Read Lengua Sur Génesis 1 Bible Online

Génesis 1 - Lengua Sur bible

Génesis 1

¹Apkelanak axta sekxók amonye' Dios néten tén han náxop.

²Méko axta han ektémakxa enxoho sekxók ma'a xapop; wátsam ekwányam ekmattawóneg agko' axta aqsa, sawheykekxók axta ekyáqtessóxma, keñe axta Dios espíritu apagkok apkelteykencha'a néten yegmen.

³Keñe axta Dios aptéma s'e: “¡Katyep élseyéxma!” Yetlókok axta han ekteyapma élseyéxma.

⁴Xama axta apwet'a Dios ektaqmela élseyéxma, apyetnakhássek axta neyseksa ekyaqtessóxma.

⁵Apteméssessek axta han ekwesey élseyéxma “ekhem” keñe axta ekyaqtessóxma apteméssesa ekwesey “axta'a”. Cháxa eyeynamókxa axta ekpenchásamáxche xama ekhem.

⁶Aptáhak axta makham Dios se'e: “Katyep xama ekméyak neyseksa yegmen, yaqwayam keytek ánet ekyetnamakxa yegmen.” Temék axta han xa.

⁷Apkelanak axta Dios xama ekméyak yegmen, yenyókassek axta han mók ekyetnamakxa m'a yegmen; nekha yegmen axta yetnákxak kóneg ekmeykegkaxa nak yegmen, keñe axta mók ekyetnákxo néten.

⁸Apteméssessek axta ekméyak yegmen ekwesey “néten”. Cháxa eyeynamókxa axta ekpenchásamáxche ánet ekhem xa.

⁹Aptáhak axta makham Dios se'e: “Kaqnekxa ekyetnamakxa agko' yegmen, ekyetnama nak kóneg yaphope, yaqwayam sa' kaxek ekyamakakxa exma.” Temék axta han xa.

¹⁰Apteméssessek axta ekwesey Dios ekyamakakxa exma “xapop”, keñe m'a eyaqnákxexa axta yegmen apteméssesa ekwesey “wátsam ekwányam”. Apwet'ak axta Dios éltaqmela ekyókxoho xa,

¹¹tén axta aptáha s'e: “Kalántép néten xapop ekyókxoho mók ektémakxa nak yenta'a; cham'a pa'at ekteyapmo nak aktek, tén han ma'a yámet ekha nak ekyexna.” Temék axta han xa.

¹²Kelántekkek axta ekyókxoho mók ektémakxa yenta'a, cham'a pa'at ekteyapmo nak aktek, tén han ma'a yámet ekha nak ekyexna. Apwet'ak axta Dios ektaqmela ekyókxoho xa.

¹³Cháxa eyeynamókxa axta ekpenchásamáxche ántánxo ekhem xa.

¹⁴Keñe axta natámen aptáha makham Dios se'e: “Kalántép élápogwate m'a néten, yaqwayam kalsaksexma keso náxop, yaqwayam keytnakhaksek ekhem tén han axta'a, yaqwayam sa' han chá'a kólya'asagkohok ekhem, tén han apyeyam nak, tén han ekpekkenamaxchexa nak chá'a ekhem megkólwagqayam.” Temék axta han xa.

¹⁶Apkelanak axta Dios ánet élápogwate: cham'a ekyawe nak yaqwayam kalsaksexma ekhem, keñe m'a ketse nak yaqwayam kalsaksexma axta'a; apkelanak axta han yaw'a.

¹⁷Apnegkenchek axta Dios élápogwate m'a néten, yaqwayam kalsaksexma keso náxop,

¹⁸ekhem tén han axta'a, yaqwayam keytnakhaksek élseyéxma m'a ekyaqtessóxma nak. Apwet'ak axta éltaqmela xa ekyókxoho nak.

¹⁹Cháxa eyeynamókxa axta ekpenchásamáxche cuatro ekhem xa.

²⁰Aptáhak axta makham Dios se'e: “Kaxámekxa neygmen ekyókxoho mók ektémakxa nak aqsok élleykha nak neygmen, kalántép nahan náta élchampeykha nak néten xapop.” Temék axta han xa.

²¹Apkelanak axta Dios élyawe yegmen askok élleykha nak wátsam ekwányam, tén han ma'a ekyókxoho askok éleñama nak neygmen, tén han élleykha nak ma'a, keñe han ekyókxoho náta. Apwet'ak axta Dios ektaqmela agko' xa,

²²keñe axta aptáha appeywa apkeltamho kataqmelhok élleykha m'a aqsok apkelane nak: “Kaxámekxak sa' kélketkók, kallanagkohok sa' wátsam élyawe, kaxámekxak sa' nahan náta ekyókxoho yókxexma keso náxop.”

²³Cháxa eyeynamókxa axta ekpenchásamáxche cinco ekhem xa.

²⁴Keñe axta Dios aptáha makham se'e: “Kaxámekxa ekyókxoho mók ektémakxa nak aqsok nawha'ák keso náxop, cham'a aqsok megkameymentakcha'a nak, tén han ma'a ekmeymentakcha'a nak, tén han ma'a élpexyaweykegkoho nak xapop.” Temék axta han xa.

²⁵Apkelanak axta Dios xa aqsok nawha'ák nak, apwet'ak axta éltaqmela ekyókxoho.

²⁶Tén axta aptáha s'e: “Anlának sa' kaxwo' énxet neghawo nak negko'o. Apwanchek sa' nahan chá'a etnéssesek apmakókxa enxoho etnéssesek ma'a kelasma, tén han náta, tén han ma'a ekyókxoho aqsok nawha'ák megkameymentakcha'a nak, tén han ma'a aqsok nawha'ák ekmeymentakcha'a nak, tén han ma'a élpexyaweykegkoho nak xapop.”

²⁷Xama axta apkelana Dios énxet, apkelanak axta m'a aphawo nak aptémakxa; apkelanak axta apkenna' tén han kelán'a.

²⁸Keñe axta aptáha appeywa apkeltamho kataqmelhok ekheykha s'e: “Exámekxak sa' kélketchek; elánhok sa' ekyókxoho yókxexma keso náxop, apagkok sa' nahan etnahagkok; etnéssesek sa' nahan apmakókxa enxoho etnéssesek ma'a kelasma, tén han ma'a náta, tén han ma'a ekyókxoho aqsok nawha'ák élpexyaweykegkoho nak xapop.”

²⁹Keñe axta natámen aptáha apkeláneya s'e: “Ekméssek ko'o kéxegke ekyókxoho yenta'a ekteyapmo nak aktek, ekheykegko nak keso náxop, tén han ma'a ekyókxoho yámet ekha nak ekyexna. Cháxa yaqwayam sa' kóltéhek kéltéyak kéxegke xa.

³⁰Keñe m'a aqsok nawha'ák ekmeymentakcha'a nak, tén han ma'a ekpexyaweykegkoho nak xapop, tén han ma'a náta, sekmésa yaqwayam katnehek ektéyak pa'at áwa'.” Temék axta han xa.

³¹Apwet'ak axta Dios éltaqmela ekyókxoho aqsok apkelane. Cháxa ekwokmo axta ekpenchásamáxche seis ekhem xa.