Read Lengua Sur 2 Samuel 10 Bible Online

2 Samuel 10 - Lengua Sur bible

2 Samuel 10

¹Yáma wenaqtémók axta, keñe apketsapa m'a Nahas, wesse' apwányam apagkok axta m'a amonitas, tén axta apyaqmagkassama apteme wesse' apwányam ma'a apketche Hanún.

²Tén axta David ekxéna apwáxok etnéssesek Hanún, Nahas axta apketche, ekhawo apteméssessamakxa axta aptaqmelchessama m'a apyáp axta, apkeláphássek axta nápakha apkeláneykha yaqwayam enxoho eltennaksek han Hanún eyaqha apwáxok apketsapa m'a apyáp. Xama axta apkelwokmo David apkeláneykha m'a amonitas apchókxa',

³aptáhak axta apcháneya apkelámha apmonye'e amonitas ma'a Hanún, wesse' apwányam apagkok axta: “¿wesse', apkeneykeya exchep elaphásak David yaqwayam egkések eyaqhe apwáxok xa énxet'ák nak, ekxeyenweykekxoho apwáxok ma'a apyáp axta exchep, wesse'? ¡Apkeláphássek yaqwayam elanok tegma apwányam, tén han elyexakpohok elanok yókxexma, keñe sa' emasséssók!”

⁴Tén axta Hanún apkeltamho elmakpok ma'a David axta apkeláneykha, apkeltamhók axta han kólyésesagkok náxet áwa' apatña'ák, tén han kólyaqténchesagkok apkelántaxno néxa m'a nepxet nak, ekweykekxoho m'a néten aptaqla'ák. Keñe kéláphasa eltaqhoho'.

⁵Xama axta apleg'a amya'a David, apkeltamhók axta kóllanyexagkok, hakte apkelmegqakkek apagko' axta, apkeltamhók axta han kólának exmakha sekxók ma'a Jericó, ekwokmoho élwegqákxo makham ma'a áwa' apatña'ák, keñe elchexyók makham.

⁶Apyekpelcheyk axta amonitas aplawa m'a David, yetlókok axta aptegye ekha ekyánmaga veinte mil sẽlpextétamo sirios apkeleñama m'a Bet-rehob tén han ma'a Sobá, keñe axta han mil énxet'ák ma'a wesse' apwányam Maacá axta apagkok, keñe doce mil énxet'ák apkeleñama m'a Is-tob.

⁷Apleg'ak axta eyke amya'a m'a David, keñe apcháphasa Joab yetlo m'a apyókxoho sẽlpextétamo.

⁸Apkelántekkek axta m'a amonitas, apkelánegwokmek axta aptamhágkaxa yaqwayam yempakhak ma'a nentaxnamakxa nak tegma apwányam, keñe axta m'a sẽlpextétamo sirios, apkeleñama axta Sobá, tén han Rehob, keñe han ma'a sẽlpextétamo apkeleñama axta Is-tob, keñe han ma'a Maacá axta sẽlpextétamo apagkok, apkekhegwa'a m'a yókxexma.

⁹Xama axta apwet'a Joab ekmako kólchetámegmak apmonye' tén han neptámen, apkelyesáha axta sẽlpextétamo apkelyennaqte israelitas, keñe axta apkelánesagkokxo aptamhágkaxa yaqwayam ektamagkok ma'a sirios.

¹⁰Keñe axta m'a apkeleymomap nak sẽlpextétamo, apmeyásekxo yaqwayam etnehek apkemha apmonye' m'a apyáxeg Abisai, yaqwayam enxoho elnapakpok ma'a amonitas,

¹¹tén axta aptáha apcháneya s'e: “Apwet'ak sa' agkok maxnawo ko'o m'a sirios, hepásegwata sa', ekwet'ak sa' agkok ko'óxa mexnawo exchep ma'a amonitas, apásegwakxak sa'.

¹²Ewasqápekxoho, ólyennákxohok sa' ólnapaxchek agmeyók negókxa, tén han Dios egagkok tegma apkelyawe apagkok. ¡Etnéssesek sa' Wesse' egegkok ma'a ekxénakxa enxoho apwáxok etnéssesek!”

¹³Apxegkek axta Joab yetlo sẽlpextétamo apagkok yaqwayam elnapakpok ma'a sirios, apkenyahágkek axta eyke apmonye' m'a.

¹⁴Xama axta apwet'a amonitas apkenyahágko m'a sirios, apkenyahágkek axta han apmonye' Abisai m'a amonitas, apkelántaxnegwákxeyk axta tegma apwányam. Keñe axta Joab apkelwátésa apkempakhe m'a amonitas, apmeyákxeyk axta makham Jerusalén.

¹⁵Xama axta apkelyekpelcha apmenxenákpo sirios apmenxena m'a Israel, apchaqnákxeyk axta makham.

¹⁶Apkeltamhók axta Hadad-ézer kólnaqlósawakxak ma'a sirios apheykencha'a axta m'a neyp wátsam nak Éufrates, apkelwokmek axta m'a Helam. Sobac axta han apkemha apmonye', sẽlpextétamo apkemha apmonye' apagkok axta m'a Hadad-ézer.

¹⁷Kéltennássekxeyk axta eyke David xa, yetlókok axta han apcháncheseykekxa apyókxoho énxet'ák nak Israel, apkelyeykhákxeyk axta m'a wátsam Jordán, apkelwokmek axta m'a Helam. Cha'a apkelnápékpexa axta han sirios David ma'a,

¹⁸apkenyahágkek axta sirios apmonye'e m'a israelitas, hakte cuarenta mil sẽlpextétamo apkelchánte yátnáxeg axta apkelnápak ma'a David, keñe apkelekkexa setecientos yátnáxeg apkelyenyawasso kélanchesso nak kempakhakma; apkelyetxaqkak axta han David ma'a Sobac, apteme axta apkemha apmonye' sẽlpextétamo apagkok sirios, yetlókok axta han apketsapma.

¹⁹Xama axta apkelwet'a apmenxena israelitas apyókxoho apkelwesse'e apkelwányam appasmeykekxa axta m'a Hadad-ézer, apkeltamhók axta elwátésagkok apkelnápomap ma'a israelitas, apkelmeyásekpek axta m'a yaqwayam etnehek apkeláneykha. Cháxa apchekakxa axta han kaxwók epasmok sirios ma'a amonitas.