Read Lelemi Samuel 1 2 Bible Online

Samuel 1 2 - Lelemi bible

Samuel 1 2

¹Amu na Hana ɔ́kpali Unwoti na ɔ́su-nwu ɔnini, “Kayi kaayɔ́-mi geen na Unwoti lɛlɔ. Ɔsika Katɔti ɔ́ya na mina lili lɛ́kɔ lɛ́lɛ katɔ ƒui aani ebuo lise. Na mɔɔkun lɛmɛnɛ na mina bekisine ɔsu. Ɔsika ebiti geen aada-mi ka údie-mi mina bekisine enu kemmo.

²Ukyuli ɔdi uuuse kedee aani awɔ Unwoti kalɛ. Na ɔdi lɛnɔ uuubunku-ɔ. Na lɛtakpɛ bonwu lɛdi liiibo na lɛdi kama kekpokɔ aani awɔ bula Katɔti.

³Amii bani muukú lɛlɔ ni, bɛda bina lɛlɔ buku ku asula bɛya. Ɔsika Unwoti ndi Katɔti ɔni ngyi lɛla biala. Na ɔɔkɔ́ku ablala ƒui taanu.

⁴Anwu mɔɔƒɛ bekpone kɔtaminta. Nsu ɔɔkya bani na lɛlɔ lɛ́bla kpɛtɛ kpɛtɛ ɔkplu.

⁵Bani na ala ása ese-ma na baadi teemo ni, ama muusé lɛlɔ ɔkpa asa baakɛ́ lɛdila. Nsu bani nátaatɛ kɔka ni, ama mɔɔdi teemo ɔƒɛni. Na udinkɔ nábawɔ bebi maatɛ. Nsu uwele ɔni na ubo bebi pii ɔyila nwuna bebi ƒui.

⁶Unwoti mɔɔyá na ukyuli uukpi na anwu kani mɔɔyá na ukyuli uulie ngba. Anwu mɔɔyá bekyuli beeduo kekpine. Na anwu kani mɔɔgyila-ma taasiku kekpine.

⁷Unwoti muute lɛkɛ. Na anwu kani mɔɔyá kɔwaba kɔɔda ukyuli. Anwu mɔɔkɔliku ukyuli katɔ. Na anwu kani muuboku ukyuli kalɔ.

⁸Anwu mɔɔtalaku bawabane katɔ na baalɛ́ ɔtumu akɔ, na bani mɔɔyaki ala mmɔ baata ntɔ kewikɔ, na beelie kuliekɔ kunengudi kɔni bagabi beelie. Unwoti nése kalɔ kammɔ ƒui lɛtabi ɔka kalɔ. Na nwuna lɛlɔ na ɔ́tu kayawi ƒui ɔ́lɛ na kadi nwuna kadi.

⁹Ɔdubɔgyumana nwuna bekyuli kedee ƒui na bana kɔvinkɔ. Nsu balalane ni, badubo bɔyi bɔkya lɛdisa kemmo na bayii ku udu. Ukyuli ulélie ngba ɔkɛnku anwu ɔlati ɔyikun lɛlɔ.

¹⁰Na bani muukpóku Unwoti ni, ɔdubɔkɔ-ma lɛlɔ ɔvi na babwɛ kpɛtɛ kpɛtɛ. Na kayaa kadubɔbwɛ ogya kebewi-ma lɛlɔ. Unwoti ɔdubɔtɛku bayawine ƒui litemi utédu kalɔ kammɔ ƒui kawɔkɔ. Ɔga ɔni na úse ni, ɔdubɔkya-nwu ɔyikun na ɔya na nwuna lili lɛlɛ aani ebuo lise. Ɔsika anwu na úwi nnɔmii lili úse likpo.”

¹¹Ɔmmɔ kama ni, Elkana únwini úsie nwuna ɔma na Rama. Na ubidi ɔnanabi ɔmmɔ ɔ́sɔ ɔ́kya Eli kudɔ na Katɔti kakpakɔ mmɔ útaabla kabla.

¹²Eli bebi bani ndi bakpane mɛni badi bekyuli bekpidi geen. Na balábu Unwoti lɛnɔ munu munu.

¹³Ɔƒɛni bana ɔbladu ukpidi ɔmmɔ úbenwini-ma udu. Na si ukyuli ɔdi úboku ebuo ɔnii ubakpa na lɛna lɛmmɔ lɛsia ogya lɛlɔ ni, na baatala bana kabla ɔblane ɔdi na uti ɔvili ɔni mbo atula atɛ ɔda.

¹⁴Kabla ɔblane ɔmmɔ uuti ɔvili ɔmmɔ na ubatu lɛna lɛni nsia ogya mmɔ lɛdi udie na libui kemmo. Na ɔkpane ɔmmɔ lɛnɔ ɔƒɔ-ni. Na lɛni kani na baabla ku Israelni biala ɔni nébo Silo mmɔ.

¹⁵Na ɔƒaani ni, lɛmwi lɛmmɔ muedi asa na badubɔkyula-ni ni, kabla ɔblane ɔmmɔ uubo na ubasu ukyuli ɔni mɔɔbla akpala ammɔ ɔnini, “Bite ɔkpane nwuna lɛna na ɔgyi, ɔsika ulawia ka buƒulo nwuna lɛna mmomu ɔɔwia-ni ɔwɔdi.”

¹⁶Uwi pii si úbo lɛni ni, bɔsu na bekyuli bammɔ baasu banii kabla ɔblane ɔmmɔ ɔlati udie lɛni na ɔɔyɔ́. Mmomu ɔya na baka-ni buti bɔkpa bute Unwoti asa. Nsu kabla ɔblane ɔmmɔ ɔɔsu-ma ɔnini, “Oowo, na si bitenu-mi kalɔ bɔdi ni, ndubudie lɛni mɔɔyɔ́ ɔkplu kemmo.”

¹⁷Eli bebi bamɛni beléte Unwoti akpala ɔbu ɔdi ɔni na bana likpidi lɛmɛni lɛdi bɔƒiɔ bunengudi geen na Unwoti anumi.

¹⁸Nsu uwi ɔmmɔ ƒui ni, na ubi Samuel ɔkya Katɔti kakpakɔ mmɔ ɔɔbla nwuna kabla. Na ɔkya bakpane awu ɔƒualadi kedee.

¹⁹Na lɛkwa ndi lɛkwa ni, uni uudí awu bamba teesienku-nwu si uwi ɔni na anwu ku ɔgyani bésela batábla lɛkwa akpala.

²⁰Na Eli uute Elkana ku ulekudi kusɛ kusɛ. Na ɔɔsu-ma ɔnini, “Unwoti ute-mii bebi bamba na bɛwɔ, na ama benye udeedi kenye ka anwu na ƒ'ulekudi úvele Unwoti na úte-nwu, na ɔ́sɔku-nwu úte Unwoti.” Na ɔmmɔ kama ni, baasɔ teenwini teesie bana ɔma.

²¹Unwoti ɔ́bla Hana lɛƒɔndia sɔsɔ na ɔsɔ úbada kaƒɔ na ɔ́wɔ bebi bananabi ɛtɛ ku belekubi inyɔ. Na uwi ɔmmɔ kemmo ni, Katɔti anumi ásia Samuel lɛlɔ na ɔ́lɛ lili geen na kakpakɔ mmɔ.

²²Na Eli lɛnɔ ɔ́ɔbi geen na uunú lɛnɔ kalɛ na nwuna bebi bamɛni baabla Israel kadi bekyuli ƒui. Na Adi Kevo kani kemmo baasiáku Katɔti kenye, baatɛnku beleku bani mɔɔbla kabla mmɔ.

²³Anwuɔsu úye-ma ɔnini, “Bi ɔsu na bɛɛbla Israel kadi bekyuli ƒui udu ukpidi ala ani na muunú taasiku-mi lɛlɔ mɛni udu?

²⁴Oowo! Mina bebi, ńtatunaku-mii. Unwoti bekyuli bamɛni beledie-mi kenye buni kadi.

²⁵Si ukyuli ɔdi ɔ́bla nwuna ɔkpana lɛla lɛdi ni, Katɔti ɔɔkana na ɔɔklibi bana ntɛ litemi na unwi bɔbla bubo. Nsu si Unwoti ɔmmɔ ɔlati na áƒiɔ bɔƒiɔ bonwu bɔdi udu ni, ɔma ndubɔkana awɔ ku Unwoti ntɛ buduo na uvele ute-ɔ?” Nsu ɔmɛni ƒui ni, bebi bammɔ bétenu bana ɔti bɔdɔnku ku bɔlɛ. Ɔsika Unwoti ɔ́ɔlɛ ugyii ka ɔyila-ma udu.

²⁶Na uwi ɔmmɔ kemmo ƒui ni, Samuel ɔɔlɛ́ lili geen na nwuna lɛlɔ lɛɛda Unwoti ku bekyuli bammɔ ƒui ebiti.

²⁷Limeyi lɛdi ni, Katɔti kenye Udiene ɔdi úbo Eli kudɔ na úbasu-nwu ɔnini, “Se atu na enu lɛla lɛni na Unwoti ɔnii mbeye-ɔ. Ɔɔsu ɔnini, ‘Ɔɔɔdi ami nédie lɛlɔ lɛtina ƒula bati kuuku kaduli bekyuli uwi ɔni na bákya Egyipte kalɔ lɛlɔ na Ɔga Ƒarao kalɔ yoo?

²⁸Ƒ'ɔti kaba kemmo bekyuli na lɛ́ƒuna na atɔƒi bamba ƒui akɔ na Israel. Na ama kani ndubusie mina lɛkpabi lɛlɔ na bakyula oloƒui bete-mi. Na bakya bakpane awu asa benye-mi anumi bataabla-mi kabla. Na ama kani na líti bɔkyula akpala ani na Israelƒuɔ béboku kadikɔ líte.

²⁹Na etela ku akpala ani na béti béboku-mi aani kalɛ na lɛ́tina ka babla na mina keliekɔ ni, bi ɔsu na bɛɛyá na eesé lɛlɔ? Na bi ɔsu na aabu ƒula bebi teetulo-mi, na bíti mina bekyuli bammɔ etela ku akpala ammɔ kɔdikɔ kɔbuni ƒui bínwini amii kɔdi na bílie lɛmwi?’

³⁰“Anwuɔsu Unwoti ɔni ndi Israelƒuɔ Katɔti ɔnini, ‘Lɛ́lɛ ugyii ka ƒula kaduli ku ƒ'ɔti kaduli bekyuli kani ndubunye-mi anumi butaabla-mi kabla uwi ƒui.’ Nsu ɔƒɛni ni, Unwoti ɔɔsu ka ɔmmɔ ɔsɔ ɔɔɔdubo buse lɛni. Mmomu ukyuli ɔni mɔɔbu-mi ni, ami lɛnɔ ndubo-nwu bɔbu. Nsu ukyuli ɔni naaabu-mi ni, ami lɛnɔ lɛɛɛdubo-nwu bɔbu.

³¹Uwi ɔdi ɔdubo ɔni na ndubɔya na awɔ ku ƒula ɔtɔ kemmo bekyuli ngba bɔda liku ɔni na basɔ baaadubo unengu ɔdi bɔkɛ na bina kaduli kemmo. Na bina ɔyikun lɛnɔ ɔdubɔyii udu.

³²Na ɔgbankpi ɔdubo bina ɔtɔ kemmo bekyuli bɔsiaku ina ka ndubɔya na kusɛ kusɛ pii ɔsiaku Israelƒuɔ. Nsu amii bina ɔtɔ kemmo bekyuli ama ni, basɔ baaadubo unengu ɔdi bɔkɛ.

³³Na ina lɛ́ya na bina akɔ ɔdi únwini ɔkpane na mina lɛkpabi lɛlɔ ni, ɔdubɔya na imii sɔɔn bɔƒɔ-mii anumi na ala eteekpoku-mii. Na bina ɔtɔ kemmo bekyuli ƒui ni, bana lɛkloƒu uwi kani na badubo buteekpi.

³⁴“Na lɛla lɛni ndubɔlɛku ƒula bebi Hoƒni ku Pinehas ni, anwu na adubuti ati lɛla lɛni na mɔɔsu-ɔ mɛni. Bana inyɔ badubo bukpi limeyi linwi.

³⁵Na ndubudie ɔkpane bamba ɔni mabla mina kayi ku kasusu lɛyɔla. Ndubɔya na nwuna ɔtɔ kemmo bekyuli benye kpakplaa na ɔbla-mi kabla uwi biala uti ubunku ɔga ɔni na lɛ́ƒuna.

³⁶Na ukyuli biala ɔni mebu na ƒula ɔtɔ kaba bebi akɔ ni, mina ɔkpane ɔmɛni na ɔdububo ubakya lili kalɔ ute na uvele-nwu sika iye bodobodo asa wakɛ lɛdila. Na ɔdubuvele ka ɔya na ɔkɛ ɔkpane kabla kadi utaabla kalɛ limeyi lɛdila ani lɛsɔ lilabɔ-nwu.”