Read Lengua Sur Génesis 18 Bible Online

Génesis 18 - Lengua Sur bible

Génesis 18

¹Apxekmowáseykpók axta Wesse' egegkok Abraham, élámhakxa nak yámet naxma apagkok ma'a Mamré. Apheyk axta Abraham ma'a átog nak appakxanma, chaqhawók axta m'a ekweykenxal'a kamexnek exma'.

²Apkelyaháha axta Abraham, apwet'ak axta apchaqnáncha'a apqántánxo énxet ma'a ekpayhókxa aphakxa'. Xama axta apwet'a, yetlókok axta apchampeykekxa néten apkelma takha', apháxahánteyk axta ekwokmoho aptekxeya ekpayhakxa nápat xapop,

³aptáhak axta apkeláneya s'e: —Énxet'ák, nágkólpekhaksoho aqsa sélyeykhagwe.

⁴Leyawók sa' agkok kélwáxok, wának sa' sekxók kólsantagkasek yegmen yaqwayam kólyenyesagkok kélmagkok, tén sa' kóllókasek kélyampe yaqwatakxoho s'e kóneg yámet pessesse agkok nak.

⁵Asantagkasek sa' sekxók kéltéyak yaqwayam sa' kólyennákxohok makham amonye' kélxegeykekxa', hakte kélwa'ak se'e sekhakxa nak ko'o, sektáha nak kéxegke kélláneykha. —Hoy táse', axta aptáhak apkelátegmowágko.

⁶Aptaxnegwákxeyk axta ekpekhe agko' Abraham ma'a kañe' appakxanma, aptáhak axta apcháneya Sara s'e: —¡Kapekhésa! ¡Kalekwakxa sa' veinte kilos hótáhap aptaqmalma apagko' nak, kalána sa' kelpasmaga!

⁷Tén axta apketchágkokxo Abraham ma'a élyagqakxa axta apnaqtósso weyke, apkelyésáha axta weyke étkok ektaqmalma ekmelé, apméssek axta han xama apkeláneykha, yetlókok axta han apkelane ekmanyehe agko' yaqwayam etawagkok.

⁸Apsakxéssek axta Abraham ma'a ápetek, weyke nagkeygmenek ekyennaqte, tén han weyke nagkeygmenek, apkenmáha axta han ma'a aptókagkaxa axta aptéyak kóneg yámet pessesse agkok, yaqwayam enxoho enegkenchásekxak chá'a aptéyak.

⁹Xama axta appenchásegko aptéyak, aptáhak axta meyk'a apkelmaxneyáncha'a Abraham se'e: —¿Kenhan ma'a aptáwa' Sara? —Heyk ma'a kañe' nempakxanma nak —axta aptáhak apchátegmowágko.

¹⁰Tén axta xama aptáha apcháneya s'e: —Pók apyeyam sa' makham awaták atnehek meyk'a, kótak sa' xama étche apkenna m'a aptáwa' Sara. Haxnawók axta han Sara ektáhakxa apkelpaqmeyesma m'a teyp átog appakxanma nak, apkenmágkaxa axta teyp ma'a Abraham.

¹¹Élwányamók axta tamheykegkok Abraham tén han Sara. Massegkek axta han ekyenyaweykekxa ekto m'a Sara.

¹²Axta keñamak éktegmeyncha'a awáxok ma'a Sara, axta táhak awáxok se'e: ¡Mogwanchek enxa'agkok negko'o óltemégwomhok exma kaxwo', nélwányamók nentamhágkok!

¹³Aptáhak axta apcháneya Wesse' egegkok Abraham se'e: —¿Yaqsa ektáha éktegmeyncha'a nak Sara? ¿Ya'ássekmeya eyewagko kótak xama étche, neyseksa ekteme ekwányamo'?

¹⁴¿Yetnéya aqsok megkamopwána elának ma'a Wesse' egegkok? Pók apyeyam sa' makham atnehek meyk'a, kótak sa' étche apkenna Sara ekwokmo enxoho xa.

¹⁵Chekak axta han Sara ekleg'a xa, peyk axta eykhe keyxaxkoho'. Axta keñamak ektáha s'e: —Neykhe ko'o waktegmáha. Keñe axta Wesse' egegkok aptáha apchátegmowágko s'e: —Kektegmáha neykhe.

¹⁶Apkelchampákxeyk axta néten ma'a meyk'a, apkelxegákxeyk axta apkelpéwomo m'a ekpayho nak tegma apwányam Sodoma. Apkelyetlákxók axta han Abraham apkelpeykásekxoho m'a énxet'ák nak.

¹⁷Keñe axta Wesse' egegkok ektáha apwáxok se'e: “Altennaksek sa' ko'o Abraham yaqwánxa atnehek,

¹⁸hakte sa' etnehek apyáp énxet'ák apxámokma m'a, tén han apkelyennaqte. Éltennássek ko'o peya apasmok apyókxoho énxet'ák keso náxop, eñama m'a.

¹⁹Élyesáha ko'o yaqwayam yának elyahakxohok nélxekmowasamáxche ahagkok ma'a apketchek, tén han aptawán'ák neptámen, tén han elanagkok ekyókxoho m'a aqsok ektaqmalma nak, tén han ma'a ekpéwomo nak, yaqwayam sa' ko'o alának ekyókxoho m'a séltennassama nak alanaksek.”

²⁰Keñe axta Wesse' egegkok aptáha s'e: —Legamaxcheyk apkelwesey ekmaso agko' ma'a énxet'ák Sodoma tén han Gomorra, asagko' agko' han ma'a melya'assáxma,

²¹ekmahágkek ko'o kaxwók ma'a, yaqwayam alano', naqsók kexa ekyawe agko' apkeltémakxa ekmaso, séltennassama nak chá'a ko'o. Tén sa' ay'asagkoho'.

²²Apkelxegákxeyk axta m'a apqánet meyk'a nak, apkelmahágko m'a Sodoma, keñe axta Abraham apkenmeyncha'a makham ma'a apkenmágkaxa axta Wesse' egegkok,

²³apyepetchegwokmók axta m'a. Aptáhak axta apkelmaxneyáncha'a s'e: —¿Emasséssóya sa' meyke nak apkeltémakxa, yetlo m'a élmasagcha'a nak apkeltémakxa?

²⁴Yetneyk sa' agkok cincuenta énxet meyke apkeltémakxa m'a tegma apwányam nak, ¿megyéxeya sa' emasséssók tegma apwányam? ¿megyásekhekxóya sa' eñama xa cincuenta énxet nak?

²⁵Mopwanchek xép elának xa, elnápok ma'a meyke nak apkeltémakxa yetlo m'a élmasagcha'a nak apkeltémakxa, hakte máxa katnehek ekhawo enxoho mók apkeláneyak melya'assáxma xa. ¡Ná elána aqsa xa! Xép apteme segyekpelchémo apsawheykekxoho ekyókxoho yókxexma keso náxop. ¿Metnésseseya m'a ekpayhawo nak etnéssesek?

²⁶Keñe axta Wesse' egegkok aptáha apchátegmowágko s'e: —Ekwet'ak sa' agkok ko'o cincuenta énxet meyke apkeltémakxa m'a tegma apwányam nak Sodoma, alásekhekxohok sa' ko'o apyókxoho apheykha m'a, eñama xa.

²⁷Tén axta Abraham aptáha makham apcháneya s'e: —Heyásekhekxoho sa' sektáha ko'o sekpaqhetchesa exchep yetlo meyke sélnawagko xa ektáha nak, hakte xép apteme Dios, keñe ko'o xóp ánek aqsa.

²⁸Kenhan ma'a apkeymékpo enxoho cinco yaqwayam emmok cincuenta, ¿megyéxeya sa' emasséssók tegma apwányam eñama apkeymomap makham xa cinco nak? Aptáhak axta Wesse' egegkok apchátegmowágko s'e: —Ekwet'ak sa' agkok cuarenta y cinco meyke nak apkeltémakxa, mamasséssemek sa'.

²⁹Kenhan ma'a apyetna enxoho cuarenta aqsa meyke nak apkeltémakxa —axta aptáhak makham Abraham. —Apwokmek sa' agkok cuarenta, mamasséssemek sa' tegma apwányam eñama sélásekhayo ko'o xa cuarenta nak —axta aptáhak Wesse' egegkok.

³⁰Keñe axta aptáha makham Abraham se'e: —Náhetaqnow aqsa, eñama sélenxanmeykegkoho sélmaxneyeykekxoho chá'a. ¿Kenhan ma'a apyetna enxoho wánxa treinta? Tén axta Wesse' egegkok aptáha apcháneya s'e: —Mamasséssemek sa' ko'o tegma apwányam sekwet'a enxoho xa treinta nak.

³¹Aptáhak axta makham Abraham se'e: —Wesse' ahagkok, mehélnawágweykxak ko'o sektáha sekpaqhetchesa xa ektáha nak. ¿Háxko sa' katnehek ma'a apwet'a enxoho wánxa veinte énxet meyke nak apkeltémakxa? Apchátegmowágkek axta makham ma'a Wesse' egegkok: —Mamasséssemek sa' ko'o tegma apwányam, sekwet'a enxoho xa veinte énxet meyke apkeltémakxa, eñama sélásekhayo ko'o xa veinte nak.

³²Axta aptáhak makham Abraham se'e: —Wesse' ahagkok, náhetaqnow aqsa, wánxa sa' eyke atnehek sekpaqhetchesso s'e peya nak makham apaqhetchásekxa': ¿háxko sa' eyke etnehek apwet'a enxoho wánxa diez? Apchátegmowágkek axta makham Wesse' egegkok: —Mamasséssemek sa' ko'o tegma apwányam, sekwet'a enxoho diez.

³³Xama axta appenchesa appaqhetchesso Wesse' egegkok ma'a Abraham, apxegákxeyk axta makham; keñe axta Abraham apmeyákxo makham ma'a appakxanmakxa nak.