Read Lengua Sur Génesis 36 Bible Online

Génesis 36 - Lengua Sur bible

Génesis 36

¹Keso Esaú aptawán'ák neptámen se'e, apwesey axta han Edom.

²Apkelmomchek axta Esaú kelán'ák Canaán: cham'a Adá, Elón axta apketche, apteme axta hitita; tén han ma'a Oholibamá, Aná axta apketche, Sibón axta aptáwen, apteme axta heveo;

³tén axta han ma'a Basemat, Ismael axta apketche, Nebaiot axta apyáxeg.

⁴Elifaz axta apwesey étche m'a Adá, apwetasso axta m'a Esaú; keñe axta Basemat ekweteya m'a Reuel;

⁵keñe axta Oholibamá ekweteya étchek, cham'a Jeús, Jaalam, tén han Coré. Cháxa apketchek axta Esaú, appalleyam axta m'a aphakxa axta Canaán.

⁶Apmaheykegkek axta mók yókxexma Esaú, apyamasma m'a apyáxeg Jacob, apnaqlókek axta m'a apnaqteyegka'a, apketchek apkelennay'a tén han kelwán'ák, keñe han ma'a apyókxoho apkelxegexma'a. Apnaqlókek axta m'a ekyókxoho aqsok apnaqtósso, tén han ekyókxoho aqsok apwetágwayam axta m'a Canaán,

⁷xámokmeyk axta aqsok apagkok xa apqánet nak, massegkek axta apmopwána exek xamók pók; ketsék axta han yókxexma m'a apheykegkaxa, axta kaxnémok chá'a ektéyak ma'a apnaqtósso.

⁸Axta keñamak apheykmo yókxexma élámhakxa nak meteymog élwenaqte Seír ma'a Esaú, apwesey nak han Edom.

⁹Keso Esaú axta aptawán'ák neptámen se'e, apyapmeyk nano' axta m'a edomitas, apheykencha'a axta m'a yókxexma élámhakxa nak meteymog élwenaqte m'a Seír.

¹⁰Keso apkelwesey axta Esaú apketchek se'e: Elifaz, Adá axta étche, tén han Esaú; keñe han ma'a Reuel, Basemat axta étche, apketche axta han ma'a Esaú.

¹¹Keso Elifaz axta apketchek se'e: Temán, Omar, Sefó, Gatam, tén han Quenaz.

¹²Yetneyk axta han kelán'a apmeykha naqsa m'a Elifaz, ekwesey axta Timná; wetassegkek axta han xama apketche apwesey axta Amalec. Cháxa atawán'ák natámen axta Adá xa, mók aptáwa' axta m'a Esaú.

¹³Keso Reuel apketchek axta s'e: Náhat, Zérah, Samá, tén han Mizá; cháxa atawán'ák natámen axta m'a Basemat, mók aptáwa' axta han ma'a Esaú.

¹⁴Oholibamá axta han ekwesey mók aptáwa' m'a Esaú, keso apketchek axta ekwetasso s'e: Jeús, Jaalam, tén han Coré. Aná axta apketche xa, keñe axta aptáwen ma'a Sibón.

¹⁵Keso apkelámha apmonye'e axta chá'a Esaú aptawán'ák neptámen, Elifaz axta aptawán'ák neptámen, apketche átnaha apketkok axta m'a Esaú: Temán, Omar, Sefó, Quenaz,

¹⁶Coré, Gatam, tén han Amalec. Cháxa ektáha axta chá'a apkelámha apmonye'e Elifaz aptawán'ák neptámen ma'a yókxexma Edom, Adá axta atawán'ák natámen xa apyókxoho nak.

¹⁷Keñe axta Reuel apketchek, Esaú axta han apketche, keso apkelámha apmonye'e axta s'e: Náhat, Zérah, Samá, tén han Mizá. Cháxa aptáha axta apkelámha apmonye'e Reuel aptawán'ák neptámen ma'a yókxexma Edom, Basemat axta atawán'ák natámen, aptáwa' axta m'a Esaú.

¹⁸Keñe axta Oholibamá étchek, Aná axta apketche, aptáwa' axta m'a Esaú, keso apkelámha apmonye'e axta s'e: Jeús, Jaalam, tén han Coré.

¹⁹Esaú axta aptawán'ák neptámen xa apyókxoho nak, mók apwesey axta han Edom, apkelámha apmonye'e axta chá'a nepyeseksa énxet'ák apagkok.

²⁰Keso apketchek axta Seír apteme nak horeo, aphama axta m'a yókxexma nak: Lotán, Sobal, Sibón, Aná,

²¹Disón, Éser, tén han Disán. Cháxa apkelámha apmonye'e apagkok axta chá'a m'a horeos, Seír axta aptawán'ák neptámen, apkeleñama axta m'a Edom.

²²Keso Lotán axta apketchek se'e: Horí, tén han Hemam. Lotán axta apyáxeg kelwána m'a Timná.

²³Keso Sobal axta apketchek se'e: Alván, Manáhat, Ebal, Sefó, tén han Onam.

²⁴Keso Sibón axta apketchek se'e: Aiá, tén han Aná. Aná axta apwete ekteyapmakxa yegmen ma'a meykexa énxet, neyseksa apkeláneseykha apyáp Sibón apnaqtósso yámelyeheykok.

²⁵Apweteyak axta han xama apketche m'a Aná, apwesey axta Disón, tén han xama apketche kelwána ekwesey axta Oholibamá.

²⁶Keso Disón axta apketchek se'e: Hemdán, Esbán, Itrán, tén han Querán.

²⁷Keso Éser axta apketchek se'e: Bilhán, Zaaván, tén han Acán,

²⁸Keso Disán axta apketchek se'e: Us, tén han Arán.

²⁹Keso apkelámha apmonye'e apagkok axta énxet'ák horeos se'e: Lotán, Sobal, Sibón, Aná,

³⁰Disón, Éser, tén han Disán. Cháxa apkelámha apmonye'e énxet'ák horeos xa, ektáhakxa nak chá'a aphawóxama apagko' ma'a yókxexma nak Seír.

³¹Keso apkelwesse'e apkelwányam apmonye'e axta m'a Edom, meykexa axta makham wesse' apwányam apagkok ma'a israelitas:

³²Bela, Beor axta apketche, apteme axta wesse' apwányam ma'a Edom, Dinhaba axta apwesey m'a tegma apwányam apagkok.

³³Xama axta apketsapa m'a Bela, keñe apyaqmagkasa apteme wesse' apwányam ma'a Jobab, Zérah axta apketche, apkeñama axta m'a Bosrá.

³⁴Xama axta apketsapa m'a Jobab, keñe apyaqmagkasa apteme wesse' apwányam ma'a Husam, apkeñama axta m'a yókxexma Temán.

³⁵Xama axta apketsapa m'a Husam, keñe apyaqmagkasa apteme wesse' apwányam ma'a Hadad, Bedad axta apketche, ektáha axta apmenxenma énxet'ák Madián ma'a yókxexma nak Moab; Avit axta apwesey m'a tegma apwányam apagkok.

³⁶Xama axta apketsapa m'a Hadad, keñe apyaqmagkasa apteme wesse' apwányam ma'a Samlá, apkeñama axta Masrecá.

³⁷Xama axta apketsapa m'a Samlá, keñe apyaqmagkasa apteme wesse' apwányam ma'a Saúl, apkeñama axta yókxexma Rehobot, cham'a ekyetnama nak neyáwa wátsam.

³⁸Xama axta apketsapa m'a Saúl, keñe apyaqmagkasa apteme wesse' apwányam ma'a Baal-hanán, Acbor axta apketche.

³⁹Tén axta apketsapa han ma'a Baal-hanán, keñe apyaqmagkasa apteme wesse' apwányam ma'a Hadad; Pau axta apwesey m'a tegma apwányam apagkok. Mehetabel axta ekwesey aptáwa' m'a Hadad, Matred axta apketche, aptáwen nak Mezaab.

⁴⁰Keso apkelwesey axta Esaú apnámakkok, ektáhakxa nak chá'a aphawóxama apagko', tén han yókxexma, keñe han ma'a apkelwesey: Timná, Alvá, Jetet,

⁴¹Oholibamá, Elá, Pinón,

⁴²Quenaz, Temán, Mibsar,

⁴³Magdiel, tén han Iram. Edom axta han mók apwesey Esaú, cháxa apkelámha apmonye'e axta Edom xa, apheykha axta chá'a m'a yókxexma apheykegkaxa axta chá'a, tén han ektáhakxa axta chá'a apagkok.