Read Lengua Sur Génesis 8 Bible Online

Génesis 8 - Lengua Sur bible

Génesis 8

¹Xénwákxok axta apwáxok Dios Noé, tén han ekyókxoho aqsok nawha'ák élántaxnamo xamók axta yántakpayhe, apcháphássek axta éxchahayam keso náxop, tén axta ekwéweynto yegmen.

²Kelápegkokxeyk axta han éleñamakxa nak chá'a yegmen kóneg wátsam ekwányam ekmattawóneg, tén han ma'a atña'ák nak néten. Massék axta ekmámeka,

³taqmelchásegkók axta han ekwéweynto yegmen, ekweykmo ciento cincuenta ekhem,

⁴tén axta ekhem diecisietel'a pelten siete nak, ekyetna'akto yántakpayhe m'a néten nak egkexe Ararat.

⁵Wéweykenteyk axta aqsa han yegmen, keñe axta ekwokmo émha amonye' ekhem, ektáhakxa nak diez pelten, negwet'awo kaxwók ma'a naw'ék egkexe élwenaqte agko' nak.

⁶Wokmek axta cuarenta ekhem, apmeykessek axta Noé átog étkok yántakpayhe apkelane axta,

⁷tén axta apyenyékxo kágqag; champeykha axta eyke aqsa néten xa kágqag nak, élhaxanma keymek xapop.

⁸Tén axta apyenyékxo makham Noé xama wáx'ay, apkeltamho ey'asagkohok yamakak kexaha xapop;

⁹aptaqháwok axta eyke aqsa makham wáx'ay ma'a ekyetnakxa axta yántakpayhe ekyawe, hakte axta éteyágwokmok xama yaqwánxa enxoho eyáqwók, hakte axta kamassak makham eyapma yegmen keso náxop. Aptekkessek axta apmek Noé apmákxo wáx'ay, apchaqxegkáseykxo makham kañe' yántakpayhe awáxok.

¹⁰Apkelhaxneyk axta makham Noé siete ekhem, keñe apyenyékxo makham wáx'ay.

¹¹Peyk axta kayáqtések apwákxo makham wáx'ay, apsákxeyk axta xama olivo yámet aktog. Cháxa apya'ásegkoho axta han Noé ekyaménto yegmen náxop.

¹²Apkelhaxnékxeyk axta makham siete ekhem, keñe axta apyenyékxo makham wáx'ay, massék axta eyke apwákxo.

¹³Yamakak axta xapop ektáha axta seiscientos un apyeyam apagkok Noé. Aplekkek axta Noé yántakpayhe ekpakxanma, ektáhakxa axta émha amonye' ekhem, apkemha apmonye' pelten, apwet'ak axta ekyamaka xapop.

¹⁴Yamakawók agko' axta xapop, ekwokmo axta ekhem veintisiete, aptáhakxa axta apqánet pelten.

¹⁵Keñe axta Dios aptáha apcháneya Noé s'e:

¹⁶“Etyep kaxwo' yántakpayhe, yetlo aptáwa', apketchek, tén han ma'a aptánegken'ák nak,

¹⁷Elántekkes nahan ekyókxoho aqsok nawha'ák apxata axta kañe', cham'a náta, tén han ma'a aqsok nawha'ák megkalmeymentakcha'a nak, tén han ma'a élpexyaweykegkoho nak xapop, yaqwayam sa' kaxpaqnek kalmahagkok ekyókxoho yókxexma keso náxop, kaxámekxak sa' étkók, kasawhekxohok sa' keso náxop.”

¹⁸Aptekkek axta kañe' yántakpayhe Noé yetlo aptáwa', apketchek, tén han ma'a aptánegken'ák.

¹⁹Kelántekkek axta han ma'a ekyókxoho aqsok nawha'ák megkalmeymentakcha'a nak, tén han ma'a élmeymentakcha'a nak, tén han ma'a aqsok nawha'ák élpexyaweykegkoho nak xapop, tén han ma'a élchampayo nak.

²⁰Apkelanak axta han Noé xama ekwatnamáxchexa aqsok, apkelánesa Wesse' egegkok, apkelyésáha axta aqsok nawha'ák, tén han náta megkalmanyása, xama axta chá'a m'a ektémakxa nak chá'a, apchaqhássessek axta yaqwayam ewatnések Wesse' egegkok.

²¹Xama axta aptekhana Wesse' egegkok xa ekmátsa nak ekpaqneyam, aptáhak axta s'e: “Wánxa kaxwók sektaqnagko keso náxop, eñama apkeltémakxa énxet'ák, hakte apketkok apkeynmókxa énxet wánxa kaxénmakha apwáxok elának aqsok ekmaso. Mamasséssemek han chá'a kaxwók ma'a ekyókxoho aqsok nawha'ák, sektáhakxa nak se'e kaxwo' nak.”

²²“Kaxek sa' chá'a aqsok kélcheneykekxa tén han eknakxamáxche', megkamassegwánxa nak makham keso nélwanmeygkaxa', áthek sa' chá'a katnehek, samágek sa' han chá'a katnehek, keytek sa' ekmexanmakxal'a exma, tén han apmopsamágexal'a, ekhem tén han axta'a.”