Read Lengua Sur Génesis 34 Bible Online

Génesis 34 - Lengua Sur bible

Génesis 34

¹Meyk'a axta táhak Dina kelán'a étkók ekheykha axta m'a yókxexma nak, Lía axta étche, Jacob axta apwetasso;

²apwet'ak axta han Siquem, apketche axta m'a Hamor, apteme axta heveo, apkemha apmonye' axta m'a yókxexma nak, apyennaqtéssek axta apyempehek appathetágko, apteméssessekmók axta exma.

³Apmenyeyk apagko' axta m'a, apkeltamhók axta kataqmalmakha awáxok kalano'.

⁴Keñe axta appaqhetchesa m'a apyáp Hamor, aptáhak axta apcháneya s'e: —Héntawagkas hana ko'o kelán'a étkok nak, émenyeyk atnehek etáwa'.

⁵Apleg'ak axta Jacob apteméssesseykmoho exma Siquem ma'a apketche Dina, apwanmeyáha axta eyke aqsa ekwokmoho apkelwa'akto m'a apketchek, hakte yókxexma axta apkelweynchámeyha apnaqlóncha'a aqsok apnaqtósso.

⁶Apyo'ókmek axta Hamor ma'a Jacob, apyáp axta m'a Siquem, yaqwayam elpaqhetchesakpoho'.

⁷Xama axta apkelwákxo Jacob apketchek apkelenyékto yókxexma, tén han apleg'a ektáhakxa', apkellókek axta, hakte asagkók agko' axta aptáhakxa Siquem nápaqta'awók ma'a énxet'ák Israel, apteméssessekmoho exma m'a Jacob apketche. ¡Hakte axta kapayhawok chá'a kalanaxchek xa ektéma nak!

⁸Apkelpaqhetchessek axta Hamor ma'a, aptáhak axta apkeláneya s'e: —Apmenyeyk apagko' hatte Siquem ma'a kélyáxeg nak kéxegke. Kólmés sa' yaqwayam etnehek aptáwa'

⁹kólteme sa' negko'o egnámakkok kéxegke, keñe sa' negko'o ólmagkok kélketchek nak kéxegke, tén sa' kéxegke kólmagkok ma'a egketchek nak negko'o.

¹⁰Keñe sa' kólhakha chá'a negyeseksa negko'o kélmakókxa enxoho chá'a kólhakha; kólhakha sa' ma'a, kólyánmagkasaxchek sa' han, kólmagkok sa' chá'a xapop kélagkok kélagko'.

¹¹Keñe axta Siquem aptáha apcháneya Dina yáp se'e, tén han ma'a kelyapma nak: —Kalkoho sa' kélwáxok sektáhakxa'. Almések sa' chá'a m'a aqsok sélmaxneyakxa enxoho.

¹²Ennókek sa' eykhe katnehek kéltémo ayánmagkasek ekyaqmageykekxa', xámok sa' eykhe han katnehek sélmaxnagko kéltémo almések aqsa aqsok, almések sa' eyke; hélho sa' ko'o amok ma'a kelán'a étkok nak.

¹³Apkelátegmowágkek axta Jacob apketchek ma'a Siquem tén han ma'a apyáp Hamor, apkelyexancháseyha axta eyke, hakte axta ñémékxa apmáheyo exnésseshok mók apteméssesseykmoho exma m'a Dina.

¹⁴Aptáhak axta apcháneya s'e: —Mogwanchek negko'o agmések egyáxeg xama énxet megkólyenyekhássesso nak nekha apyempehek, hakte hegmegqaksohok negko'o meyke nak kélteméssesso xa ektáha nak.

¹⁵Wánxa eyke aqsa chá'a negko'o agmések kéltáha enxoho chá'a nentémakxa nak negko'o: kólyenyekhássesagkok nekha apyempe'ék apyókxoho apkelennay'a apheykha nak kélnepyeseksa kéxegke.

¹⁶Keñe sa' ólmésagkok chá'a negko'o egketchek yaqwayam kóltamhagkok kélnaqteyegka'a, tén sa' negko'o ólmagkok han ma'a kélketchek nak kéxegke; aghakha sa' chá'a kélnepyeseksa kéxegke, keñe sa' xama antemekxak nempeywomo xamo'.

¹⁷Sa' agkok kalchak kélwáxok nentáhakxa negáneya yaqwayam kólyenyekhássesagkok chá'a nekha kélyempe'ék, ólántépok sa' aqsa, agyentamok sa' han ma'a egyáxeg.

¹⁸Leyawók axta apwáxok kéltáhakxa kéláneya m'a Hamor tén han ma'a apketche Siquem.

¹⁹Yetlókok axta apkeltémo kólyenyekhássesek apyempehek ma'a wokma'ák nak, hakte apmenyeyk apagko' axta m'a Jacob apketche. Ekha kéláyo axta han Siquem nepyeseksa m'a apyáp apnámakkok,

²⁰apmeyákxeyk axta yetlo apyáp Hamor ma'a átog nak tegma apwányam, élánamáxchexa axta chá'a amya'a aqsok kélyenyeykekxa', axta aptáhak apkeláneya énxet'ák se'e:

²¹—Egnámakkok se'e énxet'ák nak, exmakha sa' han se'e, elyánmagkasakpok sa' han se'e, hakte awanhek xapop egagkok yaqwayam exmakha; egwanchek sa' han ólmagkok negko'o m'a apketchek kelwán'ák nak, tén sa' elmagkok han ma'a egketchek nak negko'o.

²²Wánxa eyke aqsa apmako exmakha negyeseksa negko'o yaqwayam etnekxak xama nempeywomo xamo': kélyenyekhassásegko enxoho apyempe'ék ma'a apyókxoho apkelennay'a apheykha nak negyeseksa, aptamheykegkaxa nak chá'a m'a.

²³Egagkok sa' antéhek ma'a ekyókxoho aqsok apagkok, tén han ma'a apnaqtósso nak. Wánxa eyke aqsa negko'o eyeyméxko ólyahakxoho', keñe sa' exmakha negyeseksa.

²⁴Leyawók axta han apwáxok aptáhakxa apkeláneya Hamor tén han Siquem ma'a apyókxoho apkelennay'a apheykha axta tegma apwányam, kélyenyekhassásegkek axta nekha apyempe'ék.

²⁵Apkelmeyákxeyk axta eyke tegma apwányam ekwokmo ántánxo ekhem ma'a Simeón tén han Leví, Jacob axta apketchek, kelyapma axta m'a Dina, megkamassakxa axta makham élmáske kélyenyekhássesso nekha apyempe'ék ma'a apkelennay'a nak, yetlo sókwenaqte apagkok axta aptáhak apkelnapa m'a apyókxoho, hakte méko axta élenmexákxo.

²⁶Sókwenaqte axta apkelyetxeyk apchaqha m'a Hamor, yetlo apketche Siquem; tén axta Dina kéltekkesa m'a Siquem apxagkok, yetlókok axta han apkeltaqhémo.

²⁷Apkelwokmek axta han ma'a pók apketchek axta Jacob, apkelyeykhágkek axta aphopák ma'a aptekyawa axta, apkelmenyexchásegko aqsok apagkok ma'a énxet'ák, yaqwayam exnésseshok mók kélteméssesseykmoho exma m'a apyáxeg.

²⁸Appakha'ak axta apnaqlákxo m'a nepkések, weyke, yámelyeheykok, tén han ma'a ekyókxoho aqsok ekhéyak nak tegma apwányam, tén han ma'a yókxexma;

²⁹apkelmenyexágkek axta ekyókxoho aqsok ekhéyak axta m'a tegma, apkelmeyk axta han apnaqlákxo m'a sakcha'áletkók, tén han kelán'ák.

³⁰Keñe axta Jacob aptáha apkeláneya Simeón tén han Leví s'e: —Asagkek kéxegke sélteméssesakxa'. Hetaqnók sa' ko'o kaxwók énxet'ák apheykha nak se'e yókxexma nak, cham'a cananeos, tén han ferezeos. Épetchekxak sa' pók hénmexek ko'o, tén sa' hektámegma', heyaqhek sa' ko'o tén han ma'a ekheykha nak exagkok, hakte apqántawok ko'o énxet'ák ahagkok.

³¹Aptáhak axta apkelátegmowágko s'e: —¿Óghoya negko'o katnehek egyáxeg ma'a ektémakxal'a kelán'a ekyaqmagkáseyak pók énxet ekpathetéyak ektegye selyaqye?