Read Lengua Sur Génesis 13 Bible Online

Génesis 13 - Lengua Sur bible

Génesis 13

¹Aptekkek axta Abram ma'a Egipto, yetlo aptáwa' tén han ma'a ekyókxoho aqsok apagkok ekyetnakxa nak, apmeyákxeyk axta makham ma'a Négueb, apyetlákxeyk axta han ma'a apephénem Lot.

²Xámok agko' axta aqsok apagkok ma'a Abram, yetneyk axta m'a sawo élyátekto élmomnáwa nak, tén han ma'a sawo élmope élmomnáwa nak, xámok axta han apnaqtósso.

³Aptaqmelcháseykegkók axta han apxegama apkeñama Négueb, ekwokmoho apwokmo m'a Betel. Cha'a apkeñamakxa axta apxega apmeyákxo m'a appakxenweykenxa axta sekxók, neyseksa nak ma'a teyp Betel, halep nak Ai.

⁴Cháxa yókxexma apkelánegweykenxa axta han sekxók ma'a ekwatnamáxchexa nak aqsok, apwóneykegkaxa axta han Wesse' egegkok.

⁵Xámok agko' axta han aqsok apagkok ma'a Lot, aphawók axta m'a apyaha' Abram, apxámok axta nepkések apnaqtósso, tén han weyke, tén han énxet'ák ektáha axta apkelxegexma'a,

⁶Ketsék agko' axta eyke han ma'a yókxexma apheykegkaxa axta, megkaweykekxohok chá'a ektéyak ma'a aqsok apnaqtósso, massegkek axta apmopwána apha xamo' pók,

⁷hakte apkelenmexamakpek axta chá'a pók ma'a Abram apkeláneseykha apnaqtósso, tén han ma'a Lot axta apkeláneseykha apnaqtósso. Apheykha axta eyke makham cananeos, tén han ferezeos ma'a.

⁸Aptáhak axta Abram apcháneya Lot se'e: “Émók ahagko' ko'o exchep, megkapayhawok ólenmexaxche', megkapayhawok han elenmexakpok ma'a apkeláneseykha nak xép apnaqtósso, tén han séláneseykha nak ko'óxa seknaqtósso.

⁹Chéhe xapop xa yaqwayam elyésha. Óxpánchesaxchek sa'. Apmahágkek sa' agkok xép ma'a nexcheyha, keñe sa' ko'o amhagkok nepyeyam, apmahágkek sa' agkok han ma'a ekpayho nak nepyeyam, keñe sa' ko'o amhagkok ma'a nexcheyha.”

¹⁰Apkenmexawók axta Lot ekyókxoho ekyapwate nak wátsam Jordán, apwet'ak axta han ekyawa yegmen ekweykekxoho m'a yókxexma étkok nak Sóar, máxa axta m'a yókxexma ektaqmalmal'a. Hawók axta m'a ektémakxa axta Egipto. (Cháxa ektémakxa axta xa, amonye' axta apmassésseyam Wesse' egegkok ma'a tegma apkelyawe Sodoma tén han Gomorra.)

¹¹Keñe axta Lot apkelyeysáncha'a apmako emok ma'a ekyókxoho ekyapwate nak Jordán. Apmahágkek axta m'a ekteyapmakxa ekhem, apkeñama m'a aphamakxa axta. Cháxa ektémakxa axta apkexpánchesamakpo m'a Abram tén han Lot.

¹²Apheykekxeyk axta Abram ma'a Canaán, keñe axta Lot apmaheykegko apheykmo m'a tegma apkelyawe apheykegko axta m'a xapop ekyapwate, ketók axta m'a tegma apwányam Sodoma,

¹³apheykegkaxa axta apyókxoho énxet'ák élmasagcha'a apkeltémakxa, apkeláneykegkaxa axta ekmaso agko' apkeltémakxa melya'assáxma, énmexma nak Wesse' egegkok.

¹⁴Aptáhak axta apcháneya Wesse' egegkok Abram se'e, natámen axta apxega m'a Lot: “Yenmexho sa' nexcheyha, nepyeyam, ekteyapmakxa ekhem, tén han ektaxnegwánxa nak ekhem, cháxa yókxexma aphakxa nak.

¹⁵Agkések sa' ko'o exchep ekyókxoho xapop apwet'a nak kaxwo', apagkok sa' etnehek megkatnégwayam néxa, tén han ma'a aptawán'ák neptámen nak.

¹⁶Apxámokma apagko' sa' ko'o atnéssesek ma'a, exhok sa' ma'a xapop ánek nak keso náxop, cham'a ektémakxal'a magmowána ólyetsetek xóp ánek, mogwanchek sa' han ólyetsetek apwánxa m'a aptawán'ák neptámen.

¹⁷¡Yempekxa néten, eweynchamha ekyókxoho nak ekwegqakxa xapop, tén han ekpayhakxa, agkések sa' ko'o exchep xa!”

¹⁸Aplekkek axta appakxanma Abram apmahágko aphakmo m'a élámhakxa nak yámet naxma apagkok axta m'a énxet apwesey axta Mamré, ketók axta m'a tegma apwányam nak Hebrón. Axta apkelánéssekmok han xama aqsok ekwatnamáxchexa Wesse' egegkok ma'a.