Read Lengua Sur Génesis 35 Bible Online

Génesis 35 - Lengua Sur bible

Génesis 35

¹Aptáhak axta Dios apcháneya Jacob se'e: “Yempekxa néten, emyekxa sa' exnakxak ma'a Betel. Hélánessekxa sa' xama ekwatnamáxchexa aqsok ma'a, ko'o sektáha nak Dios, sekxekmowásamáxkoho axta apyexánegkessama axta m'a apepma Esaú.”

²Keñe axta Jacob aptáha apkeláneya ekheykha apxagkok, tén han ma'a apyókxoho ektáha axta apkelxegexma'a: —Kólchexa sa' ekyókxoho aqsok kéláyókxa éleñama nak mók nekha, ekhéyak nak kélnepyeseksa kéxegke, kólyaqpasák yegmen, kólyaqmagkasák sa' han pók kélnaqta.

³Ólmeyekxak sa' ma'a Betel, hakte sa' alánessekxak ko'o ekwatnamáxchexa aqsok Dios ma'a, sepasmoma axta neyseksa ekyentaxno ewáxok, sétleykencha'a axta chá'a sekmakókxa enxoho chá'a amhagkok.

⁴Apkelmeyásekxeyk axta ekyókxoho Jacob ma'a aqsok kéláyókxa éleñama nak mók nekha, ekhéyak nak apxagkok, tén han kélchenméhe kélchexanma axta chá'a m'a kélheyk'ák, apkelátawanyeyk axta han Jacob ma'a kóneg nak yámet ekyawe émha nak ma'a ketók Siquem.

⁵Xama axta apkelánteyapma m'a, apkeltémók axta yeyk Dios ma'a apyókxoho énxet'ák apheykha nak neyáwa apheykegkaxa', axta keñamak megkólamheykegko m'a Jacob apketchek.

⁶Apweykekxeyk axta Jacob ma'a tegma apwányam Luz, yetlo m'a apyókxoho énxet'ák ektáha axta apkelyetleykekxa', cham'a tegma apwányam apwesey axta han Betel, apyetnama nak Canaán.

⁷Apkelanak axta xama ekwatnamáxchexa aqsok, apteméssessek axta han ekwesey El-betel xa yókxexma nak, hakte apxekmowásamákpók axta Dios apmaheykegko axta apxegánegkessama apepma m'a.

⁸Axta ketsapmak han Débora m'a, kelán'a ektáha axta chá'a ektaqmelchesso m'a Rebeca, kélátawanyegkek axta han ma'a kóneg nak yámet ekyawe encina, keto' nak Betel. Apteméssessegkek axta ekwesey Jacob xa yókxexma nak “Yámet ekyawe encina nenlekxagweykegkaxa'.”

⁹Xama axta aptaqhémo Jacob apkeñama m'a Padán-aram, apxekmowásamákpekxók axta makham ma'a Dios, tén axta ektaqmeleyncha'a appeywa Dios

¹⁰aptáha s'e: “Jacob xép apwesey, kamaskok sa' eyke eltamhakpok xa ektáha nak; Israel sa' etnehek apwesey s'e sakhem nak.” Natámen apyaqmagkassesso axta apwesey Dios ma'a Jacob,

¹¹aptáha apcháneya s'e: “Ko'o sekteme Dios ekha apyennaqte; exámásekxa sa' apketchek, tén han aptawán'ák neptámen. Xeyep sa' kañék apteyapma énxet'ák, tén han apxámokma pók aptémakxa énxet'ák, elántépok sa' apkelwesse'e apkelwányam nepyeseksa m'a aptawán'ák neptámen.

¹²Agkések sa' xépxa m'a xapop sekméssama axta m'a Abraham, tén han Isaac, keñe sa' aptawán'ák neptámen agkések neptámen xép.”

¹³Xama axta aptaqháwo Dios apkenyékto m'a yókxexma appaqhetchesakxa axta m'a Jacob,

¹⁴apmeyk axta xama meteymog tén axta apkenegkesa, ektémól'a m'a xama meteymog kélchenegkessól'a, cham'a yókxexma appaqhetchesakxa axta Dios; keñe axta apteméssesa ekpagkanamaxche apkexpaqha'a m'a pexmok égmenek, tén han anmen yámet égmenek,

¹⁵Betel axta han aptemessásak ekwesey xa yókxexma nak.

¹⁶Tén axta apkelxega apkeleñama m'a Betel; yáma tayeypók axta makham Efrata, peya axta katnehek naqláwa Raquel, legeykegkók axta eyke ekmáheyo katnehek naqláwa.

¹⁷Xama axta ekyágwokmo eklegeykegkoho yaqwayam katnehek naqláwa, axta táhak eyáneya kelán'a ektegkessesso axta chá'a mók étche s'e: “Nágkatneykha aqsa awáxok, apkenna makham se'e sakcha'a ektegkesa nak.”

¹⁸Ketók étsapmakxa axta han, amonye' ektaxneykekxa énnama axta ekteméssesa apwesey Ben-oní m'a sakcha'a nak, Benjamín axta eyke aptemessásak apwesey m'a apyáp.

¹⁹Ketsekkek axta m'a Raquel, kélátawanyeyk axta m'a ámay nak Efrata, ekwesey nak kaxwók Belén.

²⁰Apkenegkessek axta han Jacob xama meteymog ma'a takhaxpop agkok nak, makhemek makham émha xa magkenatchesso takhaxpop agkok ma'a Raquel.

²¹Apxegeykekxeyk axta makham ma'a Israel, appakxenweykmek axta m'a teyp nak tegma néten apwenaqte Éder.

²²Apheykmek axta Israel ma'a yókxexma nak, apya'áyekmek axta Rubén appatheteykegko m'a Bilhá, kelán'a apmeykha naqsa axta m'a apyáp. Aplókók apagko' axta han apleg'a m'a apyáp. Doce axta apyókxoho apketchek ma'a Jacob.

²³Keso Lía axta étchek se'e, Jacob axta apwetasso: Rubén, étche átnaha apketkok; Simeón, Leví, Judá, Isacar, tén han ma'a Zabulón.

²⁴Keñe axta Raquel étchek apwetasso m'a Jacob: José, tén han Benjamín.

²⁵Keñe axta Bilhá étchek, Raquel axta éláneykha, apwetasso axta m'a Jacob: Dan tén han Neftalí;

²⁶tén axta Zilpá étchek, Lía axta éláneykha, apwetasso axta m'a Jacob: Gad tén han Aser. Cháxa Jacob apketchek axta xa, appalleyam axta m'a Padán-aram.

²⁷Apteyánegweykekxók axta Jacob ma'a apyáp Isaac, cham'a yókxexma Mamré, tegma apwányam apwesey axta han Arbá, tén han Hebrón, apheykegkaxa axta m'a Abraham tén han Isaac.

²⁸Ciento ochenta apyeyam apagkok axta weykmok Isaac apketsapma.

²⁹Appáxaqweykekxeyk axta apyapmeyk nano', aptéma apwányamók apagko', apchátawanyeyk axta m'a apketchek, Esaú, tén han Jacob.