Read Lengua Sur Génesis 11 Bible Online

Génesis 11 - Lengua Sur bible

Génesis 11

¹Hawók axta mók apkelpeywa énxet'ák keso náxop.

²Xama axta apkelánteyapma m'a yókxexma ekpayho nak ekteyapmakxa ekhem, apkelwetágweykmek axta xapop ekpayhéyak ma'a yókxexma nak Sinar, keñe axta apkelheykmo m'a.

³Xama ekhem axta aptáha chá'a apcháneya pók se'e: “Anlának sa' yátaphémekcha'ák, ólwatnek sa'.” Apkelmáha axta m'a yátaphémekcha'ák, axta elmáha m'a meteymog, apkelmáha axta meteymog égmenek, axta elmáha m'a meteymog ánek.

⁴Keñe axta aptáha apkelpaqmeta s'e: “Kólchempoho, anlának xama tegma apwányam, tén han xama tegma néten apwenaqte apweykmoho néten. Keñe sa' ólxénaxchek chá'a negko'o negmowána aqsok, móxpaqnehek sa' chá'a ekyókxoho keso náxop.”

⁵Apweywenteyk axta Wesse' egegkok apkelano tegma apwányam, tén han tegma néten apwenaqte, apkeláneygko axta m'a énxet'ák nak.

⁶Keñe axta aptáha s'e: “Méko apkelpaxqamap xa énxet'ák nak, hawók nahan mók apkelpeywa, cháxa keñamak apkeláneykegko nak xa apkeltamheykha nak, melwátesagkek han apkeláneyak.

⁷Tásek sa' ólweywenták ólxegánegkessesek mók apkelpeywa, yaqwayam sa' mey'asagkehek chá'a aptáhakxa apcháneya pók.”

⁸Cháxa aptáhakxa axta Wesse' egegkok apkexpánchesa ekyókxoho keso náxop, apkelwáteságkek axta han apkeláneyak tegma apwányam.

⁹Cháxa yókxexma apkelxegánegkessesakxa axta apkelpeywa Wesse' egegkok apyókxoho énxet'ák apheykha keso náxop. Cháxa apkexpánchesakxa axta han ekyókxoho yókxexma keso náxop. Ekeso éñamakxa kélteméssesa axta apwesey Babel xa tegma apwányam nak.

¹⁰Keso Sem aptawán'ák neptámen se'e: Apteyekmek axta apketche Sem, apweykmo axta cien apyeyam apagkok, cham'a Arfaxad, aptéma axta apqánet apyeyam natámen axta yegmen ekyawe.

¹¹Aphegkek axta makham Sem quinientos apyeyam natámen xa, apkelweteykekxeyk axta makham mók apketchek apkelennay'a, tén han kelwán'ák.

¹²Treinta y cinco apyeyam apagkok axta weykmok Arfaxad apteyekmo m'a apketche Sélah.

¹³Aphegkek axta makham Arfaxad cuatrocientos tres apyeyam natámen xa, apkelweteykekxeyk axta makham mók apketchek apkelennay'a, tén han kelwán'ák.

¹⁴Treinta apyeyam apagkok axta weykmok Sélah apteyekmo m'a apketche Éber.

¹⁵Aphegkek axta makham Sélah cuatrocientos tres apyeyam natámen xa, apkelweteykekxeyk axta makham mók apketchek apkelennay'a, tén han kelwán'ák.

¹⁶Treinta y cuatro apyeyam apagkok axta weykmok Éber apteyekmo m'a apketche Péleg.

¹⁷Aphegkek axta makham Éber cuatrocientos treinta apyeyam natámen xa, apkelweteykekxeyk axta makham mók apketchek apkelennay'a, tén han kelwán'ák.

¹⁸Treinta apyeyam apagkok axta weykmok Péleg apteyekmo m'a apketche Reú.

¹⁹Aphegkek axta makham Péleg doscientos nueve apyeyam natámen xa, apkelweteykekxeyk axta makham mók apketchek apkelennay'a, tén han kelwán'ák.

²⁰Treinta y dos apyeyam apagkok axta weykmok Reú apteyekmo m'a apketche Serug.

²¹Aphegkek axta makham Reú doscientos siete apyeyam natámen xa, apkelweteykekxeyk axta makham mók apketchek apkelennay'a, tén han kelwán'ák.

²²Treinta apyeyam apagkok axta weykmok Serug apteyekmo m'a apketche Nahor.

²³Aphegkek axta makham Serug doscientos apyeyam natámen xa, apkelweteykekxeyk axta makham mók apketchek apkelennay'a, tén han kelwán'ák.

²⁴Veintinueve apyeyam apagkok axta weykmok Nahor apteyekmo m'a apketche Térah.

²⁵Aphegkek axta makham Nahor ciento diecinueve apyeyam natámen xa, apkelweteykekxeyk axta makham mók apketchek apkelennay'a, tén han kelwán'ák.

²⁶Setenta apyeyam apagkok axta weykmok Térah apkelweteya m'a apketchek, Abram, Nahor, tén han Harán.

²⁷Keso Térah axta aptawán'ák neptámen se'e: apyáp axta m'a Abram, Nahor tén han Harán. Harán apyáp axta Lot,

²⁸apketsepmeyk axta m'a Ur yókxexma nak Caldea, megyetsapmakxa axta makham ma'a apyáp Térah. Axta apketsaphok ma'a yókxexma apteyeykemxa axta.

²⁹Kelyamhopmeyk axta Abram, Sarai axta apmák, keñe Nahor apmoma m'a Milcá, Harán axta apketche, Iscá axta apyáxeg.

³⁰Yawanchek axta kótak étche Sarai, hakte katétche axta.

³¹Apteyepmeyk axta Térah ma'a Ur apchókxa nak caldeos, apmaheykegko m'a yókxexma Canaán yetlo apketche Abram, apyentamomchek axta m'a aptáwen Lot, yetlo m'a aptánegken Sarai. Xama axta apkelweykmo m'a tegma apwányam Harán, apkelheykmek axta m'a.

³²Doscientos cinco apyeyam apagkok axta weykmok Teráh apketsapma m'a Harán.