Read Lengua Sur 2 Samuel 9 Bible Online

2 Samuel 9 - Lengua Sur bible

2 Samuel 9

¹Aptáhak axta David apkelmaxneyáncha'a s'e: “¿Yetnéya makham apkeymomap ma'a Saúl axta aphawóxama, yaqwayam enxoho ko'o ataqmelchesek sekteméssesakxa' ekxeyenweykekxoho ewáxok ma'a Jonatán axta?”

²Apheyk axta xama kélásenneykha, Saúl aphawóxama axta apchásenneykha, apwesey nak Sibá, kéláneyáha axta yaqwayam emhagkok ma'a aphakxa nak David. Xama axta apwokmo Sibá m'a, keñe apkelmaxneyáncha'a wesse' apwányam: —¿Xeyepya Sibá? —Éhay, ko'o, xép apkeláneykha —axta aptáhak apchátegmowágko.

³Tén axta aptáha apkelmaxneyáncha'a m'a wesse' apwányam: —¿Yetnéya makham apnámakkok apkeymomap Saúl, yaqwayam enxoho ataqmelchesek sekteméssesakxa yetlo sélane m'a séltennassama axta alának Dios? Keñe axta Sibá aptáha apchátegmowágko s'e: —Yetneyk makham xama apketche apkeymomap ma'a Jonatán axta, élyelqamáxche apyay'ák.

⁴—¿Háxko aphakxa'? —axta aptáhak wesse' apwányam. —Aphak ma'a tegma apwányam nak Lodebar, Maquir apxagkok, Amiel axta apketche —axta aptáhak apchátegmowágko Sibá.

⁵Keñe axta wesse' apwányam David apkeltamho kólyentawakxések ma'a aphakxa axta;

⁶xama axta apwokmo Mefi-bóset ma'a aphakxa nak David, cham'a Mefi-bóset Jonatán axta apketche, Saúl axta aptáwen, apháxahánteyk axta apxekmósa ekha apcháyo. —¡Mefi-bóset! —axta aptáhak David. —Ko'o s'e, sektáha nak apkeláneykha wesse' —axta aptáhak apchátegmowágko.

⁷Aptáhak axta apcháneya David se'e: —Nágkatneykha aqsa apwáxok, ataqmelchesek sa' ko'o exchep, ekxeyenweykekxoho ewáxok ma'a Jonatán, apyáp axta exchep. Wának sa' kólmeyásekxak makham ma'a ekyókxoho xapop apagkok axta m'a apyáta' Saúl, etwok sa' chá'a apto m'a sektamakxa nak chá'a sekto.

⁸Apháxahánteyk axta Mefi-bóset aptáha s'e: —¿Yaqsa ektáha aptáha nak sélana xa ektáha nak wesse', sektáha nak apkeláneykha? ¡Máxa semheg ápak ko'o!

⁹Keñe axta apwóneyncha'a wesse' apwányam ma'a Sibá, nanók apkeláneykha axta m'a Saúl, aptáhak axta apcháneya: —Élmeyásekxeyk ko'o ekyókxoho aqsok apagkok axta wesse' apagkok ma'a aptáwen, keñe han apagkok axta m'a aphawóxama.

¹⁰Tén sa' xép yetlo apketchek tén han apkeláneykha, kólpeynchegkesek xapop kólchakkasek ma'a, tén sa' kóltaqmelchessesek han ma'a ekyexna kélneyxchesso nak ektekkesso xapop, yaqwayam kaxek aptéyak ma'a wesse' apagkok apnámakkok, sa' eyke etwok chá'a apto Mefi-bóset ma'a sektamakxa nak chá'a sekto, cham'a aptáwen neptámen axta. Keñe m'a Sibá apweteya axta quince apketchek, keñe veinte m'a apkelásenneykha naqsa,

¹¹aptáha apchátegmowágko wesse' apwányam: —Alának sa' ko'o ekyókxoho m'a apkeltamhókxa nak alána', wesse'. Keñe axta Mefi-bóset aptama chá'a apto m'a aptamakxa axta apto David, aptémól'a chá'a etwohok apto xamo' apketche wesse' apwányam.

¹²Yetneyk axta han xama apketche ketchetsék ma'a apwesey axta Micaías, keñe m'a ekyókxoho ekheykha axta chá'a Sibá apxagkok, apkeláneykha axta aptemék ma'a Mefi-bóset.

¹³Jerusalén axta eyke aphak ma'a Mefi-bóset, élyelqamáxche axta apyay'ák, hakte axta aptamakxa chá'a apto m'a aptamakxa axta chá'a apto wesse' apwányam.