Read Lengua Sur 1 Reyes 17 Bible Online

1 Reyes 17 - Lengua Sur bible

1 Reyes 17

¹Aptáhak axta Elías apcháneya m'a Ahab, cham'a Elías, apteme axta Dios appeywa aplegasso apkeñama axta Tisbé, yókxexma nak Galaad: “¡Naqsók ko'o ektemessásak yetlo sekxeyenma apwesey Wesse' egegkok, Dios nak Israel, sekyetleykencha'a nak ko'o, megkammakyek sa' se'e apyeyam nak, tén han egmonye' nak, megkatyemek sa' nahan yálye, ekwokmoho séltamho sa' ko'o makham!”

²Tén axta aptáha apcháneya Wesse' egegkok ma'a Elías:

³“Emhók sa' ekpayho nak ekteyapmakxa ekhem, éxánegwom sa' ma'a alwáta' nak Querit, ekyetnama nak ma'a neyp Jordán, ekpayho nak ekteyapmakxa ekhem.

⁴Sa' ének chá'a yegmen ma'a ekyetno nak alwáta', éltennássek eyke ko'o kágqag yaqwayam kalsakxések chá'a apto.”

⁵Apkelyahákxók axta Elías ma'a apkeltamhókxa axta etnehek Wesse' egegkok, apxegkek axta aphakmo m'a neyáwa nak alwáta' Querit, ekpayho nak ekteyapmakxa ekhem ma'a teyp Jordán.

⁶Kasakxések axta chá'a kágqag pán, tén han ápetek, axto'o tén taxnám. Tén axta ének chá'a yegmen ma'a alwáta' nak.

⁷Yáma wenaqtémok axta han, keñe ekyamáya m'a alwáta', hakte axta kammayék xa apchókxa nak.

⁸Keñe axta Wesse' egegkok aptáha apcháneya Elías se'e:

⁹“Emhók sa' ma'a tegma apwányam nak Sarepta, apyetnama nak Sidón, exnem sa' ma'a. Éltennássek eyke ko'o kelán'a tampe' ekha nak ma'a séltamho chá'a kagkok apto.”

¹⁰Apxegkek axta Elías apmahágko m'a Sarepta. Apwomók axta aqsa m'a nentaxnamakxa nak tegma apwányam, apwet'a xama kelán'a tampe' ekyekhámencha'a yántapák. Apwóneyha axta, keñe aptáha apcháneya s'e: —Heyekwés hana yegmen yaqwayam eynek ko'o.

¹¹Ketók ektaqhémókxa axta makham peya kasakxések, keñe aptáha makham apwónéncha'a Elías: —Hesantagkasho sa' han pán.

¹²Chátegmowágkek axta m'a kelán'a: —Naqsók ko'o sektáha seyáneya exchep yetlo sekxeyenma apwesey Dios Wesse' apagkok, méko ko'o m'a pán sekmakhetchesso nak. Wánxa aqsa apyetna apqántawók hótáhap ma'a sekxata nak sokpayhe, tén han ketsék pexmok égmenek ma'a sekyeta nak, yántapák eyke ekyeykhámeyha ko'o kaxwo', yaqwayam wahanchessekxak ma'a hatte, tén han ko'óxa. Antawagkok sa' negko'o, keñe sa' natámen óletsapok meyk sẽlnapma.

¹³Apchátegmowágkek axta Elías: —Nágkatneykha aqsa awáxok. Kahanwakxa sa' ma'a ekxéna nak. Hélanés sa' eyke ko'o sekxók xama torta apketchetseyk ma'a hótáhap apyetna nak xeye', keñe sa' hesantagkasek, tén sa' kalánekxak makham pók yaqwayam katwok, xeye' tén han étche.

¹⁴Hakte apxénchek axta Wesse' egegkok, Dios nak Israel, mesawhakpehek chá'a hótáhap ma'a sokpayhe nak, tén han pexmok égmenek ma'a kélyeta nak, ekwokmoho apkeltamho makham kammék Wesse' egegkok keso náxop.

¹⁵Taqháwok axta kelán'a tampe' élánegwákxo m'a apkeltamho axta kalának ma'a Elías. Cháxa kelán'a nak yetlo étche tén han Elías, xámok axta ektéyak yaqwayam kalmaha ekxámokma agko' ekhem.

¹⁶Axta esawhomákpok hótáhap ma'a sokpayhe kélxata nak, keñe han pexmok égmenek kélyeta nak, aptáhakxa axta m'a Wesse' egegkok, apchásenneykekxo axta m'a Elías.

¹⁷Keñe axta natámen apháxamákpo étche m'a kelán'a tampe' nak, yentexók agko' axta han apháxamap, apketsepmeyk axta han.

¹⁸Keñe axta kelán'a tampe' ektáha eyáneya m'a Elías: —¡Yaqsa ektáha setnéssesa nak xeyep xa ektáha nak, xép apteme nak Dios énxet apagkok! ¡Apxegeykmek enxeykel'a exchep yaqwayam hey'assásegwakxohok may'assáxma tén han yának yetsapok ma'a hatte!

¹⁹Apchátegmowágkek axta Elías: —Kay'ásenta sa' étche s'e. Apcheynchek axta Elías ekpekkenágkaxa axta awáxok étche m'a kelán'a tampe', apya'ásekxeyk axta m'a apteyenmakxa axta néten, appekkenwákxeyk axta m'a néten apyetnamakxa.

²⁰Keñe axta aptáha apyennaqtésawo appeywa apwónéncha'a Wesse' egegkok: “Dios Wesse' ahagkok, ¿peya han éntaxnéssesek awáxok se'e kelán'a tampe' sekteyenwaya nak ko'o axagkok, apmáheyo yaqhássesek ma'a étche?”

²¹Yetlókok axta han apteme ántánxo aptaháneykekxa chá'a m'a sakcha'a, keñe apyennaqtésawo appeywa aptáha apcháneya Wesse' egegkok: “Dios Wesse' ahagkok, ¡éltamhók eykhe ko'o exátekhássók makham se'e sakcha'a nak!”

²²Aphaxnawók axta han Wesse' egegkok apkelmaxnagko m'a Elías, apxátekhássekmek axta makham ma'a sakcha'a.

²³Yetlókok axta apmeykekxa makham Elías ma'a sakcha'a apya'ásento m'a apwáxok tegma kóneg nak, keñe apmeyásekxo m'a egken, axta aptáhak apcháneya s'e: —¡Keso étche s'e, apxátekhágwokme'!

²⁴Chátegmowágkek axta m'a kelán'a: —Ekya'ásegwokmek kaxwók xeyep apteme Dios énxet apagkok, tén han ekteme naqso' chá'a m'a appeywa eñama nak Wesse' egegkok apmésso.