Read Lengua Sur Génesis 23 Bible Online

Génesis 23 - Lengua Sur bible

Génesis 23

¹Ciento veintisiete apyeyam agkok axta weykmok Sara,

²keñe axta étsapma m'a Quiriat-arbá nak, cham'a tegma apwányam nak Hebrón, yókxexma Canaán. Apkelekxagweykha axta Abraham étsapma Sara.

³Keñe axta aptepa m'a ekyetnakxa axta Sara ápak, apxega aptáha apkelpaqhetchessákxo hititas ma'a apheykegkaxa axta. Aptáhak axta apkeláneya s'e:

⁴—Hélmés ko'o ekha ekyánmaga xama takhaxpop yaqwayam wátawanyek etáwa'. Ko'o sekteme séñama mók nekha kélnepyeseksa kéxegke.

⁵Aptáhak axta hititas apkelátegmowágko s'e:

⁶—¡Abraham, hegeyxho sekxo'! Xép aptáha Dios apkelyéseykha negyeseksa negko'o. Yátawanyegwom sa' aptáwa' m'a ektaqmelakxa agko' nak takhaxpop egagkok negko'o, méko kamyók takhaxpop.

⁷Apkempákxeyk axta néten Abraham, apweykásenteyk axta apqátek nápaqta'awók hititas.

⁸Keñe axta aptáha apkeláneya s'e: —Naqsók agkok kélámenyého kéxegke wátawanyek etáwa' s'e, hélmaxnésses sa' ko'o Efrón, apketche nak Sóhar,

⁹hegkések ekha ekyánmaga m'a meteymog áxwa nak Macpelá, ekyetnama nak ma'a neyáwa xapop apagkok. Ayánmagkasek sa' eyke ko'o ekyókxoho ekwánxa enxoho ekyánmaga m'a meteymog áxwa nak, keñe sa' ko'o atnehek takhaxpop ahagkok ahagko' se'e yókxexma nak.

¹⁰Apyennaqtésawók axta han apchátegmowéyak Efrón ma'a Abraham, yaqwayam ellegak ma'a apyókxoho appeywomo xamo' nak, tén han ma'a apkelyeykhágwe axta chá'a m'a átog nak tegma apwányam, hakte apheyk axta nepyeseksa m'a hititas. Aptáhak axta apcháneya s'e:

¹¹—¡Ma', Abraham, yeyxho sekxo'! Sekmésso naqsa sa' atnehek ma'a xapop nak, tén han ma'a meteymog áxwa ekyetna nak ma'a xapop nak, sekpeywomo xamók eyke ektáha apweteykegkoho sektáha ko'o sekmésso naqsa exchep ma'a. Yátawanye sa' aptáwa'.

¹²Apweykásenteyk axta eyke makham apqátek Abraham, nápaqta'awók énxet'ák apheykha axta m'a yókxexma nak.

¹³Aptáhak axta apchátegmowágko Efrón nápaqta'awók apyókxoho énxet'ák se'e: —¡Efrom, heyeyxho sekxo'! Éltamhók ko'o exchep emok se'e selyaqye ekyánmaga xapop, keñe sa' wátawanyek ko'o etáwa'.

¹⁴Apchátegmowágkek axta Efrón:

¹⁵—Abraham, heyeyxho sekxo', cuatrocientos sawo' selyaqye hawók ekyánmaga m'a xapop nak, ketsék agko' negko'o anlanok xa ekwánxa nak ekyánmaga, xép tén han ko'o, yátawanyegwom heykxa' aptáwa' m'a.

¹⁶Leyawók axta apwáxok Abraham eyánmagkasek ma'a ekwánxa axta ekyánmaga apkeltennasa m'a Efrón, nápaqta'awók ma'a hititas, apyánmagkassek axta han, ekhawo aptamheykegkaxa axta chá'a.

¹⁷Tén axta m'a xapop apagkok nak Efrón, ekyetnama nak ma'a Macpelá, ekpayho nak ekteyapmakxa ekhem teyp Mamré, cham'a xapop nak, tén han ma'a meteymog áxwa nak, ekyókxoho yenta'a élaqnéyak axta m'a xapop nak,

¹⁸Abraham axta aptáhak apagkok, hititas axta han apkelweteykegkoho, tén han ma'a apyókxoho apkelyeykhágwayam axta chá'a m'a átog nak tegma apwányam.

¹⁹Yetlókok axta han apchátawanye Abraham Sara m'a meteymog áxwa nak, ekyetnama nak xapop Macpelá, ekteyapmakxa ekhem nak teyp Mamré, éltamhomaxchexa nak han ekwesey Hebrón, ekyetnama nak ma'a Canaán.

²⁰Apagkok axta aptáhak kaxwók Abraham ma'a xapop nak, tén han ma'a meteymog áxwa ekyetnama nak ma'a, apmésso axta ekha ekyánmaga hititas yaqwayam etnehek takhaxpop apagkok.