Read Lengua Sur 2 Samuel 23 Bible Online

2 Samuel 23 - Lengua Sur bible

2 Samuel 23

¹Keso ektemegwánxa néxa appeywa David se'e: “David, Jesé apketche, énxet apteméssesso axta Dios ekyawe kéláyo, wesse' apwányam ektáha axta apkelyéseykha m'a Dios apagkok nak Jacob, apteme axta apkelánéyak ekmátsa apmeneykmasso m'a kañe' nak Israel. Aptáhak appeywa s'e:

²“Appaqmetchek Wesse' egegkok Espíritu apagkok, ko'o eyke eyásenneykxa'; egkéssek appeywa yaqwayam añeksek.

³Appaqmetchek ma'a Dios apagkok nak Israel; aptáhak seyáneya Apmasma nak chá'a Israel se'e: ‘Énxet apkeláneykha nak chá'a énxet'ák yetlo ekpéwomo aptémakxa', apkeláneykha nak chá'a énxet'ák yetlo apcháyo Dios,

⁴exhok sa' ma'a ektémól'a katyapok ekhem axto'o, máxa sa' etnehek ma'a ekhem éltátchesso meykel'a yaphope, ektaqmelcháseykekxal'a pa'at natámen ekmámeye.’

⁵Cháxa keñamak melyenseykmo nak Dios ma'a étawán'ák nak ko'o, hakte élánéssegkek axta ko'o ekhémo mók nélpaqhetchásamáxkoho meyke néxa m'a, penchásamáxcheyk ektáxésamaxche', méko han kamasseksek. Élmallahancháseykegkek ko'o m'a, etekkessessegkek han ma'a ekyókxoho aqsok sekmámenyého.

⁶Keñe sa' ma'a apyókxoho élmasagcha'a nak apkeltémakxa, máxa am'ák kélchexakha sa' kólteméssesek magmowánal'a ampaknegwomho'.

⁷Sawo ekyentaxno essenhan sawhéwa chá'a kóltéhek ma'a peya enxoho kólpaknegwomho', kólchexák chá'a nátex, yaqwayam enxoho kólwatnek ekyókxoho.”

⁸Keso apkelwesey axta David sẽlpextétamo apagkok apkelyennaqte s'e: Is-bóset, apteme axta hacmonita, apkemha apmonye' axta nepyeseksa m'a apqántánxo apkelyennaqte axta, apkelnapma axta ochocientos énxet sawhéwa apmeykha.

⁹Eleazar axta aptétéyak ma'a, Dodó axta apketche, apteme axta énxet ahohíta, apteme axta han apkeñama nepyeseksa m'a apqántánxo apkelyennaqte axta. David axta han apxegexma apha m'a yókxexma nak Pas-damim, cham'a apchaqneykekxo axta filisteos apmáheyo yempakhak ma'a, keñe israelitas apkelwátéseykegko.

¹⁰Axta eyke elwátesseykmok ma'a, apkelnapmeyk axta filisteos ekwokmoho ekyampaya apaktog, yepetcha'ak axta apmek ma'a sókwenaqte apakxak apagkok. Cháxa apmésa axta ekyawe agko' apmallane m'a Wesse' egegkok. Tén axta sẽlpextétamo apkelyetlawa m'a Eleazar, yaqwayam elmagkok ma'a aqsok apkelyementaméyak ma'a apkelenmexma.

¹¹Keñe axta Samá neptámen ma'a Eleazar, Agué axta apketche, apteme axta ararita. Xama axta apchaqnákxo filisteos ma'a yókxexma nak Lehi, kélcheneykekxexa axta yágkeleyke, apkenyahágkek axta apmonye'e m'a sẽlpextétamo israelitas,

¹²keñe axta Samá apkenmeyncha'a aqsa m'a neyseksa namyep apmeyawa, apkelnapchek axta han filisteos. Cháxa apmésa axta ekyawe agko' apmallane m'a Wesse' egegkok.

¹³Xama ekhem axta apkelxega apyo'ókmo David apqántánxo apkeleñama nepyeseksa m'a treinta apkelyennaqte, cham'a meteymog áxwa nak Adulam. Apkelpakxeneykegkek axta sẽlpextétamo filisteos ma'a ekyapwátegweykenxa nak xapop Refaim.

¹⁴Aphegkek axta David ma'a tegma apyennaqte, keñe axta sẽlpextétamo filisteos apheykencha'a m'a Belén.

¹⁵Aptáhak axta appaqmétencha'a David: “¡Yámék la'a xama énxet heyekwéssók yegmen ma'a yámelchet nentaxnamakxa nak Belén!”

¹⁶Keñe axta apqántánxo apkelyennaqte apkelántaxnegwokmo m'a apkelpakxeneykegkaxa axta filisteos, apyekwokmek axta yegmen ma'a yámelchet ekyetnamakxa axta m'a nentaxnamakxa nak Belén, apsákxéssek axta m'a David. Axta eyke emakók ének, apyegkenchek axta aqsa apteméssesa apmésso naqsa Wesse' egegkok.

¹⁷Axta aptáhak se'e: “¡Megyohók ko'o eynek ma'a Wesse' egegkok! ¡Hakte máxa katnehek sekyena enxoho éma apagkok se'e énxet'ák melmeyágweykxo nak apkelyennaqte apkelmahágko seyekwéssekmo yegmen!” Axta emakók ének. Cháxa ektáhakxa axta aqsok apkeláneyak ma'a apqántánxo énxet'ák megyeye nak elmahagkok eyesagkexa'.

¹⁸Abisai axta apkemha apmonye' apagkok xa treinta énxet apkelyennaqte nak, cham'a Abisai, Joab axta apyáxeg, Seruiá axta étche. Apketámeygkek axta trescientos énxet sawhéwa apmeykha, apkelnapchek axta han. Cháxa aptéma axta apxénamap chá'a nepyeseksa m'a treinta énxet'ák apkelyennaqte nak,

¹⁹néten kéláyo axta han aptemék nepyeseksa m'a apyókxoho nak, hakte apkemha apmonye' apagkok axta aptemék. Axta eyke exnágweykekxohok ma'a apmonye'e axta apqántánxo kempakhakma yapmeyk.

²⁰Xama énxet apyennaqte axta han ma'a Benaías, Joiadá axta apketche, apteme axta énxet Cabseel, xámok axta aqsok apkelane. Axta apkelnapma m'a apqánet apketchek axta Ariel, apkeñama axta Moab. Aptaxneyk axta máxek apteyekmo yeyam, cha'a apchaqhakxa axta han méwa m'a kañe' nak.

²¹Apchaqhegkek axta han egipcio apwenaqte axta, apmeykha axta sawhéwa: apketámeygkek axta Benaías yámet apmeykha, apyementegkek axta sawhéwa apagkok, keñe apchaqha apkelyetxeykxo m'a sawhéwa apagkok apagko' nak.

²²Cháxa ekméssama axta apxénamap Benaías, Joiadá axta apketche, nepyeseksa m'a treinta énxet'ák apkelyennaqte axta;

²³néten kéláyo axta han aptemék nepyeseksa m'a apyókxoho nak, axta eyke exnágweykekxohok ma'a apmonye'e axta apqántánxo kempakhakma yapmeyk. Keñe axta David apteméssesa apkemha apmonye' nepyeseksa m'a énxet'ák ektáha axta chá'a aptaqmelchesso.

²⁴Apheykha axta han nepyeseksa treinta apkelyennaqte: cham'a Asael, Joab axta apyáxeg; Elhanán, Dodó axta apketche, apkeñama axta Belén;

²⁵tén han Samá, apkeñama axta Harod; Elicá, apkeñama axta han Harod;

²⁶Heles, apteme axta paltita; Irá, apketche nak Iqués, apkeñama axta m'a Tecoa;

²⁷Abiézer, apkeñama axta Anatot; Sibecai, apkeñama axta Husah;

²⁸Salmón, apteme axta ahohíta; Maharai, apkeñama axta Netofá;

²⁹Héled, apketche axta Baaná, axta han apkeñamak ma'a Netofá; Itai, apketche axta Ribai, apkeñama axta Guibeá, ekpayho nak Benjamín apchókxa;

³⁰Benaías, apkeñama axta Piratón; Hidai, apkeñama axta m'a alwáta nak Gaas;

³¹Abí-albón, apteme axta arbatita; Azmávet, apkeñama axta m'a Bahurim;

³²Eliahbá, apteme axta saalbonita; tén han Jasén apketchek; Jonatán;

³³Samá, apteme axta ararita; Ahiam, apketche axta Sarar, apteme axta han ararita;

³⁴Elifélet, apketche axta Ahasbai, tén han ma'a apkeñama nak Maacá apketche; Eliam, apketche nak Ahitófel, apkeñama axta Guiló;

³⁵Hesrai, apkeñama axta Carmel; Paarai, apteme axta arbita;

³⁶Igal, Natán apketche, apkeñama axta m'a Sobá; Baní, apkeñama axta m'a Gad;

³⁷Sélec, apkeñama nak Amón; Naharai, apkeñama nak Beerot, apteme axta Joab apkelsókáseykha apkelmeykha, étche nak Seruiá;

³⁸Irá, apkeñama axta Jatir; Gareb, apkeñama nak han ma'a Jatir;

³⁹keñe han ma'a Urías, apteme axta hitita. Treinta y siete axta apyókxoho.