Read Lelemi Samuel 1 28 Bible Online

Samuel 1 28 - Lelemi bible

Samuel 1 28

¹Na uwi ɔmmɔ kemmo ni, Ƒilistiƒuɔ básala bana bekpone ka besie betékpoku Israelƒuɔ. Anwuɔsu Ɔga Akis ɔ́su Dawid ɔnini, “Ɔbla-a nwaa ka ɔdi ka awɔ ku ƒula bekyuli binyeku-bu na bukpoku Israelƒuɔ.”

²Dawid údie kenye ɔnini, “Mɛni na adubɔnu lɛla lɛni na ƒula kabla ɔblane ɔdubɔkana bɔbla.” Amu na Ɔga Akis ɔnini, “Ɔdia, amu ndubuti-ɔ lɛbla ami ɔlati ɔgyumanane mina ngba uwi ƒui.”

³Na uwi ɔmmɔ ƒui kemmo ni, Samuel úukpi, na Israel kadi bekyuli béewulo-nwu báva na anwu ɔlati nwuna ɔma na Rama. Na like bebone ku bani ƒui mɔɔkpali bekpine taatɛmiku-ma ni, Saul ɔ́bɔku-ma na kalɔ kammɔ ƒui lɛlɔ.

⁴Ɔƒɛni Ƒilistiƒuɔ bekpone báasala lɛlɔ na bábla keliekɔ na kesii kani baalɔ banii Sunem. Na Ɔga Saul lɛnɔ ɔ́sala Israelƒuɔ na bábla keliekɔ na kesii kani baalɔ Gilboa.

⁵Ka Saul ɔ́nu Ƒilistiƒuɔ bekpone ni, liƒu lɛ́da-nwu na ɔ́yia geen.

⁶Anwuɔsu úye Unwoti lɛla lɛni na ɔlɛka ɔbla, nsu Unwoti útakpete-nwu na udie lɛla lɛdi ɔtina-nwu na kɔna kemmo iye ɔsia ɔkpane ɔdi lɛlɔ iye kenye udiene ɔdi lɛlɔ na ɔsu-nwu lɛla lɛdi.

⁷Amu na Saul ɔ́su nwuna benengu bani nsiaku-nwu ɔnini, “Bɛwia beleku bani mɔɔkpali bekpine mmɔ ɔdi na lisie-nwu kudɔ ntéye-nwu linu lɛla lɛni ndubo bɔlɛ.” Mmɔ na nwuna benengu bammɔ básu-nwu banini, “Ɔdi ɔkya ɔma ɔni baalɔ banii Endor.”

⁸Usien ɔmmɔ ni, Saul ɔ́da lɛlɔ kalɛ na ukyuli ɔdi ulanu-nwu uláti, na anwu ku nkyuli inyɔ bésie uleku ɔmmɔ kudɔ na útásu-nwu ɔnini, “Kpali ukpine ɔni lɛnyi na ndubɔlɔ te-mi, na aya na ɔlɛ ubo.”

⁹Amu na uleku ɔmmɔ údie kenye ɔnini, “Bɛgyi ka Ɔga Saul ɔ́bɔku bekpine bɔkpali ku like bebone ku bani ƒui mɔɔbla ala ammɔ udu údie kalɔ kamɛni lɛlɔ. Na bi ɔsu na bɛɛyɔ́ bɛkya-mi litemi kemmo, na bɛɛkywɛ-mi kakpagyuɛ bɛnii ntaakpali bekpine teete-mi?”

¹⁰Mmɔ na Saul ɔ́kpali ala úse uleku ɔmmɔ kenye ɔnini, “Na Unwoti anumi mɛni ni, mɔɔsu-ɔ nnii ukyuli biala uláni-ɔ kɔtu kɔdi na ɔmɛni ɔsu.”

¹¹Amu na uleku ɔmmɔ úye-nwu ɔnini, “Ɔma na bɛɛwia ka lɛkpali lite-mii?” Mmɔ na Saul ɔnini, “Lɔ Samuel ukpine te-bu.”

¹²Ka uleku ɔmmɔ ɔ́nu Samuel ukpine kani na ɔ́va ku lɛdi momoomo na ɔ́su Saul ɔnini, “Bi ɔsu na átɔlɔ-mi lɛni? Awɔ Saul na ɔdi!”

¹³Amu na Saul ɔ́su-nwu ɔnini, “Awɔ tayia. Su-mi lɛla lɛni na aanu kani.” Mmɔ na uleku ɔmmɔ údie kenye ɔnini, “Mɔɔnu ka kɔyu kɔdi kɔ́si kɔɔlɛ́ kalɔ kemmo.”

¹⁴Saul úye-nwu ɔnini, “Dɛ na ukyuli ɔmmɔ use?” Amu na uleku ɔmmɔ ɔnini, “Ukyuli ɔmmɔ ɔɔtina aani unengu ɔni náabi lɛlɔ na ɔkya awu gyɔlɔɔ.” Mmɔ kani na Saul ɔ́ti ka Samuel na ɔdi mmɔ. Na uboku lili kalɔ buɛɛ.

¹⁵Amu na Samuel úye-ma ɔnini, “Bi ɔsu na biléte-mi bɔtɛ kpoo na bɛɛkpali-mi lɛni?” Mmɔ na Saul ɔnini, “Ala eekpóku-mi geen ɔni na ɔɔɔdia. Ƒilistiƒuɔ báta banii bebekpoku-mi, nsu Unwoti únwini kama ɔ́kya-mi ɔni na ɔsɔ ulakpete-mi ɔkɛnku nwuna Kenye Udiene ɔdi lɛlɔ iye ina kɔna bugye kemmo muedi. Anwuɔsu na lɛ́kɔ-ɔ lɛlɔ na atina-mi kalɛ na lɛbla.”

¹⁶Amu na Samuel údie kenye ɔnini, “Si ánu ka Unwoti únwini kama ɔ́kya-a na únwini ƒula ukisine ɔƒɛni amu ni, teye ami lɛla lɛni na adubo bɔbla.

¹⁷Lɛ́ɛsu-ɔ ka Unwoti úse kenye ka ɔdubo ƒula lɛga bɔƒɔ bɔsiku ƒula enu kemmo bute Dawid, na ɔmmɔ geen na Unwoti unye ɔɔbla ɔƒaani!

¹⁸Ɔsika uwi ɔni na Unwoti úti kɔnyi ɔ́kya Amalekƒuɔ na ɔ́tala-a ɔnii tádu-ma ni, átadi nwuna litemi lɛlɔ. Ɔmmɔ ɔsu na Unwoti ɔ́bla-a lɛni ɔmwi.

¹⁹Unwoti ɔdubɔya na Ƒilistiƒuɔ badi awɔ ku Israelƒuɔ bekpone ƒui lɛlɔ. Na ɔdubuti bina kalɔ ute-ma. Na kɔnaadi lɛti pɛ awɔ ku ƒula badi bɛdubo bibeduo-mi kudɔ na kekpine mɛni.”

²⁰Ka Saul únu kenye kammɔ kani na úbuli útébi kalɔ na ɔtɛ kpoo, ɔsika liƒu líƒie-nwu na Samuel etemila ani na ɔ́su-nwu ɔsu. Na ɔyikun ɔ́sa-nwu, ɔsika usien ku ɔƒɛ ɔmmɔ ƒui útakya tɔ lɛla lɛdi kenye.

²¹Uwi ɔni na uleku ɔmmɔ únwini úbo na ɔ́nu ka Saul ɔtɛ kalɔ ɔni na lɛlɔ lɛ́tɔ-nwu lɛni ɔsu ni, ɔ́su Ɔga Saul ɔnini, “Ati, buti na líti mina ngba lɛ́kpa, na lɛ́di ƒula litemi lɛlɔ, na lɛ́bla lɛla lɛni na ásu-mi anii mbla aani ƒula uleku kabla ɔblane kalɛ.

²²Anwuɔsu se atu na enu lɛla lɛni na muuvele-ɔ, na aya na lite-ɔ lɛla lɛdi na adi kalɛ na lɛlɔ lɛyu-ɔ ɔkplu asa na ayu ulu eteesie.”

²³Nsu úni na ɔ́su ɔnini, “Lɛɛɛdubo lɛla lɛdi bɔdi.” Nsu nwuna bebunkune bani na anwu ku-ma nkɛ bébunku uleku ɔmmɔ na bénye-nwu lɛlɔ bévele-nwu laa asa na únu kalɔ ɔ́ta ulie liboku lɛdi lɛlɔ.

²⁴Ɔmmɔ kama uleku ɔmmɔ úƒie koƒonu kɔkɔdi kɔdi na kúlie lɛmwi kaduɛ na ɔ́du-ku. Na ɔ́ma ɔlaaƒɔ ɔdi lɛnɔ na ɔ́nwu na úƒi bodobodo ɔni kemmo na bɔnyii buuubo.

²⁵Na úti úbese Saul ku nwuna bekyuli kudɔ na bádi asa na lɛlɔ lɛ́yu-ma ɔkplu, na bátɔlɔ usien ɔmmɔ kani.