Read Lengua Sur Génesis 40 Bible Online

Génesis 40 - Lengua Sur bible

Génesis 40

¹Keñe axta natámen xa, aplókassama wesse' apagkok ma'a apyátegkesso nak chá'a anmen yámet égmenek ma'a wesse' apwányam, tén han apkelánesso nak chá'a kelpasmaga, cham'a wesse' apwányam nak Egipto.

²Apkeltaqnaweygkek axta wesse' apwányam faraón xa apqánet apkeláneykha nak, cham'a apkemha apmonye' nak apyátegkesso chá'a m'a apyá, tén han ma'a apkemha apmonye' nak chá'a apkelánesso kelpasmaga apagkok,

³apkelaphássek axta kólxátawók kañe' negmomaxchexa apxagkok axta m'a apkemha apmonye' sẽlpextétamo apagkok, ekyetnamakxa axta m'a sẽlaqxegkessamakxa kañe' negmomaxchexa, kélhésseykenxa axta han ma'a José.

⁴Apkeltamhók axta etnehek apkeláneykha apkemha apmonye' sẽlpextétamo José xa faraón apkeláneykha nak, wenaqtémók axta han apheykha kañe' negmomaxchexa.

⁵Xama axta'a axta han apwet'ak apwanmagko xa apqánet apkelmomap nak, cham'a apyátegkesso nak chá'a apyá wesse' apwányam, tén han ma'a apkelánesso nak chá'a kelpasmaga, yetneyk axta han chá'a ektémakxa apwanmagko xama.

⁶Axto'ók axta apteyánegwa'aktámho José, apkelwetágwa'akteyk axta élyaqhápeyncha'a apkelwáxok;

⁷aptáhak axta apkelmaxneyáncha'a s'e: —¿Yaqsa ektáha élyenneyncha'a nak kélwáxok sakhem?

⁸—Negwet'ak xeyk negko'o nélwanmagko, méko eyke énxet yaqwayam enxoho hẽltennaksek ektémakxa' —axta aptáhak apkelátegmowágko. —Dios akke aqsa apwanchek hẽltennásekxohok ektémakxa nélwanmagko —axta aptáhak José—. Héltennés sa' yaqsa élwanmésa.

⁹Keñe axta apkemha apmonye' apyátegkesso apyá wesse' apwányam apkeltennasa José m'a ektáhakxa apwanmagko, aptáhak axta s'e: —Ekwet'ak xeyk ko'o sekwanmagko xama anmen yámet kélcheneykekxa',

¹⁰ántánxo aktegák. Keltektekkek axta m'a anmen yámet, kelyapwa'ak axta han, ekyexna ekmakhetmo axta han tamhákxak ma'a exnamok nak.

¹¹Ekmáha axta ko'o m'a faraón nak egheykok apagkok, élyaqhapchek axta m'a anmen yámet ekyexna sekyetma m'a egheykok, ekméssek han ma'a faraón.

¹²Aptáhak axta apcháneya José s'e: —Keso temék xép apwanmagko s'e: Ántánxo axchakkok nak ekteme ántánxo ekhem.

¹³Wokmek sa' agkok ántánxo ekhem, kaxénwók sa' xép apwáxok ma'a faraón, egkeyásekxak sa' makham ma'a aptamheykha, eyátegkásekxak sa' makham apyá m'a faraón, aptémakxa axta chá'a m'a nanók axta.

¹⁴Temék sa' agkok xép xa ektáha nak, kaxén sa' apwáxok ko'o, hepaqhetchesses sa' ma'a faraón, yaqwayam sa' hetekkesek ko'o s'e kañe' nak. ¡Yepyósho sa' hélanok ko'o!

¹⁵Kélyennaqtéssegkek axta ko'o kélyempehek sekmomaxko m'a hebreo apchókxa nak, megkapayhawok ko'o axek negmomaxchexa', hakte malaneyk ko'o aqsok ekmaso.

¹⁶Xama axta apwet'a ekpayhawo apkeltennáseykha apwanmagko José pók ma'a apkemha apmonye' nak apkelane kelpasmaga. Aptáhak axta apcháneya s'e: —Ewanméssek xeyk ko'o ántánxo hówenaq apxagkok étkok kélxata kelpasmaga apkelmópeyo séxna épátek.

¹⁷Apkelpaxqamap apkelpayhe axta han kélxata m'a netno nak hówenaq apxagkok étkok, apmápsesa nak chá'a etwok ma'a faraón, kelyáqwa'akteyk axta eyke chá'a ektáswa'akto nátetkók ma'a kañe' nak hówenaq apxagkok étkok, ekyetno axta néten épátek.

¹⁸Tén axta José aptáha apchátegmowágko s'e: —Keso temék xép apwanmagko s'e: ántánxo hówenaq apxagkok étkók ekteme ántánxo ekhem,

¹⁹wokmek sa' agkok ántánxo ekhem, kaxének sa' apwáxok xép ma'a faraón, yának sa' kólmakhésha néten yámet, keñe sa' máma etwok aphápetek.

²⁰Wokmek axta ántánxo ekhem, ekwokmo axta apteyeykemxa m'a faraón, apkelánessek axta ektámáxche ekyawe agko' apyókxoho apkeláneykha. Apkeltamhók axta kólántekkessekxak kañe' negmomaxchexa m'a apkemha apmonye' nak apkelyátegkesso chá'a apyá, tén han ma'a apkemha apmonye' apkelánesso kelpasmaga, nápaqta'awók ma'a ektáha axta apkeláneyeykha.

²¹Apmeyásekxeyk axta makham aptamheykha m'a apyátegkesso axta chá'a apyá, apkelyátegkásekxeyk axta makham apyá faraón, ektémakxa axta chá'a m'a nanók axta;

²²keñe m'a apkelánesso axta chá'a kelpasmaga apkeltamho kólmakhésha néten, ekhawo m'a aptáhakxa axta apxeyenma m'a José.

²³Massegkek axta eyke ekxeyenma apwáxok José m'a apyátegkesso axta chá'a apyá wesse' apwányam.