Read Lelemi Samuel 1 3 Bible Online

Samuel 1 3 - Lelemi bible

Samuel 1 3

¹Na uwi ɔmmɔ ni, Samuel ɔ́kya Eli kudɔ útaabla Unwoti kabla, ɔƒɛni lɛnɔ ni, Unwoti ulátɛmiku ukyuli pla pla na ulédie lɛlɔ lɛnɔ taatina ukyuli na kɔna kemmo pla pla.

²Usien ɔdi ni, Eli úsie ɔtɛ kesii kani na ɔɔtɛ. Na ka ɔ́ɔbi ɔsu ni, nwuna anumi asɔ alanu kaduɛ.

³Na ka Samuel ɔ́wɔlɔ nwuna kabla ni, ɔ́yu ɔ́tɛ ɔnii utaalɛɛ na kakpakɔ mmɔ kesii kani na Unwoti Bunyimi Adaka ɔmmɔ ɔlɛ kudɔ na asogya ɔma ɔɔda.

⁴Ɔmmɔ kama ni, Unwoti ɔ́kpali Samuel na ɔ́tuna ɔnii, “Ati aanu-mi.”

⁵Amu na úkeli úsie Eli kudɔ na útásu-nwu ɔnii únu ka ɔ́kpali-nwu ɔsu úubo. Mmɔ na Eli údie kenye ɔnini, “Ńtakpali-ɔ. Teesie na atátɛ.” Ɔmmɔ ɔsu Samuel únwini útátɛ.

⁶Ka ɔ́bla blii ni, Unwoti ɔ́sɔ ɔ́kpali-nwu kunyɔdi na Samuel ɔ́sɔ ɔ́tuna na úkeli úsie Eli kudɔ na útásu-nwu ɔnini, “Ati aanu-mi. Líibo, ɔsika línu ka ákpali-mi.” Eli ɔ́sɔ údie kenye ɔnini, “Ubi, ńtakpali-ɔ, teesie na atátɛ.”

⁷Ɔƒɛni ni, Unwoti útatɛmiku tɔ Samuel kudii na uwi ɔmmɔ kemmo, na Samuel lɛnɔ útati tɔ Unwoti.

⁸Amu na Unwoti ɔ́sɔ ɔ́kpali Samuel kɔtɛdi. Na anwu lɛnɔ ɔ́sɔ ɔ́ta úkeli úsie Eli kudɔ útásu-nwu ɔnii, “Ati aanu-mi. Líibo, ɔsika ákpali-mi.” Mmɔ ni, Eli ɔ́nu ɔ́ti ka Unwoti na ɔdi mɔɔkpali Samuel.

⁹Ɔmmɔ ɔsu ni, Eli ɔ́su Samuel ɔnini, “Teesie na atátɛ. Na si énu ka básɔ bákpali-ɔ ni, na asu anii, ‘Unwoti, aanu ami ƒula kabla ɔblane. Su-mi lɛla lɛni na lɛbla.’ ” Anwuɔsu Samuel ɔ́sɔ únwini útátɛ nwuna katɛnkɔ kalɛ na ɔɔyɔ́ bɔbla.

¹⁰Unwoti ɔ́sɔ úbo úbakpali Samuel aani kudeedi kalɛ ɔnii, “Samuel, Samuel.” Amu na Samuel ɔ́tuna ɔnini, “Unwoti, aanu ami ƒula kabla ɔblane. Su-mi lɛla lɛni na lɛbla.”

¹¹Mmɔ ni, Unwoti ɔ́su Samuel ɔnini, “Nu! Ndubo lɛla lɛdi bɔbla na Israel ɔni na ɔtɔtɔ ɔdubɔgyu ukyuli biala ɔni menu lɛla lɛmmɔ.

¹²Limeyi lɛmmɔ ni, ɔgbankpi ɔni na lɛ́su ka ɔdubɔlɛku Eli ku nwuna kaduli bekyuli ni, ɔdubo bɔlɛ lɛni sɔsɔ ɔ́si kalɔ kesekɔ útédu kawɔlɔkɔ.

¹³Ɔsika lɛ́su-nwu ka ndubo anwu ku nwuna kaduli bekyuli ƒui kɔtɔ bɔdu na likpidi lɛni na ɔgyi nwaa, nsu údie atu ɔsu. Nwuna bebi ala bɔbla émo bekyuli bammɔ ƒui, nsu útakana na ɔ́bala-ma ɔsiku ɔbladu buɛ ɔmmɔ kudɔ.

¹⁴Ɔmmɔ ɔsu líse kenye na lɛ́su ka Eli ku nwuna kaduli bekyuli likpidi lɛni na bábla ni, akpala iye kɔtɔ bukpi etela adi alakana likpidi lɛmmɔ budie.”

¹⁵Nwuna kama ni, Samuel úsie útátɛ ɔ́lɛɛ laa na kadi kegye asa na ɔ́ta ɔ́lɛmi kakpakɔ mmɔ. Na lɛla lɛni na Unwoti údie ɔ́tina-nwu ni, ɔɔyia ka udie-ni ɔsu Eli.

¹⁶Nsu Eli ɔ́kpali ɔnini, “Mina Ubi. Samuel.” Na anwu lɛnɔ úkeli úsie na útásu-nwu ɔnini, “Ati, aanu-mi mɛni.”

¹⁷Mmɔ na Eli úye Samuel ɔnini, “Bi na Unwoti ɔ́su-ɔ? Teti lɛla lɛdi tabɛla-mi. Si ɔɔɔdi lɛni na ébu lɛla lɛdi ése na átasu-mi ani ni, Unwoti ɔni-ɔ kɔtu geen.”

¹⁸Ɔmmɔ ɔsu Samuel ɔ́sɔku lɛla biala ɔ́su Eli na útabɛla-nwu lɛla lɛdi. Amu na Eli údie kenye ɔnini, “Anwu ndi bula Unwoti, anwuɔsu buuubo lɛla lɛdi na bɔsu, mmomu ɔbla nwuna lɛyɔla lɛni na ɔ́nu ka lɛdia na lɛ́manku.”

¹⁹Kalɛ kani na Samuel ɔɔbi lɛlɔ teebu ni, lɛni na Unwoti ɔsiaku-nwu. Na ala ani ƒui na ɔɔsu ni, eebo-nwu kemmo lɛni, na ɔdi ulásia kɔmadɔ.

²⁰Ɔmmɔ ɔsu ni, Israel kalɔ lɛlɔ bekyuli ƒui ɔ́si ɔma ɔni baalɔ Dan útédu Beer-Seba ni, bánu ɔmmɔ báti na beedie kenye ka Samuel ɔdi Unwoti Kenye Udiene.

²¹Unwoti úsie anumi na uudie lɛlɔ taatina na Silo mmɔ ɔkɛnku ala ani na ɔɔsu Samuel lɛlɔ.