Read Lengua Sur Génesis 49 Bible Online

Génesis 49 - Lengua Sur bible

Génesis 49

¹Apkelwóneyha axta apketchek Jacob, aptáhak axta apkeláneya s'e: “Hélyepetchegwatámho, altennaksek sa' ko'o yaqwánxa katnehek kéxegke s'e egmonye' nak:

²“Hélyepetchegwatámho yaqwayam kóleyxhok sekpeywa, étchek ko'o sektáha nak kélyáp Jacob, kóleyxho sa' sekpeywa ko'o sektáha nak kélyáp Israel.

³“Xép Rubén apteme hatte átnaha apketkok, apmonye' apteyapma eñama sekwasqapma, apmonye' apteme ekha kéláyo, tén han apyennaqte.

⁴Kamaskok sa' eyke apteme apmonye', hakte aphawók xép ma'a yegmen ényé megkólmowána nak kólmagkok: hakte aptawáseykha axta exchep sekyetnamakxa néten, appatheteykegko m'a kelán'a sekmeykha naqsa axta.

⁵“Apyáxeg xamo' Simeón ma'a Leví; ekyetno ekyógkexma m'a apkelmeykha nak.

⁶¡Mómenyeyk ko'o axek ma'a apchaqneykekxexa nak chá'a! Hakte apkellókek axta agkok chá'a m'a, elnápok axta chá'a énxet'ák, elyaqténchesagkok axta chá'a áhak ayay'ák ma'a weyke kelennay'awo', hakte atsek axta chá'a etnahagkok xa ektáha nak.

⁷¡Eltaqnaweykpok sa' chá'a, eñama m'a apkello ekmaso! ¡Waxpánchesek sa' ko'o apyókxoho m'a ekyókxoho nak kañe' Israel!

⁸“Judá, kaltaqmalma sa' apkelpeywa elának xép ma'a apkelyáxeg'a tén han apkelpepma. Elyaqhakkasek sa' apyespa'ák ma'a apkelenmexma nak, elháxahagkok sa' apmonye' m'a apkelyáxeg nak, tén han apkelpepma.

⁹¡Xép, hatte Judá! aphawók xép ma'a méwa étkok eksawhomal'a katwok ekyógkexma, keñe keytek náxop, ektémól'a m'a méwa ekyawel'a megkólmowánal'a kólya'aksek exma.

¹⁰Méko keymentók ektémakxa apyennaqte Judá, méko han kawának keymentók aptémakxa nak ekha kélyaheykekxoho, ekwokmoho apwa'akto makham ma'a ektáha nak apagkok ma'a aptémakxa nak wesse', cham'a peya nak elyahakxohok ma'a énxet'ák.

¹¹Etéthok chá'a yámelyeheykok apchánte m'a anmen yámet aktog, apkelyenyessamól'a chá'a apkelnaqta m'a anmen yámet égmenek, ¡cham'a anmen yámet égmenek ekyexwásamól'a!

¹²Kelyexwásessegkek apaqta'ák ma'a anmen yámet égmenek; kelmópessegkek apma'ák apyá weyke nagkeygmenek.

¹³“Exek sa' Zabulón ma'a neyáwa wátsam ekwányam, yaqwánxa sa' keytek ekhagweykekxexa chá'a m'a yántakpayhe. Kammohok sa' néxa xapop apagkok ma'a Sidón nak.

¹⁴“Isacar apteme yámelyeheykok ekyennaqte kélpátegkesso nak chá'a aqsok, éllókassamól'a chá'a ekyampe m'a neyseksa aqsok élseykha.

¹⁵Wet'ak axta agkok chá'a ektaqmela apchókxa, tén han ektaqmalma yaqwayam kallókasek ekyampe, kának axta chá'a kólpátegkesek aqsok yaqwayam kalsók, kahaxkohok axta aqsa chá'a kólteméssesha.

¹⁶“Apkeltaqmelchesso apagko' sa' chá'a etnehek Dan ma'a énxet'ák apagkok apagko' nak, ektéma nak chá'a m'a pók aptémakxa nak chá'a énxet'ák Israel.

¹⁷Exhok sa' Dan xama yéwa ekyetnól'a nekha ámay, ekteyxchessamól'a apáhak yátnáxeg, ektegkessamól'a kaschásekxak ma'a apha nak apkapok.

¹⁸“¡Xép, Wesse' ahagkok, élhaxneyk ko'o hewagkasek teyp!

¹⁹“Ektamagkok sa' énxet'ák élmasagcha'a apkeltémakxa m'a Gad, keñe sa' natámen emenxenekxak ma'a Gad.

²⁰“Xámok sa' katnehek apto élmátsa m'a Aser; elagkok sa' apnámakkok ma'a apteykegkohol'a kelwesse'e apkelwányam.

²¹“Máxa xenaq ma'a Neftalí, ekweynchámeykhal'a chá'a ekmakókxa enxoho kamhagkok, éltaqmalmal'a étkók.

²²“Aphawók José m'a yámet émha nak neyáwa yegmen, ekxámokmal'a ekyexna, élápxegmal'a aktegák ma'a neyáwa kélhaxtegkesso.

²³Etaqnók chá'a m'a apkelmeykha nak yágke, elyátak chá'a m'a yágke, elya'aksek chá'a exma;

²⁴apmeyhek eyke m'a José, meyawhesha chá'a yágke apagkok; ¡Jacob Dios apagkok apyennaqte keñamak apteméssesso!, ¡apkeláneykha nepkések apwesey keñamak, cham'a apmasma nak ma'a Israel!

²⁵¡Apyáp Dios apagkok keñamak, cham'a peya nak epasmok; Dios ekha apyennaqte keñamak, cham'a peya nak kataqmalmakha apwáxok elano'! ¡Elmések sa' aqsok éleñama nak néten! ¡Éleñama nak ma'a wátsam ekmattawóneg! ¡Epasmok sa' exámassásekxak apnaqtósso, tén han apketchek!

²⁶Xámok xép apkelmaxnéssesso aqsok éltaqmela m'a apyáp, kaxnók ko'o ektémakxa axta sélmaxnéssesso aqsok éltaqmela m'a élyapmeyk axta. Kayeykhágwomhok sa' eyáhapwe aqsok éltaqmela m'a José, megkaxók sa' ma'a ekweykenxa nak egkexe nano', cham'a José kélyéseykha axta nepyeseksa apkelpepma.

²⁷“Aqsok nawhak eklo m'a Benjamín, ektómól'a ekyógkexma axto'o, ekmelásektamól'a taxnám ma'a eyeygwayam.”

²⁸Cháxa apteme axta doce pók aptémakxa énxet'ák Israel xa, cháxa aptáhakxa axta han apkeláneya apyáp ma'a apketchek, apkelmaxnessásegko chá'a xama m'a aqsok éltaqmela.

²⁹Apméssek axta apketchek Jacob se'e apkeltamhókxa axta chá'a etnahagkok: “Kaxwók sa' ko'o watsapok, hélátawanyegwakxa sa' xamo' ma'a élyapmeyk nano', cham'a meteymog áxwa ekyetnama nak ma'a yókxexma Efrón, apagkok axta m'a énxet hitita,

³⁰cham'a yókxexma Canaán; meteymog áxwa ekyetnama nak ma'a Macpelá, ekpayho nak Mamré, apma axta m'a Abraham, ekyetláyekmoho m'a xapop Efrón, yaqwayam kólátawanyek chá'a m'a apnámakkok.

³¹Axta kélátawanyeyk Abraham ma'a, tén han aptáwa' Sara, tén han ma'a Isaac tén han ma'a aptáwa' Rebeca. Axta eyátawanyeyk han ko'óxa Lía m'a,

³²énxet'ák hititas axta apagkok kélmeykekxa m'a xapop nak, tén han ma'a meteymog áxwa nak.”

³³Xama axta appenchesa apkeltennáseyak Jacob apkeltamhókxa etnahagkok ma'a apketchek, apsekhákxeyk axta makham apyetnamakxa néten, keñe apketsapa.