Read Lengua Sur 2 Samuel 4 Bible Online

2 Samuel 4 - Lengua Sur bible

2 Samuel 4

¹Xama axta apleg'a Is-bóset, Saúl axta apketche, apketsapa Abner ma'a Hebrón, apyelqákpek axta, kelmeneyxkók agko' axta han ma'a kañe' nak Israel.

²Yetneyk axta han Is-bóset apqánet énxet apkeláneykha apkelámha apmonye'e apkelmenyexma. Baaná axta apwesey xama, tén axta Recab ma'a pók. Rimón axta apketchek, apkeñama axta m'a Beerot, Benjamín axta aptawán'ák neptámen, hakte Benjamín énxet'ák apagkok axta han kélteméssessók ma'a apheykha nak Beerot,

³hakte apkenyaheykegkek axta apheykha nak Beerot apkelmaheykegko m'a Guitaim, apheykegkaxa axta aptéma máxa apkeleñama mók nekha, ekwokmoho makham se'e kaxwo' nak.

⁴Yetneyk axta han xama apketche m'a Jonatán, Saúl axta apketche, Mefi-bóset axta apwesey, élyelqamáxche apyay'ák axta m'a. Xama axta aptéma cinco apyeyam apagkok ma'a Mefi-bóset, wa'ak axta amya'a eñama Jezreel apketsapma m'a Saúl tén han Jonatán; yetlókok axta han ekmeykekxa Mefi-bóset ma'a kelán'a eyéyak axta chá'a nam'agkok, yentamawók axta ényaha, yaqnenawók axta eyke han xamo' eñama ekpekheyáseykha yaqwayam kaxyenmok, tén axta ektéma élyelqamáxche apyay'ák.

⁵Apkelmahágkek axta Is-bóset apxagkok ma'a Recab tén han Baaná, Rimón axta apketchek, apkeñama axta m'a Beerot, apkelwokmek axta han ekweykenxal'a kamexnek ekhem, neyseksa apteyenma yetseksók ekhem.

⁶Kelyésaha axta han hótáhap apaktek éltaqmalma éxakkasa aphopák ma'a kelán'a éláneykha axta chá'a átog, teyenwokmók axta han eknakxakxa', axta keñamak apkepwagko aptaxna Recab yetlo apepma Baaná, meyke ekweteykegkoho.

⁷Xama axta apkelántaxna m'a kañe' tegma, apyetneyk axta han Is-bóset ma'a apyetnamakxa axta chá'a néten; tén axta apchaqha, apyaqténchessek axta apyespok, keñe apsákxo, kelságweykxeyk axta han apkelxegakxa m'a ámay nak Arabá

⁸yaqwayam esakxések ma'a David, aphamakxa axta m'a Hebrón. Aptáhak axta apcháneya m'a wesse' apwányam: —Keso Is-bóset apqátek se'e wesse', Saúl axta apketche, apkenmexma axta exchep wesse', apmáheyo axta yaqhek. Sakhem akke apmésa exchep Wesse' egegkok yaqwayam eyaqmagkásekxak apteméssessamakxa axta m'a Saúl, tén han aptawán'ák neptámen nak.

⁹Keñe axta aptáha apchátegmowágko David: —Naqsók ko'o ekteméssásak yetlo sekxeyenma Wesse' egegkok, semallahanchesso axta ekyókxoho ektémakxa ekyentaxno sekha,

¹⁰apkenagkama axta heseykentegkessók amya'a ektaqmela xama énxet, séltennásseykto apketsapma m'a Saúl, ekmomchek axta eyke ko'o séltémo emátog ma'a yókxexma Siclag.

¹¹¡Sa' atnéssesek han kéxegke xa ektáha nak, élmasagcha'a nak kéltémakxa', kélaqha nak xama énxet meyke aptémakxa neyseksa apteyenma m'a kañe' apxagkok nak! ¡Axnésseshok sa' ko'o mók eñama kélaqhe m'a! ¡Amasséssók sa' kéxegke keso nélwanmégkaxa'!

¹²Yetlókok axta han apkeltémo etnahagkok David ma'a apkeláneykha, apkelnapchek axta; apkelyaqténchásegkek axta apmék tén han apmagkok, apkelmakheyáseyha axta han aphopák ma'a nekha axta kélyátamakxa yegmen ma'a Hebrón. Keñe axta apmákxo m'a Is-bóset axta apqátek, apchátawanyeyk axta m'a Hebrón, kélátawanyamakxa axta m'a Abner.