Read Lengua Sur Génesis 28 Bible Online

Génesis 28 - Lengua Sur bible

Génesis 28

¹Tén axta Isaac apcháneyáncha'a m'a Jacob, apkelmaxnéssessek axta aqsok éltaqmela, aptáhak axta apcháneya s'e: “Ná ema aqsa xama kelán'a enxoho s'e yókxexma nak Canaán.

²Emyekxa sa' ma'a Padán-aram, aphakxa nak apyáta' Betuel, ema sa' xama Labán apketche m'a, apyaha nak xép.

³Dios meyke ekhémo sa' epasmok xép, egkések sa' apxámokma apagko' aptawán'ák neptámen, yaqwayam sa' yenyék apkelánteyapma exchep apxámokma m'a pók aptémakxa nak chá'a énxet'ák.

⁴Elmések sa' xép aqsok éltaqmela, tén han ma'a aptawán'ák neptámen nak, apkeltennassama axta elmések ma'a Abraham, yaqwayam etnahagkok apagkok se'e xapop negheykegkaxa nak kaxwo', nentéma máxa énxet apkeleñama mók apkelókxa, hakte apkeltennassegkek axta Abraham ma'a.”

⁵Cháxa ektémakxa axta Isaac apcháphassama Jacob ma'a Padán-aram. Apweykmek axta Jacob ma'a Labán apxagkok, apketche axta m'a Betuel, apteme axta arameo, yáxeg axta m'a Rebeca, Jacob axta egken, tén han Esaú.

⁶Apya'ásegkok axta Esaú apkelmaxnéssessama axta aqsok éltaqmela Isaac ma'a Jacob, tén han apcháphassama axta m'a Padán-aram yaqwayam kalyamhapwók ma'a. Apya'ásegkok axta han neyseksa apkelmaxnéssesso axta aqsok éltaqmela m'a apyáp, apkeltémo memhehek xama kelán'a enxoho m'a Canaán,

⁷apya'ásegkok axta han apmaheykegko axta Jacob ma'a Padán-aram, eñama axta ekteme eyenagko m'a chána.

⁸Apyekpelchágwokmek axta Esaú apyáp megkamopmenyého kelán'ák nak Canaán;

⁹axta keñamak apye'eykekxo m'a Ismael, Abraham axta apketche, apmomchek axta m'a apketche kelwána ekwesey axta Mahalat, apyáxeg axta m'a Nebaiot, yetneyk axta eyke han mók apnaqteyegka'a kelán'ák Canaán.

¹⁰Apteyepmék axta Jacob ma'a Beerseba, appéwomo m'a ámay ekmahéyak nak Harán.

¹¹Apweykmek axta xama yókxexma, cham'a apteyenweykenxa axta han axta'a m'a, hakte yáqtésseykmek axta. Apmeyk axta xama meteymog ekhéyak axta m'a yókxexma nak, yaqwayam etnehek apteyamméyak, tén axta apyetna aptena.

¹²Cha'a ekwanmésakxa axta han apwet'a xama kélchántéyak néten eyeynamo m'a náxop nak, ekweykekxoho néten, apkelyetlánteyk axta chá'a apkelchexyekmo m'a Dios apkelásenneykha, apkeltaqháwok axta han chá'a.

¹³Apwet'ak axta han apkenmáncha'a xamo' Wesse' egegkok ma'a apkenmágkaxa axta apwanmagko, keñe han aptáha apcháneya s'e: “Ko'o sekteme Wesse', Dios apagkok nak ma'a apyáta' Abraham, tén han ma'a apyáp Isaac, agkések sa' ko'o exchep se'e xapop apyetnakxa nak, ekweykekxoho m'a aptawán'ák neptámen.

¹⁴Exámekxohok apagko' sa' ma'a, ekweykenxal'a ekxámokma xapop ánek keso náxop, ewomhok sa' ma'a nexcheyha, nepyeyam, teyapmakxa ekhem, tén han taxnegwánxa ekhem, xép sa' kañenták apasmok ma'a apyókxoho énxet'ák apheykha nak keso náxop, tén han ma'a aptawán'ák neptámen.

¹⁵Sekxegexma ko'o exchep, ataqmelchesek sa' chá'a m'a apmakókxa enxoho chá'a emhagkok, eyntementák sa' makham se'e xapop nak. Mayenyewek sa' aqsa chá'a meyke sélane m'a séltennassama nak chá'a alána'.”

¹⁶Apxatakha'ak axta Jacob, axta entáhak élchetama apwáxok se'e: “Naqso' neyke agkok apha Wesse' egegkok se'e yókxexma nak, keñe ko'o may'áseykegko.”

¹⁷Apkekawók apagko' axta, keñe axta ektáha apwáxok se'e: “Eyeymáxchexa neyke agkok se'e yókxexma nak. Neyke agkok Dios apxagkok se'e, átog ekmahéyak nak néten.”

¹⁸Axto'ók agko' axta apxatakha'a Jacob, apmákxeyk axta m'a meteymog apmeyncha'a axta aptáha apteyáyam, apkenegkáseyha axta ektémól'a m'a xama meteymog kélchenegkáseykha, apyegkenchek axta pexmok égmenek néten apteméssesa ekpagkanamaxche'.

¹⁹Apyetnegkek axta xama tegma apwányam xa yókxexma nak, kélteméssessama axta apwesey Luz, apyaqmagkassessek axta eyke apwesey m'a Jacob, Betel axta aptemessásekxak apwesey.

²⁰Cha'a apmésakxa axta han appeywa Jacob Wesse' egegkok, aptáha s'e: “Aptemék sa' agkok sekxegexma Dios, tén han setaqmelchesa enxoho neyseksa sekxega, segkésa enxoho sekto, tén han sélántaxneykekxa apáwa,

²¹sekwákxo enxoho meyke setnegweykmohoxma m'a táta apxagkok, tén sa' atnehek Dios ahagkok ma'a Wesse' egegkok.

²²Keso meteymog sénegkesa nak, ektémól'a meteymog kólchenegkesek, katnehek sa' Dios apxagkok; keñe sa' agkések chá'a exchep Dios, ekwayam nak chá'a diez ekyókxoho m'a aqsok ektáha nak chá'a exchep sélmésso.”