anwuɔsu útalɛɛ, mmomu ɔkya ɔɔkpali Katɔti teevele usien umodi ɔmmɔ.

¹²Kadi kégye ɔtanta tutuutu ni, Samuel ɔ́ta na úsie utánu Saul. Nsu ka úsie ni, básu-nwu banini, “Saul úsie kesii kani baalɔ banii Karmel. Mmɔ na útátu enyimo lɛtabi lɛdi únyene úte lɛlɔ kalɛ na bekyuli bataakali taanu kalɛ na úkpo ɔ́di lɛlɔ na bataabu-nwu. Ɔmmɔ kama na únwini úsie Gilgal.”

¹³Ka Samuel útásiaku-nwu ni, Saul náka-nwu kenye bɔkya ɔnini, “Katɔti kusɛ kusɛ ɔsiaku-ɔ, ɔsika lísie ńtábla lɛla lɛni na ásu-mi.”

¹⁴Nsu Samuel ɔ́ƒɔ kɔnakunwi na úye-nwu ɔnini, “Na baƒonu ku ɔmantɛ bakɔ bamani kɔvanu na muunú na mɛni?”

¹⁵Amu na Saul údie kenye ɔnini, “Bekpone bammɔ néti-ma básiku Amalek kalɔ lɛlɔ béboku na badi baƒonu ku ɔmantɛ bakɔ babuni ƒui na bana akɔ ka beti babakpa bete Katɔti, na bakladi ƒui ama báyila-ma udu.”

¹⁶Mmɔ na Samuel ɔ́su-nwu ɔnini, “Ba lɛsɛ! Na enu lɛla lɛni na Unwoti ɔ́su-mi kamaadi usien.” Amu na Saul lɛnɔ ɔ́ƒɔ ɔnini, “Taasu kenye kammɔ.”

¹⁷Mmɔ na Samuel úsie anumi ɔnini, “Uwi ɔni na awɔ ɔlati muedi átanu tɔ lɛlɔ átati ka adi lɛla lɛdi ni, Unwoti úse-ɔ likpo na énwini ɔga na Israel kadi bekyuli adua pii ammɔ ƒui lɛlɔ.

¹⁸Na Unwoti ɔmmɔ nátala-a ɔnini, ‘Sie na etékpoku Amalekƒuɔ belikplune bammɔ utédu ka áyila-ma udu ƒui kede kede.’

¹⁹Bi ɔsu na étenu Unwoti kenye na adi-ka lɛlɔ? Na bi ɔsu na bana ala kani négyie-ɔ anumi ka eƒie aƒɔ na ábla likpidi lɛmɛni udu na Unwoti anumi?”

²⁰Nsu Saul ɔ́sɔ ɔ́su ɔnini, “Lísie ńtábla lɛla lɛni na Unwoti ɔ́su-mi na lɛ́du Amalekƒuɔ ƒui na líƒie bana Ɔga Agag líboku.

²¹Bekpone bammɔ néƒie baƒonu ku ɔmantɛ bakɔ bani ndia ntulo ƒui, na bana akɔ béboku ka beti bakpa bete Katɔti na Gilgal.”

²²Nsu Samuel údie kenye ɔnini, “Akpala na Unwoti ɔɔwia ɔnii bakyula bete-nwu, munuu nwuna litemi lɛlɔ na ɔɔwia ka bekyuli badi? Si eenú-nwu litemi na aadi-ni lɛlɔ ni, ɔdia utulo ka eti akpala iye baƒonu lɛmwi akpa ete-nwu.

²³Ɔsika si elenu Unwoti litemi na adi-ni lɛlɔ mmomu aatalaku lɛlɔ katɔ na ƒula likyulikpi ɔsu ni, átavumanaku bekyuli bani mɔɔkpá baƒiɔ na beeye-ma ala teenu. Na ka éni Unwoti litemi ɔsu ni, anwu lɛnɔ úni-ɔ ka asɔ adi ɔga na nwuna bekyuli lɛlɔ.”

²⁴Mmɔ na Saul ɔ́su Samuel ɔnini, “Lɛ́bla likpidi lɛ́ƒiɔ Unwoti na lɛ́ta línye nwuna litemi lɛlɔ. Na ńtenu ƒula bɔlɛ, ɔsika lɛ́yia bekyuli bammɔ mmomu, na línu-ma litemi.

²⁵Anwuɔsu líkpi kɔtɔ. Ti kyiɛ-mi na asɔ enwini abasiaku-mi na busie ntákya lili kalɔ lite Unwoti.”

²⁶Nsu Samuel úni na ɔ́su-nwu ɔnini, “Nsɔ lɛɛɛdubo bunwini bubasiaku-ɔ, ɔsika éni ka adi Unwoti litemi lɛlɔ, anwuɔsu Unwoti lɛnɔ úni ka awɔ asɔ adi nwuna ɔga na Israel lɛlɔ!”

²⁷Mmɔ ka Samuel únwini ɔɔtɔlɔ ni, Saul ɔ́da-nwu awu kɔtu na mmɔ kábwɛ.

²⁸Amu na Samuel ɔ́su-nwu ɔnini, “Unwoti ɔ́bwɛ Israelƒuɔ lɛga kadikɔ ɔ́lɛku-ɔ lɛkɔkɔ. Na úti-ka úte ƒula badi bammɔ akɔ ɔdi. Na ɔdi ukyuli ɔni na ɔdia utulo-ɔ ƒui.

²⁹Ɔƒɛni ni, Unwoti ɔɔɔdi ukyuli ɔyawine ɔni na muunwíni nwuna kasusu. Mmomu Israel Katɔti ɔni muukeye na ɔdi, na ɔɔsu litemi geen lɛmmɔ na ulányi ɔkɔ. Anwuɔsu ɔsɔ ulavumana kenye kammɔ.”

³⁰Mmɔ na Saul ɔnini, “Lɛ́bla likpidi sɔsɔ, nsu te-mi ɔbu na mina bekpone ku Israel kadi bekyuli bammɔ ƒui anumi, na abasiaku-mi na lɛsɔ ntákya lili kalɔ lite Unwoti, ƒula Katɔti.”

³¹Anwuɔsu Samuel ɔ́sɔ únwini ɔ́siaku Saul na ɔ́kya lili kalɔ úte Unwoti.

³²Mmɔ na Samuel ɔ́kpali momoomo ɔnini, “Bɛkpanku Amalekƒuɔ Ɔga Agag biboku-mi mɛni.” Na Agag lɛnɔ úsie úbo-nwu kudɔ ku kayi ƒaa, na ɔ́bla kasusu ɔnii uwi ɔni na basɔ badu-nwu ɔ́vi.

³³Nsu Samuel ɔ́su-nwu ɔnini, “Kalɛ na ƒula kewii káya na beleku badi bakya na basɔ balanu bana kaƒɔ bebi ni, lɛni na ƒ'ini lɛnɔ ɔdubo bɔkya beleku bamba akɔ na ɔsɔ ulanu nwuna kɔƒɔ ubi.” Mmɔ kani na Samuel ɔ́du Agag na Unwoti anumi na Gilgal.

³⁴Ɔmmɔ kama ni, Samuel ɔ́tɔlɔ úsie Rama. Nsu Saul anwu ɔ́tɔlɔ úsie nwuna ɔma na Gilgal.

³⁵Na ɔ́si ɔmmɔ lɛlɔ útédu limeyi lɛni na Samuel úkpi ni, ɔ́sɔ útésie útatánu Saul kudii, ina ka Saul lɛlɔ litemi líkpoku-nwu na úwulo-nwu kɔnyana. Na úduo Katɔti lɛnɔ ka úse Saul lɛga úte Israelƒuɔ.