Read Lengua Sur 1 Reyes 16 Bible Online

1 Reyes 16 - Lengua Sur bible

1 Reyes 16

¹Appaqhetchessegkek axta Wesse' egegkok ma'a Jehú, Hananí axta apketche, yaqwayam enxoho etnehek yának Baasá s'e:

²“Énxet mékoho axta exchep, keñe sekteméssessama apkemha apmonye' apagkok ma'a énxet'ák ahagkok Israel. Hawók eyke exchep aptémakxa axta m'a Jeroboam, apkelánéseykegkek melya'assáxma m'a énxet'ák ahagkok Israel. Elókassegkek han ko'o m'a aptémakxa nak xép mey'assáxma.

³Amasséssók sa' ko'o exchep Baasá yetlo apnámakkok; sa' atnéssesek ma'a sekteméssessamakxa axta Jeroboam apnámakkok, Nabat axta apketche.

⁴Semheg sa' chá'a katwok aphápak ma'a pók apketsapma nak chá'a tegma apwányam; keñe sa' ma'a apketsapma nak chá'a yókxexma, máma sa' chá'a etwok aphápak.”

⁵Ektémakxa axta apweynchámeykha Baasá, tén han ektémakxa aqsok apkelane, keñe han megyesseykekxa axta chá'a apkelane aqsok, hágkek eknaqtáxésamaxche m'a weykcha'áhak apagkok axta m'a kelwesse'e apkelwányam nak Israel.

⁶Xama axta apketsapma Baasá, kélátawanyegwákxeyk axta m'a Tirsá. Tén axta apyaqmagkasa apteme wesse' apwányam ma'a apketche Elá.

⁷Apxeyenmeyk axta Wesse' egegkok yaqweykenxa kólteméssesek ma'a Baasá, tén han apnámakkok, apchásenneykekxo axta m'a aplegasso appeywa Jehú, Hananí axta apketche, hakte asagkek axta ektémakxa aqsok apkelane nápaqto'. Aplókassegkek axta Wesse' egegkok ma'a Baasá, hakte hawók axta ektémakxa aqsok apkelane m'a Jeroboam, tén han apnámakkok, cham'a apmassésseykmo axta.

⁸Apkeynamók axta apteme wesse' apwányam Elá m'a Israel, cham'a Tirsá, cham'a Elá, Baasá axta apketche, ekweykmo axta veintiséis apyeyam apteme wesse' apwányam Asá m'a Judá, apqánet apyeyam axta han apteme wesse' apwányam;

⁹keñe axta m'a Zimrí, apteme axta apkemha apmonye' sẽlpextétamo apkeltaqmelchesso nekha m'a yátnáxeg apkelyenyawasso kélanchesso nak kempakhakma, Apyexákpók axta apkelánekxo yaqwánxa etnéssesek. Keñe axta xama ekhem neyseksa apha Elá m'a Arsá apxagkok, cham'a Tirsá, apteme axta apkeláneseykha apxagkok, apyenchek axta ekwokmoho eyaqha.

¹⁰Pelakkassek axta han apwokmo Zimrí keñe apchaqha, apyaqmagkassek axta han apteme wesse' apwányam. Temegkek axta xa, cham'a ekweykmo axta veintisiete apyeyam apteme wesse' apwányam Asá m'a Judá.

¹¹Axta han kanéwomok apteme wesse' apwányam ma'a Zimrí, keñe apkelnapma apyókxoho m'a Baasá apnámakkok, meyke apcháyam xama enxoho apkenna', apnámakkok essenhan apkelxegexma'a, yaqwayam enxoho exnésseshok mók.

¹²Apsawhomók axta Zimrí apkelnapma apyókxoho m'a Baasá axta apnámakkok, aptémakxa axta apxeyenma Wesse' egegkok yaqweykenxa kólteméssesek ma'a Baasá, apchásenneykekxo axta m'a aplegasso appeywa Jehú,

¹³eñama m'a ekyókxoho mey'assáxma apkelane axta m'a Baasá tén han apketche Elá, apkelánéseykegko axta melya'assáxma m'a israelitas, aplókassama axta Wesse' egegkok, Dios nak Israel, apkelpeykessamo m'a kéleykmássesso.

¹⁴Ektémakxa axta apweynchámeykha Elá tén han ekyókxoho ektémakxa aqsok apkelane, hágkek eknaqtáxésamaxche m'a weykcha'áhak apagkok axta m'a kelwesse'e apkelwányam nak Israel.

¹⁵Apkeynamók axta apteme wesse' apwányam Zimrí m'a Tirsá, ekweykmo axta veintisiete apyeyam apteme wesse' apwányam Asá m'a Judá, apwakhegweykmo axta sẽlpextétamo israelitas apmáheyo ektamagkok filisteos tegma apwányam apagkok ma'a Guibetón. Siete ekhem axta eyke aqsa apteme wesse' apwányam,

¹⁶hakte chaqhawók axta han apkelleg'akxa amya'a sẽlpextétamo apkelpakxenwayam axta m'a, apkeláneykekxo aptáhakxa Zimrí yaqweykenxa etnéssesek ma'a wesse' apwányam, tén han apchaqhama, tén axta m'a apyókxoho sẽlpextétamo apteméssesa wesse' apwányam Israel ma'a Omrí, apteme axta apkemha apmonye' sẽlpextétamo.

¹⁷Keñe axta Omrí tén han apyókxoho sẽlpextétamo nak israelitas, apkelwátesagko apketámeyak ma'a Guibetón, keñe apketámegkokxo aqsa m'a Tirsá.

¹⁸Xama axta apwet'a Zimrí apmákpo m'a tegma apwányam nak, aptaxnegwákxeyk axta kañók wesse' apwányam apxagkok, cham'a apxagkok axta, apwatneyk axta han tegma apyawe neyseksa apha kañe', cháxa ektáhakxa axta apketsapa.

¹⁹Cháxa ektémakxa axta eñama mey'assáxma apkelane, tén han ekmaso aptémakxa nápaqtók Wesse' egegkok, hakte hawók axta apkelane mey'assáxma m'a Jeroboam, apkelánéseykegko axta melya'assáxma m'a israelitas.

²⁰Ektémakxa axta apweynchámeykha Zimrí, tén han apkeláneykekxa aptáhakxa yaqweykenxa etnéssesek ma'a wesse' apwányam Elá, hágkek eknaqtáxésamaxche m'a weykcha'áhak apagkok axta m'a kelwesse'e apkelwányam nak Israel.

²¹Apkexpáncháseykpek axta énxet'ák Israel. Nápakha axta appasmeykxak ma'a Tibní, Guinat axta apketche, yaqwayam etnehek wesse' apwányam, keñe axta han nápakha m'a Omrí.

²²Apmelyeyha'ak axta han ma'a Omrí axta apkelxegexma'a, axta exnawok ma'a Tibní axta apkelxegexma'a, Guinat axta apketche. Apketsepmeyk axta m'a Tibní, keñe axta aptéma wesse' apwányam ma'a Omrí.

²³Apkeynamók axta apteme wesse' apwányam Omrí, ekweykmo axta treinta y uno apyeyam apteme wesse' apwányam Asá m'a Judá, doce apyeyam axta han apteme wesse' apwányam, seis apyeyam axta apteme wesse' apwányam ma'a Tirsá.

²⁴Apmeykekxeyk axta han ma'a egkexe nak Samaria apagkok axta m'a Sémer, sesenta y seis kilos axta han ekyánmaga m'a sawo ekmope ekmomnáwa, apkeláneyak axta han tegma apwányam ekyennaqte kélhaxtegkesso nepyáwa', apteméssessama axta apwesey Samaria, hakte Sémer axta apwesey apagkok apmonye' m'a egkexe nak.

²⁵Asagkek axta eyke aptémakxa Omrí nápaqtók Wesse' egegkok, asagkók agko' axta, axta kaxnémok ma'a apkeltémakxa axta m'a kelwesse'e apkelwányam apmonye'e axta,

²⁶hawók axta ektémakxa apkelane mey'assáxma m'a Jeroboam, Nabat axta apketche, apkelánéseykegko axta han melya'assáxma m'a israelitas, aplókassama axta Wesse' egegkok, Dios nak Israel, apkelpeykessamo m'a aqsok kéleykmássesso.

²⁷Ektémakxa axta apweynchámeykha Omrí tén han ekyókxoho ektémakxa aqsok apkelane, keñe han ma'a méxnéseykekxa chá'a apkelane, hágkek eknaqtáxésamaxche m'a weykcha'áhak apagkok axta m'a kelwesse'e apkelwányam nak Israel.

²⁸Samaria axta han kélátawanyegweykekxak apketsapma. Keñe axta apyaqmagkasa apteme wesse' apwányam ma'a apketche Ahab.

²⁹Apkeynamók axta apteme wesse' apwányam Ahab ma'a Israel, Omrí axta apketche, ekweykmo axta treinta y ocho apyeyam apteme wesse' apwányam Asá m'a Judá. Veintidós apyeyam axta han apteme wesse' apwányam ma'a Israel, cham'a tegma apwányam Samaria.

³⁰Asagkek axta aptémakxa nápaqtók Wesse' egegkok, asagkók agko' axta, axta kaxnémok ma'a apkeltémakxa axta m'a kelwesse'e apkelwányam apmonye'e axta,

³¹axta yeyék apkeláneya m'a ektémakxa axta apkeláneya mey'assáxma m'a Jeroboam, Nabat axta apketche. Weykmok axta han apma aptéma aptáwa' m'a Jezabel, Et-baal axta apketche, wesse' apwányam axta m'a Sidón, tén axta apkelpeykessamo m'a Baal,

³²apkelánéssegkek axta han ekwatnamáxchexa aqsok Baal ma'a Samaria, tén han xama tegma kélpeykessamókxa chá'a.

³³Apkeláneyak axta han xama kéleykmássesso Aserá, eklókassama axta m'a Wesse' egegkok, Dios nak Israel, axta kaxnémok chá'a aplókasso m'a apyókxoho kelwesse'e apkelwányam apmonye'e axta m'a Israel.

³⁴Apxátekhássekxeyk axta makham tegma apwányam Jericó m'a Hiel, apkeñama nak Betel, aphamakxa axta makham Ahab. Apketsepmeyk axta apketche átnaha apketkok apwesey axta Abiram apnegkenchásegko axta apowhók ma'a tegma, apketsepmeyk axta han apketche apsexyo, apwesey axta Segub, apnegkencháseykegko axta atña'ák, ekhawo m'a ektémakxa axta apxeyenma Wesse' egegkok, apchásenneykekxo axta m'a Josué, Nun axta apketche.