Read Lengua Sur Génesis 16 Bible Online

Génesis 16 - Lengua Sur bible

Génesis 16

¹Yawanchek axta ekmáheyo kataksek apketche Abram ma'a Sarai, yetneyk axta eyke xama eyásenneykha ekwesey axta Agar, Egipto kelán'a axta.

²Keñe axta ektáha eyáneya Abram se'e: —Elano, Wesse' egegkok ko'o meltémók ótak étchek, éltamhók ko'o exchep epathetagkok ma'a Agar, seyásenneykha nak, sa' kexa ótak étchek eñama m'a. —Apkelyahákxók axta han Abram ma'a ektáhakxa axta eyáneya Sarai,

³tén axta ekyentegkásekxo m'a Agar, kelán'a Egipto nak, méssek axta yaqwayam etnehek aptáwa' Abram, ekweykmo axta diez apyeyam apha m'a Canaán.

⁴Apyepetcheyak axta han Abram ma'a Agar, lósók axta han temék; xama axta ekwet'a ektáha lóso', wañeyha axta chá'a m'a wesse' agkok.

⁵Tén axta Sarai ektáha eyáneya Abram se'e: —¡Xeyep keñamak sewañeyncha'a ko'o m'a Agar! Ko'o ahagko' axta nahan sekmésso yaqwayam etnehek aptáwa', keñe kaxwók peya kótak xama étche, sewañeyncha'a ko'o. Wesse' egegkok sa' exének, yaqsa eksexnánémaxche', xeyep, essenhan ko'o.

⁶Aptáhak axta apchátegmowágko Abram se'e: —Kalano, eyásenneykha exche' m'a, katnésses sa' ekmakókxa enxoho katnéssesek. Yetlókok axta han ekmaso chá'a ekteméssesakxa m'a Sarai, tén axta ekxeganakmo m'a Agar.

⁷Apwetágwokmek axta eyke xama Wesse' egegkok apchásenneykha m'a yókxexma meykexa nak énxet, nekha axta m'a ekteyapmakxa yegmen, ekyetnama axta m'a ámay ekmahéyak nak yókxexma Sur.

⁸Aptáhak axta apkelmaxneyáncha'a s'e: —Agar, Sarai nak eyásenneykha, ¿háxko éñamakxa? ¿Háxko ekmahágkaxa? —Wesse' ahagkok Sarai ko'o ekyexánegkásak —axta entáhak eyátegmowágko.

⁹Tén axta Wesse' egegkok apchásenneykha aptáha apcháneya s'e: —Kay'ókxa makham wesse' agkok, kalyahakxoho sa' chá'a ektáhakxa enxoho eyáneya.

¹⁰Aptáhak axta makham apcháneya Wesse' egegkok apchásenneykha s'e: “Axamássesagkohok ahagko' sa' ko'o exche' m'a atawán'ák natámen, méko sa' kawának kalyetsetek apwánxa'.

¹¹Lósók han entáhak kaxwo', kótak sa' nahan xama étche, Ismael sa' katnéssesek apwesey. Hakte apleg'ak Wesse' egegkok ma'a eklegeykegkoho awáxok.

¹²Exhok sa' ma'a xama yátnáxeg apmopyementél'a, elnapakpok sa' han chá'a apyókxoho énxet'ák, yenmexakpok sa' han chá'a. Yenmexmakha sa' eykhe chá'a m'a apkelyáxeg'a nak, exek sa' eyke aqsa chá'a m'a apxagkok.”

¹³Teméssessegkek axta apwesey Agar, “Dios segwetayo”, hakte appaqhetchessegkek axta Wesse' egegkok. Axta temék awáxok se'e: “Éteyak ko'o Dios, makke watsapak makham.”

¹⁴Cháxa keñamak kélteméssesa nak ekwesey m'a yámelchet nak: “Yámelchet apagkok ekha nak apyennaqte, setayo nak chá'a ko'o.” Cháxa yámelchet nak, yetnegkek ma'a neyseksa nak teyp Cadés, halep nak Béred.

¹⁵Wetássek axta apketche Agar ma'a Abram, apteméssessek axta apwesey Ismael,

¹⁶Ochenta y seis apyeyam apagkok axta temék Abram apteyekmo m'a apketche Ismael.