Read Lengua Sur Génesis 44 Bible Online

Génesis 44 - Lengua Sur bible

Génesis 44

¹Tén axta José aptáha apcháneya apkemha apmonye' apkeláneykha axta chá'a m'a apxagkok: —Exátegkesák sa' yágkentamáhak apagkok hótáhap apaktek se'e énxet'ák nak, cham'a ekwánxa enxoho apkepwagkexa elsakxa', exátegkesák sa' han chá'a selyaqye xama m'a yágkentamáhak apagkok átog nak.

²Yaqxegkesses sa' han yágkentamáhak apagkok egheykok ahagkok sawo ekmope ekmomnáwa m'a apyáxeg apsexyo nak, yetlo m'a selyaqye apagkok apyánmagkasso nak hótáhap apaktek. Aptemék axta han apkemha apmonye' m'a apkeltamhókxa axta etnehek ma'a José.

³Keñe axta élsaka, apméssek axta yaqwayam eltaqhekxak apkelpepma José, yetlo apkelchánte yámelyeheykok.

⁴Axta han elwegkepákxak apkeltaqhákxo, ketók axta makham ma'a tegma apwányam, keñe axta aptáha apcháneya José apkemha apmonye' apchásenneykha s'e: —Elemhagkokxa hana m'a énxet'ák nak, sa' etnehek elának apkeltahanyékxo enxoho s'e: ‘¡Tásek axta ko'o sekteméssesakxa kéxegke, keñe kéxegke asagkek sélteméssesakxa'! ¿Yaqsa ektáha kélmenyexa nak egheykok sawo ekmope ekmomnáwa nak

⁵apmeykencha'awól'a chá'a wesse' ahagkok ének apyá, tén han ey'asagkohok yaqwánxa katnehek? ¡Asagkók agko' kéltáhakxa!’

⁶Xama axta apkeltahanyékxo apkemha apmonye' kélásenneykha, apkeltennássek axta m'a ektáhakxa axta amya'a apxawe,

⁷aptáhak axta apkelátegmowágko s'e: —¿Yaqsa ektáha aptáha nak xép sẽláneya xa ektáha nak? ¡Mantemék negko'o xama enxoho xa ektáha nak!

⁸Nélsánteyk axta makham negko'o m'a selyaqye néleñama Canaán, nélwete axta m'a kañe' yágkentamáhak egagkok, mogwanchek negko'o ólmenyexchesek sawo ekmope tén han sawo ekyátekto ekmomnáwa m'a wesse' apagkok apxagkok nak.

⁹Tásek ematñekxak enxama negko'o nentáha nak xép apkeláneykha, kélwetasakxa enxoho m'a egheykok, keñe negko'o antéhek apkelásenneykha naqsa.

¹⁰Keñe axta apkemha apmonye' aptáha apkeláneya s'e: —Katnehek sa' ma'a kéltáhakxa nak kéxegke, sa' eyke aqsa atnehek seyásenneykha naqsa m'a kélwetasakxa enxoho egheykok; keñe sa' kélnápakha kóltaqhekxa'.

¹¹Apkelápaqháha axta han apkelhaxyawásegko yágkentamáhak apagkok apnegkenágko náxop, apkelmeykeságkek axta.

¹²Apkellexcháha axta apkemha apmonye' xama chá'a m'a yágkentamáhak, axta apkeynawók ma'a apwányam nak, ekweykekxoho m'a apsexyo nak, apwetágwokmek axta egheykok ma'a Benjamín axta yágkentamáhak apagkok.

¹³Tén axta apkelyeptégko apkelántaxno magkenatchesso éllapwámegko. Apkelpátegkásekxeyk axta makham yámelyeheykok ma'a yágkentamáhak apagkok, tén axta apkelmeyákxo makham ma'a tegma apwányam.

¹⁴Xama axta apwákxo Judá yetlo apkelyáxeg tén han apkelpepma m'a José apxagkok, apheyk axta makham José m'a. Apkelháxahágkek axta nápaqto' ekwokmoho apkeltekxeya élpayhakxa nápaqta'a xapop,

¹⁵aptáhak axta apkeláneya José s'e: —¿Yaqsa aqsok kéllana? ¿Yagkólya'ásegkok xama énxet sekhawo nak ko'o sekmowána ay'asagkohok yaqwánxa katnehek?

¹⁶Aptáhak axta Judá apchátegmowágko s'e: —¡Méko negko'o antéhek agának xép! ¿Háxko antéhek negko'o anxekmósek xép megkatnaha nenteme? Apweteyak negko'o Dios nenláneya mólya'assáxma. Keso negchaqnáncha'a negko'o s'e; negko'o nenteme apkelásenneykha naqsa, tén han ma'a kélwetasa nak egheykok.

¹⁷Aptáhak axta apcháneya José s'e: —Matnéssesek sa' xa ektáha nak. Sa' eyke aqsa atnehek seyásenneykha naqsa m'a kélwetasa nak egheykok. Keñe sa' kélnápakha nak kóltaqhekxa aqsa kólmeyekxak ma'a kélyáp apxagkok nak. Méko sa' kalya'aksek exma.

¹⁸Apyepetchegwokmók axta Judá m'a José, aptáhak axta apcháneya s'e: —Wesse', peyk eykhe apaqhetchesek xép ektaqmalma agko', náhetaqnow aqsa, hakte aphawók xép ma'a faraón.

¹⁹Ẽlmaxneyáha axta exchep yetnéya egyáp essenhan pók egyáxeg,

²⁰keñe axta negko'o negátegmowágko néltennasa apha egyáp apwányamo, tén han pók egyáxeg apketkok apagko', aptéyam axta aptéma apwányamók ma'a egyáp nak. Néltennássek axta han apchásekhayo apagko' ma'a egyáp nak, hakte wánxa axta xama apkeymomákpo apketche apagko' egken xamo' ma'a, hakte apketsepmeyk ma'a pók apepma axta.

²¹Keñe axta exchep apkeltémo agyentementa', hakte apmenyeyk axta éta'.

²²Néltennássek axta exchep mopwanchek eyenyók apyáp ma'a wokma'ák nak, hakte apyenyókek agkok ma'a, yetsapok ma'a apyáp.

²³Apxénchek axta eyke exchep mehẽlmehek chá'a takha' mehẽlyetlánto enxoho negko'o m'a.

²⁴Néltennáseyha axta negko'o ekyókxoho nélwákxo aphakxa egyáp ma'a aptáhakxa axta exchep sẽláneya.

²⁵Tén axta aptáha makham sẽláneya negko'o egyáp se'e: ‘Kóltaqhoho makham kóltegyágwakxak ekha ekyánmaga hótáhap apaktek’;

²⁶keñe negko'o nentáha negáneya s'e: ‘Mogwanchek ólxog mehẽlyetlákxo enxoho negko'o egyáxeg apsexyo; hakte agkok negko'o hẽlyetláwak xa, mogwanchek agwetak ma'a énxet nak.’

²⁷Aptáhak axta sẽláneya egyáp se'e: ‘Kélya'ásegkok kéxegke etáwa' segkéssama ko'o apqánet étchek;

²⁸xama eyke exyánegkessók, móteyeykekxohok chá'a, aqsok nawhak eklo kexa chaqhék, keñe ektama.

²⁹Kélyentegkek agkok han se'e pók nak hatte, keñe m'a ektemégwokmoho enxoho exma, kéxegke sa' hélsexnenak watsapok eñama sélapwayam, ko'o sektáha nak sekwányamo.’

³⁰Apmenyeyk apagko' táta m'a wokma'ák nak, agkok hẽlyetlákxak negko'o néltaqháwo enxoho makham xa wokma'ák nak,

³¹yetsapok mét'a enxoho m'a egyáp. Negko'o sa' ansexnenak yetsapok élapwayam ma'a egyáp apwányam.

³²Éltennássek axta ko'o táta yaqwayam atnehek sektaqmelchesso m'a wokma'ák nak, keñe sektáha han seyáneya s'e: ‘Sa' agkok eyntegkásenták makham aphakxa, ko'o sa' asexnánéxchek nápaqtók xép, ekweykmoho ektemegwánxa néxa sekha.’

³³Hexneyásekxa ko'o yaqwayam atnehek apchásenneykha naqsa, sekyaqmagkasso m'a wokma'ák nak. Yána elyetlakxak apkelpepma m'a.

³⁴¡Háxko atnehek ko'o awakxak aphakxa táta mehetlákxo enxoho xa wokma'ák nak! Mómenyeyk ko'o ótak káhapwak ekyentaxno apha m'a táta.’