Read Lengua Sur 1 Reyes 13 Bible Online

1 Reyes 13 - Lengua Sur bible

1 Reyes 13

¹Neyseksa apwatno axta Jeroboam aqsok ekmátsa ekpaqneyam éten agkok ma'a ekwatnamáxchexa nak aqsok, apwokmo Betel xama Dios appeywa aplegasso apkeñama Judá, Wesse' egegkok axta apcháphasso.

²Apyennaqtésawók axta appeywa appaqhetchesa m'a ekwatnamáxchexa nak aqsok, hakte Wesse' egegkok axta apkeltémo etnehek. Aptáhak axta: “Ekwatnamáxchexa aqsok: Aptáhak apxéna exche' Wesse' egegkok se'e: ‘Etyamok sa' xama sakcha'a apkeñama David axta aptawán'ák neptámen, Josías sa' etnehek apwesey, elnápok sa' enegkenek xeye' néten ma'a apkelmaxnéssesso nak chá'a énxet'ák agkok ma'a aqsok kéláyókxa', cham'a apkelwatnama nak chá'a néten xeye' m'a aqsok ekmátsa nak ekpaqneyam éten agkok; elwatnek sa' han kélexchakkok ma'a néten nak xeye'.’”

³Yetlókok axta han apkelane aqsok sempelakkasso nak agwetak ma'a Dios appeywa aplegasso. Aptáhak axta: “Keso aqsok sempelakkasso nak agweta' apxeyenma nak ma'a Wesse' egegkok: Nekha'a étkók sa' katnekxak ma'a ekwatnamáxchexa nak aqsok, kaxpaqnek sa' ma'a táhap ekhéyak nak néten.”

⁴Xama axta apleg'a wesse' apwányam Jeroboam ektáhakxa apxeyenma m'a Dios appeywa aplegasso yaqwánxa kólteméssesek ma'a ekwatnamáxchexa aqsok nak Betel, apya'ássek axta apmek ekpayhókxa m'a ekwatnamáxchexa aqsok aptáha s'e: “¡Kólma!” Yennaqkak axta eyke aqsa han apaktog apya'asso axta m'a, massék axta apkepwagko apkeltaqheyáseyncha'a.

⁵Yetlókok axta ektamheykekxa nekha'a étkók ma'a ekwatnamáxchexa aqsok, kexpaqneyk axta m'a táhap ekhéyak axta m'a néten, aptáhakxa axta appeywa apxénakxa katnehek ma'a Dios appeywa aplegasso, eñama axta apkeltémo katnehek ma'a Wesse' egegkok.

⁶Keñe axta wesse' apwányam aptáha apcháneya m'a Dios appeywa aplegasso: —Hélmaxnésses ko'o Dios Wesse' apagkok, yaqwayam kataqmelekxak se'e ahaktog nak. Apkelmaxnakkek axta Wesse' egegkok ma'a Dios appeywa aplegasso, keñe ektaqmelákxo makham apaktog ma'a wesse' apwányam, ekwamekxo makham ma'a ektémakxa axta chá'a.

⁷Keñe axta wesse' apwányam aptáha apcháneya m'a Dios appeywa aplegasso: —Hétlakxa sa' exagkok, etwok sa' apto, agkések sa' han aqsok sekmésso naqsa.

⁸Apchátegmowágkek axta Dios appeywa aplegasso m'a wesse' apwányam: —Meytlakxeyk ko'o exchep, matwehek han sekto, meynhek han yegmen se'e kañe' nak, megkeyxek sélmésso nekha aqsok apagkok ekhéyak nak se'e tegma apyawe apagkok;

⁹hakte cháxa apkeltémókxa ko'o atnehek ma'a Wesse' egegkok. Axta aptemék seyenagkama: ‘Ná etaw aqsa apto, ná eyen han yegmen, ná epéwho han ma'a ámay appéwomókxa axta.’

¹⁰Keñe axta Dios appeywa aplegasso apmeyeykekxo mók ámay, yaqwayam enxoho mepéwók ma'a ámay appéwomókxa axta apmaheykegko m'a Betel.

¹¹Aphegkek axta han xama Dios appeywa aplegasso apwányamók ma'a Betel, apkelye'eykekxo axta apketchek apkeltennáseykencha'a ekyókxoho aqsok apkelane Betel ma'a Dios appeywa aplegasso apkeñama axta Judá; apkeltennáseyncha'a han apyáp ektáhakxa aqsok apxeyenma m'a wesse' apwányam.

¹²Keñe axta apchátegmowágko m'a apyáp: —¿Háxko exchek appéwókxa m'a? Keñe axta apketchek apkeltennasa m'a ámay appéwókxa axta aptaqháwo m'a Dios appeywa aplegasso apkeñama nak Judá.

¹³Keñe axta aptáha apkeláneya m'a apketchek: —Héltahanchesses sa' yámelyeheykok. Apkeltahanchessessek axta han ma'a apketchek, apchánteyk axta m'a Dios appeywa aplegasso,

¹⁴tén axta apxega apkemhágko m'a Dios appeywa aplegasso apkeñama nak Judá. Apwetágwokmek axta apha kóneg xama yámet encina, tén axta aptáha apkelmaxneyáncha'a: —¿Xeyepya Dios appeywa aplegasso apkeñama nak Judá? —Ko'o —axta aptáhak apchátegmowágko.

¹⁵—Ólmeyekxak exagkok, etwok sa' apto xamo' ko'o —axta aptáhak Dios appeywa aplegasso apwányamók axta.

¹⁶Keñe axta Dios appeywa aplegasso apkeñama nak Judá aptáha apchátegmowágko: —Mowanchek eytlakxa', mowanchek han ataxnegwók ma'a apxagkok, mowanchek han atwok sekto, tén han eynek yegmen xamo' xeyep se'e yókxexma nak;

¹⁷hakte aptemék ko'o seyenagkama Wesse' egegkok se'e: ‘Ná etaw aqsa apto s'e, ná eyen han yegmen, ná epéwho han etaqhohok ma'a ámay appéwókxa axta.’

¹⁸Keñe axta m'a énxet apwányam aptáha apcháneya s'e: —Ko'o han sekteme Dios appeywa seklegasso, aptéma nak xép, Dios apchásenneykha apkeñama nak Wesse' egegkok han apkeltamhók ko'o exchep eyntemekxak ma'a exagkok, tén han wagkok apto, tén han ma'a yegmen. Apkelyexancháseyha axta eykhe m'a énxet apwányam nak,

¹⁹apyetlákxeyk axta eyke aqsa m'a Dios appeywa aplegasso apkeñama nak Judá, aptókek axta apto m'a apxagkok nak, apyenchek axta han yegmen.

²⁰Neyseksa apheykha axta m'a nekha mésa, appaqhetchesa Wesse' egegkok ma'a Dios appeywa aplegasso apwányamo nak, apyentameykekxa axta m'a Dios appeywa aplegasso apkeñama nak Judá,

²¹apyennaqtéssek axta han appeywa aptáha apcháneya m'a énxet apwányam nak: —Apxénchek xép Wesse' egegkok melyahákxo m'a appeywa apmésso axta,

²²hakte aptaqhegwokmek aptáswa'akto apto tén han apyena yegmen, meltamhókxa axta Wesse' egegkok etwok apto, megkeytnakxeyk sa' xép aphápak ma'a takhaxpop apagkok nak apyapmeyk nano'.

²³Xama axta apsawha apto tén han apyá m'a Dios appeywa aplegasso apkeñama nak Judá, keñe apkeltahanchessásekxo yámelyeheykok apchánte m'a Dios appeywa aplegasso apwányamók axta,

²⁴keñe axta aptaqháwo m'a Dios appeywa aplegasso apkeñama nak Judá. Tekkek axta eyke han xama méwa apmonye' m'a ámay, chaqhak axta han, yetneyk axta aqsa han aphápak ma'a ámay. Yagqákxeyk axta aqsa han yámelyeheykok ma'a ekyetnakxa aphápak, tén han méwa.

²⁵Chaqhawók axta han apkelchexyámxa énxet'ák ma'a ámay nak, keñe apkelwetágwa'akto aphápak ekyetna m'a ámay nak, keñe han ekyetnawo makham xamók ma'a méwa. Xama axta apkelwákxo m'a tegma apwányam aphakxa axta m'a Dios appeywa aplegasso apwányamo, apkeltennáseyha axta ektáhakxa apkelwete.

²⁶Xama axta apleg'a m'a Dios appeywa aplegasso apwányamo, ektáha axta aptaqhesseykekxa m'a pók, keñe aptáha s'e: “Cháxa Dios appeywa aplegasso melyaheykekxa axta apkeltémókxa etnehek ma'a Wesse' egegkok. La'a apmésa nak Wesse' egegkok yaqwayam kaqhek méwa, keñe eyaqha, tén han katnéssesek nápakha'a apketkók, ekhawo aptáhakxa axta apcháneya m'a Wesse' egegkok.”

²⁷Yetlókok axta apkeltémo eltahanchessesek yámelyeheykok ma'a apketchek, apkeltahanchessessek axta han.

²⁸Tén axta apxega m'a Dios appeywa aplegasso apwányamo, apwetágwokmek axta han kélhápak ekyetna ámay, tén han ekyagqa yámelyeheykok ekpayhókxa tén han méwa. Axta han katáwak kélhápak ma'a méwa, axta han kaqhak ma'a yámelyeheykok.

²⁹Keñe axta Dios appeywa aplegasso apwányamók apmákxo aphápak ma'a Dios appeywa aplegasso apkeñama axta Judá, appátegkessek axta yámelyeheykok keñe aptaqháwo apsákxo m'a tegma apwányam apagkok, yaqwayam enxoho elekxagwaha elano' tén han yátawanyek.

³⁰Apchátawanyeyk axta m'a takhaxpop apagkok apagko' axta, apkelekxagweyha axta apkelanawo, keñe aptáha s'e: “¡Apyósek eyke eykhel'a eyáxeg!”

³¹Keñe axta aptáha apkeláneya apketchek natámen apchátawanye s'e: —Étsekkek sa' agkok ko'óxa, hélátawanye sa' se'e takhaxpop seyátawanyakxa nak se'e Dios énxet apagkok nak. Kólpekken sa' ehápak nápakha nak xa,

³²hakte naqsók agko' sa' katnehek ma'a aptáhakxa axta apxeyenma, apkeltémo axta etnehek Wesse' egegkok, apxeyenma m'a ekwatnamáxchexa aqsok Betel, tén han ma'a ekyókxoho kélpeykessamókxa nak chá'a aqsok kéláyókxa, cham'a egkexe ekheykegko nak ma'a tegma apkelyawe Samaria.

³³Axta han eyenseykmok aptémakxa ekmaso Jeroboam, apweteyak axta eykhe m'a ektémakxa axta, aptemessáseykegkokxeyk axta aqsa makham apkelmaxnéssesso aqsok kéláyókxa m'a énxet'ák agkok, nepyeseksa m'a énxet'ák, yaqwayam eltemeykha chá'a m'a kélpeykessamókxa nak kéleykmássesso, cham'a egkexe nak chá'a. Etnésseshok axta chá'a apkelmaxnéssesso kéleykmássesso énxet'ák agkok Jeroboam ma'a apkelmopmenyého axta chá'a, cham'a kélpeykessamókxa nak.

³⁴Axta keñamak apkeláneykegko melya'assáxma m'a Jeroboam axta aptawán'ák neptámen, keñe han kélmassésseykmo apyókxoho.