Read Lengua Sur Génesis 22 Bible Online

Génesis 22 - Lengua Sur bible

Génesis 22

¹Keñe axta natámen Dios apyepkónma ekwánxa mey'ásseyam ma'a Abraham. Apwóneyha axta: —Abraham, —axta aptáhak apwónéncha'a. —Keso sekha s'e, —axta aptáhak apchátegmowágko.

²Aptáhak axta Dios apcháneya s'e: —Éntem sa' apketche Isaac, apteme nak wánxa xama apketche apchásekhayo apagko' ma'a yókxexma ekwesey nak Moria. Sa' yaqhegwók ewatnegwók ma'a néten egkexe, sekxekmósakxa sa'.

³Axto'ók agko' axta apxatakha'a Abraham, apkeltahanchessek axta yámelyeheykok; apkelyaqténchek axta yántápak yaqwayam emha ewatnek, tén axta apmahágko m'a yókxexma apkeltennasakxa axta Dios, yetlo apketche Isaac, tén han apqánet apkelásenneykha.

⁴Ántánxo ekhem axta entáhak keñe Abraham apwet'a makhawók ma'a yókxexma nak.

⁵Keñe axta aptáha apkeláneya apkelásenneykha s'e: —Kólhakha sa' se'e, kóllanha sa' yámelyeheykok, ólxog sa' sekxók negko'o makham, sakcha'a tén han ko'o. Ólpeykeshok sa' Dios, keñe sa' ólchexyók makham.

⁶Apkelmeyk axta yántápak Abraham yaqwayam elwatnek, apkelpátegkessek axta m'a Isaac; tén axta apma sawo keñe han táxa, tén axta apkelxega apqánet.

⁷Tén axta Isaac aptáha apcháneya apyáp se'e: —¡Táta! Aptáhak axta Abraham apchátegmowágko s'e: —Yaqsa ektáha hatte. Tén axta Isaac aptáha s'e: Yetneyk yántápak, tén han táxa, ¿háxko apyagqakxa m'a nepkések yaqwayam agwatnek?

⁸—Dios sa' hegmések xama nepkések yaqwayam agwatnek, hatte —axta aptáhak apyáp apchátegmowágko. Keñe axta apkelxegákxo makham.

⁹Xama axta apkelwokmo m'a yókxexma apkeltennasakxa axta Dios, apkelanak axta Abraham ekwatnamáxchexa aqsok, apnegkenchek axta yántápak néten, tén axta apkelpexteta apketche Isaac, appekkenchek axta néten ekwatnamáxchexa aqsok, cham'a néten nak yántápak.

¹⁰Xama axta apma sawo' peya yaqhek ma'a apketche,

¹¹keñe axta Wesse' egegkok apchásenneykha apwónéncha'a m'a ekpayho nak néten. Aptáhak axta s'e: —¡Abraham! ¡Abraham! —Keso ko'o s'e —axta aptáhak apchátegmowágko m'a.

¹²Aptáhak axta Dios apchásenneykha apcháneya s'e: —Ná etnéssessamho aqsa exma ekmaso apketche, ekya'ásegkók eyke kaxwók apcháyo exchep ma'a Dios, memyágweykxak peya hegkések apketche xama apagko'.

¹³Apsawheyha axta exma Abraham, apwet'ak axta nepkések apkennawók élpexteta apkepet'ák yámet aktegák ma'a neyseksa yámet nak; tén axta apyo'ókmo apma m'a nepkések apkennawo nak, keñe axta apchaqha apwatna, apyaqmageykekxa m'a apketche.

¹⁴Keñe axta natámen Abraham apteméssesa ekwesey yókxexma: “Wesse' egegkok apteme segmésso eyéméxchexa aqsok.” Cháxa kéltéma nak makham ekwesey s'e: “Egkexe Wesse' egegkok apteme segmésso eyéméxchexa aqsok.”

¹⁵Apwóneyha axta makham Dios apchásenneykha Abraham, ekpayho m'a néten.

¹⁶Aptáhak axta apcháneya s'e: —Aptáhak Wesse' egegkok se'e: ‘Naqsók ko'o sekxéna exchep eñama apteme xa ektáha nak, memyágweykekxa apketche xama apagko'

¹⁷peya almések aqsok éltaqmela. Apxámokma apagko' sa' atnéssesek ma'a aptawán'ák neptámen, apweykenxal'a apxámokma yaw'a m'a néten, tén han yagkamex ma'a neyáwa' wátsam ekwányam. Emallánek sa' han chá'a nepyeseksa apkelenmexma,

¹⁸apkeleñémo sa' kólteméssesagkok ma'a apyókxoho énxet'ák apheykha nak keso náxop, eñama m'a aptawán'ák neptámen, hakte élyeheykekxók ko'o exchep.’

¹⁹Aptaqháwok axta makham Abraham ma'a aphágkaxa axta apkeláneykha, tén axta apyókxoho apkelmeyákxo makham ma'a Beerseba, cha'a apkelhákxexa axta han ma'a yetlo Abraham.

²⁰Keñe axta natámen xa, aplegagwákxeyk axta amya'a Abraham, ekwetassama han apketchek apyáxeg Nahor ma'a Milcá.

²¹Us axta apwesey m'a aptéyam apmonye'; keñe axta m'a Buz, tén axayók ma'a Quemuel, aptáha nak apyáp ma'a Aram.

²²Tén axta aptémeykekxo makham ma'a Quésed, Hazó, Pildás, Idlaf, tén han Betuel.

²³Rebeca axta yáp ma'a Betuel. Cháxa ocho étchek axta Milcá ekwetasso m'a Nahor, Abraham axta apyáxeg.

²⁴Keñe axta han Reumá ekwetassama apketchek ma'a Nahor, ektáha axta apmeykha naqsa, cham'a Teba, Gáham, Tahas, tén han ma'a Maacá.