Read Lengua Sur Génesis 20 Bible Online

Génesis 20 - Lengua Sur bible

Génesis 20

¹Apteyepmeyk axta Abraham ma'a aphamakxa axta, apmaheykegko m'a yókxexma nak Négueb, axta apheykmok ma'a tegma apwányam nak Guerar, teyp nak Cadés halep nak Sur.

²Cháxa apxeyenmakxa axta ektáha apyáxeg ma'a aptáwa' Sara. Keñe axta Abimélec wesse' apwányam axta Guerar, apkeltamho kólyentawakxések yaqwayam etnehek aptáwa';

³wanméssek axta eyke Abimélec aptáha apcháneya Dios xa axta'a nak: “Yetsapok sa' xép, hakte atáwa' aphak ma'a kelán'a apma nak.”

⁴Axta eyke aptáhak apchátegmowágko s'e, hakte axta épetcha'ak makham: “Wesse' ahagkok, ¿péya heyaqhek neyseksa malane aqsok ekmaso?

⁵Abraham apagko' axta han ko'o séltennasso ektáha apyáxeg ma'a kelán'a, xénchek han ektáha yapma m'a, keñe ko'o sélana yetlo meyke ektamheykha ewáxok, malanak xama aqsok ekmaso enxoho.”

⁶Aptáhak axta Dios apchátegmowágko apwanmagko s'e: “Ekya'ásegkók ko'o exchep apkelana neyseksa meyke ektamheykha apwáxok. Cháxa keñamak magwa'awo nak épetcha', yaqwayam enxoho melanyek mey'assáxma nahaqto'.

⁷Egkeyásekxa sa' kaxwók aptáwa' xa énxet nak, hakte aplegasso sekpeywa ko'o xa, elmaxnéssesek sa' han xép yaqwayam eweynchamha chá'a; sa' agkok egkeyásekxak xa, yetsapok sa' xép, ekweykekxoho m'a aphawóxama apagko' nak.”

⁸Axto'ók agko' axta apxatakha'a Abimélec, keñe apkeláneyeyncha'a m'a apkeláneykha nak, apkeltennássek axta ekyókxoho m'a ektáhakxa ekwanmésso; apkelyegwakkók apagko' axta han apkelleg'a xa.

⁹Keñe axta Abimélec apcháneyáncha'a m'a Abraham. Aptáhak axta apcháneya s'e: —¡Elano senteméssesakxa! ¿Énmexméya ko'o exchep peya nak heyhágwakxak magya'assáxma ekmaso agko', tén han ma'a apyókxoho énxet'ák ahagkok? Mantemék xa.

¹⁰¿Yaqsa ekxéna apwáxok xép setnéssesa ekyókxoho xa? Axta aptáhak Abimélec apcháneya m'a Abraham.

¹¹Keñe axta Abraham aptáha apchátegmowágko s'e: —Éneykek axta eyke ko'o méko eyáyo enxoho Dios se'e yókxexma nak, xénchek axta ewáxok amátog eñama sesexnenagko m'a etáwa'.

¹²Naqsók eyke ektáha eyáxeg ma'a: táta apketche, háwe eyke méme xamo', la'a sekmoma axta ko'o yaqwayam atnehek etáwa'.

¹³Éltémók axta chá'a hexének ektáha eyáxeg ma'a nélwánxa enxoho chá'a yókxexma, cham'a sekxók axta apkeltémo Dios atyapok ma'a táta apxagkok.

¹⁴Tén axta Abimélec apmeyásekxo Abraham ma'a aptáwa' Sara. Apkelméssek axta han apkelmésso naqsa nepkések, weyke, apkelásenneykha naqsa apkelennay'a, tén han ma'a kelwán'ák,

¹⁵aptáhak axta apcháneya s'e: —Cháxa ekyetna xapop ahagkok xa; elyésha sa' yókxexma ekleyawókxa enxoho apwáxok exek.

¹⁶Keñe axta Sara aptáha apcháneya s'e: —Mil sawok selyaqye hawók sekmésa exche' xeye' yapma', cháxa yaqwayam sa' katnehek ekwetamaxche exche', meyke élane xama aqsok ekmaso, nápaqta'awók ma'a apyókxoho apheykha nak axagkok. Méko sa' kaxénmakha ekmaso exche'.

¹⁷Apkelmaxnakkek axta Dios ma'a Abraham, keñe axta Dios apmeyásekxo makham apyennaqte m'a Abimélec tén han aptáwa'. Apkeltaqmelchessekmek axta han ma'a apkelásenneykha kelwán'ák, yaqwayam enxoho kalwetak étchek,

¹⁸hakte Sara axta keñamak apteméssessama Wesse' egegkok megkate étchek xama kelán'a enxoho m'a Abimélec apxagkok nak.