Read Lengua Sur 2 Samuel 5 Bible Online

2 Samuel 5 - Lengua Sur bible

2 Samuel 5

¹Apkelmeyákxeyk axta apyókxoho énxet'ák Israel ma'a Hebrón, yaqwayam elpaqhetchesakpohok ma'a David, axta aptáhak apcháneya s'e: “Egnámakkok egagko' negko'o exchep,

²naqsók axta eykhe apteme wesse' apwányam egagkok ma'a Saúl, xép axta eyke apnaqlo chá'a énxet'ák Israel ma'a kempakhakma. Apkeltennassegkek axta han Wesse' egegkok yaqwayam etnehek xép apnaqleykha tén han apkeltaqmelchesso m'a énxet'ák Israel.”

³Cháxa ektáhakxa axta apkelxega m'a apyókxoho apkelámha apmonye'e nak Israel, keñe apkelpaqhetchásekpoho wesse' apwányam David ma'a yókxexma Hebrón, apheyásawók axta han mók apkelpaqhetchásamákpoho m'a énxet'ák nak, Wesse' egegkok axta han aptemessásak apweteykegkoho. Tén axta xa énxet'ák nak apteméssesa wesse' apwányam David ma'a Israel.

⁴Treinta apyeyam apagkok axta aptemék David apcheynamo apteme wesse' apwányam, cuarenta apyeyam axta han apteme wesse' apwányam:

⁵siete apyeyam nepxet pók axta han apteme wesse' apwányam ma'a Judá, cham'a Hebrón, tén axta treinta y tres apyeyam apteme wesse' apwányam ma'a ekyókxoho Israel nak, tén han Judá, cham'a Jerusalén.

⁶Apmahágkek axta wesse' apwányam David ma'a Jerusalén yetlo apkelxegexma'a, yaqwayam ektamagkok ma'a jebuseos, apheykha nak ma'a yókxexma. Apkeneykek axta han jebuseos metxehek wesse' apwányam David ma'a tegma apwányam nak. Axta aptáhak apcháneya s'e: “Mopwanchek xép etxek se'e, megkeyxek sa' meyke apaqta'ák tén han apkelyelqamap nak megyohok etxek.”

⁷Apmeyk axta eyke David xa tegma apyennaqte nak Sión, cham'a apkeltamhomakpexa nak kaxwók David Tegma Apyawe apagkok.

⁸Keñe axta David aptéma appeywa s'e: “Apyókxoho apketámeyak enxoho jebuseos, elántexek sa' ma'a ekmeyeykekxexa nak chá'a ényé yegmen, elnápok sa' ma'a meyke nak apaqta'ák, tén han ma'a apkelyelqamap nak, séltaqnagkamo ahagko' nak ko'o.” Cháxa ekteyapmakxa axta han amya'a ektéma nak se'e: “Mopwanchek sa' elántexek Wesse' egegkok tegma appagkanamap apagkok ma'a meyke nak apaqta'ák, tén han apkelyelqamap nak.”

⁹Tén axta apheykmo David ma'a tegma apyennaqte nak, apteméssessegkek axta han apwesey David Tegma Apyawe apagkok, tén axta aphaxtegkesa nepyáwa', eyeynmo m'a apkekhessamakxa axta xapop apchántamakxa, ekweykekxoho m'a apxagkok apyawe nak.

¹⁰Yágweykmók axta apteme ekha kéláyo m'a David, aphegkek axta han xamo' ma'a Wesse', Dios ekha nak apyennaqte.

¹¹Axta keñamak Hiram, wesse' apwányam nak Tiro, apkeláphassama apkeláneykha aphakxa David, tén han ma'a apkeláneyak nak yántéseksek, meteymog apkelpáxqatma, apkelsákxéssama axta m'a yámet cedro, keñe apkelánéssama apxagkok apyawe m'a David.

¹²Apyekpelchágwokmek axta David aptáha Wesse' egegkok apteméssesso wesse' apwányam ma'a Israel, aptekkessessegkek axta aqsok neyseksa apteme wesse' apwányam, eñama apkelásekhayo m'a énxet'ák apagkok Israel.

¹³Keñe axta natámen apmeyeykekxa Jerusalén, apkeñama m'a Hebrón, apkelmeykekxeyk axta makham David mók apnaqteyegka'a m'a, tén han kelán'a apkelmeykha naqsa, cháxa ekwetáseykekxo axta makham apketchek apkelennay'a tén han kelwán'ák.

¹⁴Keso apkelwesey axta apketchek appalleyam ma'a Jerusalén: Samúa, Sobab, Natán, Salomón,

¹⁵Ibhar, Elisúa, Néfeg, Jafía,

¹⁶Elisamá, Eliadá tén han Elifélet.

¹⁷Xama axta apkelleg'a amya'a filisteos kélteméssesa David wesse' apwányam ma'a Israel, keñe apkelmahágko apyókxoho m'a yaqwayam emok; apleg'ak axta eyke amya'a m'a David, keñe aptepa apmeyákxo m'a tegma apyennaqte nak.

¹⁸Apchágketchessekmek axta m'a filisteos, apkelhakmek axta m'a ekyapwátegweykenxa nak xapop ma'a Refaim.

¹⁹Keñe axta David apkelmaxneyáncha'a m'a Wesse' egegkok, aptáhak axta s'e: —¿Ewancheya sa' ko'o aktamagkok filisteos? ¿Hemallahancheseya sa' ko'o nepyeseksa m'a énxet'ák nak? Apchátegmowágkek axta Wesse' egegkok: —Ektamák sa', hakte amallahanchesek sa' ko'o exchep nepyeseksa m'a énxet'ák nak.

²⁰Apwokmek axta David ma'a Baal-perasim, keñe apmenxena m'a. Axta keñamak aptáha s'e: “Emeykessásekxeyk ko'o nepyeseksa sélenmexma m'a Wesse' egegkok, ektémól'a yegmen ényé.” Apteméssessek axta han ekwesey Baal-perasim xa yókxexma nak.

²¹Apkexakkek axta aqsa han aqsok kéleykmássesso apagkok ma'a filisteos, tén axta David apyeykhámeykxo yetlo apkelxegexma'a.

²²Apkelhákxeyk axta eyke makham filisteos ma'a ekyapwátegweykenxa nak xapop Refaim,

²³keñe axta David apkelmaxneyáncha'a Wesse' egegkok, tén axta aptáha apchátegmowágko Wesse' egegkok: —Nágkólmohok aqsa apmonye' kólchetamagkok, kólwakha sa' sekxo', neptámen sa' kóleñék kólchetamagkok kélwokmo enxoho m'a élámhakxa nak yámet élmátsa nak élpaqneyam.

²⁴Kélleg'ak sa' agkok ektémól'a anxog ma'a néten nak naw'ék yámet élyawe, kólchetamák sa' kólnapaxche', hakte cháxa magkenatchesso sekxega ko'o kélmonye'e, yaqwayam alnápok ma'a sẽlpextétamo nak filisteos.

²⁵Aptemék axta David ma'a apkeltamhókxa axta etnehek Wesse' egegkok, keñe apmenxena m'a sẽlpextétamo filisteos, eyeynókxa m'a yókxexma Gabaón ekweykekxoho m'a yókxexma nak Guézer.