Read Lengua Sur Génesis 50 Bible Online

Génesis 50 - Lengua Sur bible

Génesis 50

¹Appathetchek axta José apyáp aphápak, keñe apwana, appetsessek axta nahan.

²Tén axta apkeltamho eltexnássesagkok apyempehek pánaqte apyáp Israel aphápak ma'a pánaqte yáp ektáha axta chá'a apkeláneykha, yetlókok axta han apkeltexnassáséyak apyempehek.

³Cuarenta ekhem axta han weykmok kéltexnassáseyak apyempehek pánaqte, hakte cháxa ekweykenxa chá'a kéltexnéyak xa. Weykmek axta setenta ekhem éllapwámeyak énxet'ák Egipto, eñama apketsapma Israel.

⁴Xama axta ekyeykhaya xa ekhem nak éllapwámeyak, apkelpaqhetchessek axta José m'a apheykha axta faraón apxagkok, aptáha axta apkeláneykha, aptáhak axta apkeláneya s'e: —Naqsók sa' agkok ektaqmeleykencha'a kélwáxok séllányo ko'o kéxegke, kólteme sa' kólának faraón se'e:

⁵xama axta apmáheyo yetsapok táta apkeltémok axta atnéssesek naqsók wátawanyegwakxak ma'a takhaxpop, appenchessamo axta apma, ekyetnama nak ma'a Canaán. Éltamhók ko'o heyhok amyekxak wátawanyegwakxak táta m'a; ekpenchessek sa' agkok seyátawanye, eyxyamok sa' makham.

⁶Keñe axta faraón aptáha apchátegmowágko s'e: —Exeg, yátawanyegwakxa apyáp ma'a, apkeltémókxa axta etnéssesek.

⁷Apxegkek axta José apchátawanyegwákxo m'a apyáp, apkelyetlókók axta han apyókxoho apkeláneykha, ekha axta chá'a kéláyo m'a faraón apxagkok nak, tén han ma'a Egipto,

⁸tén han ma'a apnámakkok apancha'awo nak ma'a Jacob, tén han ma'a José, keñe han ma'a apkelpepma. Sakcha'a axta aqsa kélnegkenákxak ma'a yókxexma Gosen, tén han ma'a aqsok kélnaqtósso.

⁹Apkelyetlókek axta han José m'a énxet'ák apkelchánte axta yátnáxeg apkelyenyawasso, tén han apkelchánte yátnáxeg, apxámok apagko' axta énxet.

¹⁰Xama axta apkelwokmo m'a Goren-ha-atad, ekpayho nak ketók ma'a wátsam Jordán, apkellekxagweyha axta makham élxéna apkelwáxok ma'a Jacob. Siete ekhem axta weykmok élapwayam José, eñama apketsapma apyáp xa yókxexma nak.

¹¹Xama axta apkelwet'a cananeos apheykha axta m'a yókxexma nak éllapwomámaxche', aptáhak axta s'e: “Awanhók agko' éllapwámeyak énxet'ák Egipto.” Axta keñamak kélteméssesa ekwesey Abel-misraim xa yókxexma nak, keto' nak wátsam Jordán.

¹²Apteméssessek axta apketchek Jacob ma'a ekyókxoho apkeltémókxa axta etnéssesek,

¹³apsákxeyk axta m'a Canaán, apchátawanyegwákxeyk axta m'a meteymog áxwa ekyetnama nak ma'a Macpelá, apmeykekxa axta m'a Abraham, apagkok ma'a Efrón, apteme axta énxet hitita, yaqwayam enxoho katnehek takhaxpop apagkok ma'a apnámakkok. Cháxa xapop nak, tén han xa meteymog áxwa nak, yetnegkek ma'a ekpayho nak ekteyapmakxa ekhem teyp Mamré.

¹⁴Aptaqháwok axta makham José Egipto natámen apchátawanye apyáp, yetlo m'a apkelpepma, tén han ma'a apyókxoho ektáha axta apkelyetlo.

¹⁵Xama axta apketsapma Jacob, tén axta José apkelpepma ektáha élchetamso apkelwáxok se'e: “Ẽltaqnaweygkek kexa José, eyaqmagkásekxak sa' ma'a ekyókxoho nenteméssessamakxa axta ekmaso.”

¹⁶Keñe axta apkeltamho kóltéhek kóltennássekxak se'e: “Amonye' apketsapma axta m'a apyáp axta,

¹⁷apkeltémok axta antéhek agának se'e: ‘Ná eyaqmagkásekxa aqsa aqsok ekmaso apkeláneyak apkelpepma, tén han melya'assáxma, asagkók agko' axta apteméssessamakxa'.’ Cháxa keñamak néltamho nak meyaqmagkásekxeyk aqsok ekmaso nenlánéyak, hakte negko'o nenteme apkeláneykha m'a apyáp nak Dios apagkok.” Apkelekxagweyha axta han José apleg'a apkeltennáseykha m'a ektáha axta apseykekxa amya'a aphakxa.

¹⁸Keñe axta apkelya'aweyktámho apagko' ma'a apkelpepma nak, apkelháxahanteyk axta apmonye' ekwokmoho apkeltekxeya élpayhakxa nápaqta'a xapop, aptáhak axta apcháneya s'e: —Keso negko'o s'e. Negko'o nenteme apkelásenneykha naqsa.

¹⁹Apchátegmowágkek axta eyke m'a José: —Nágkatneykha aqsa kélwáxok. Mowanchek ko'o axnésaxkohok Dios.

²⁰Xeyenmeyk axta kéxegke kélwáxok hélteméssessamhok exma ekmaso, keñe Dios aptemessásekxo ektaqmela m'a aqsok ekmaso nak, yaqwayam enxoho alának se'e kélwet'a nak kaxwo': yaqwayam alwagkasek teyp apxámokma apagko' énxet'ák.

²¹Nágkatneykha kélwáxok, almésagkok sa' ko'o kéltéyak kéxegke, tén han ma'a kélketchek nak. Cháxa ektáhakxa axta José apmasséssesa éltamheykha apkelwáxok ma'a apkelpepma nak, hakte apkelpaqhetchessek axta ekyetlómo ektaqmeleykha apwáxok.

²²Aphegkek axta makham José m'a Egipto, yetlo m'a apyáp axta apnámakkok. Ciento diez apyeyam axta weykmok apha José,

²³apkelwetayók axta m'a Efraín aptawán'ák. Apkelwetayók axta han ma'a Maquir axta apketchek, aptawán'ák axta m'a Manasés, hakte apkelqéneykha axta chá'a m'a José.

²⁴Tén axta José aptáha apkeláneya apkelpepma s'e: “Ketók ko'o kaxwók sétsapmakxa', Dios sa' eyke epasmok kéxegke, elántekkesek sa' se'e apchókxa nak, yaqwayam enaqlakxak ma'a xapop apkeltennassamakxa axta Abraham, Isaac, tén han Jacob.”

²⁵Apkeltamhók axta etnéssesek naqsók Israel apketchek apkeltamhókxa etnahágkok, aptáhak axta apkeláneya s'e: “Naqsók sa' ey'óták epasmok kéxegke m'a Dios. Temék sa' agkok xa, kólsók sa' kéxegke exchakkok.”

²⁶Ciento diez apyeyam apagkok axta aptemék José apketsapma m'a Egipto, kéltexneykegkek axta apyempehek pánaqte, keñe kélaqxegkessama yántéseksek.