Read Lengua Sur 1 Reyes 4 Bible Online

1 Reyes 4 - Lengua Sur bible

1 Reyes 4

¹Aptemegkek axta wesse' apwányam Salomón ma'a ekyókxoho Israel.

²Keso apkeláneykha axta s'e: Azarías, apketche axta m'a apkelmaxnéssesso Dios énxet'ák apagkok Sadoc;

³Elihóref tén han Ahías, Sisá apketchek, apteme axta apnaqtáxéseyak chá'a weykcha'áhak; Josafat, Ahilud axta apketche, apteme axta chá'a appasmeykha aptamheykha wesse' apwányam;

⁴Benaías, Joiadá axta apketche, apteme axta apkemha apmonye' sẽlpextétamo; Sadoc tén han Abiatar, aptamhéyak axta apkelmaxnéssesso Dios énxet'ák apagkok;

⁵Azarías, Natán axta apketche, apteme axta apkemha apmonye' apagkok apkeltaqmelchesso nak chá'a apkelókxa; Zabud, Natán axta apketche, apteme axta apkelmaxnéssesso Dios énxet'ák apagkok, apteme axta han appaqhetcháseykha chá'a m'a wesse' apwányam;

⁶Ahisar, apteme axta apkeláneykha m'a tegma apyawe; Adoniram, Abdá axta apketche, apteme axta apkeláneykha chá'a m'a apmésso apkeltamheykha énxet'ák.

⁷Doce axta apyókxoho apkeláneykha Salomón apkelámha apmonye'e apagkok axta chá'a m'a apkeltaqmelchesso nak apkelókxa ekyókxoho m'a kañe' nak Israel, apkelánémakpo axta chá'a elmések ekyókxoho aqsok wesse' apwányam, tén han ma'a apnámakkok. Xama axta han chá'a egkések ekyókxoho aqsok ekweykmoho xama pelten chá'a xama apyeyam.

⁸Keso apkelwesey axta doce apkelámha apmonye'e s'e: Ben-hur axta m'a ekpayho nak egkexe Efraín;

⁹Keñe axta Ben-déquer ma'a ekpayho nak Macás, Saalbim, Bet-semes, Elón tén han ma'a Bet-hanán;

¹⁰keñe axta Ben-hésed ma'a ekpayho nak Arubot, tén han Socó tén han ma'a ekyókxoho apchókxa nak Héfer;

¹¹keñe axta Ben-abinadab ma'a ekyókxoho nak yókxexma Dor; Tafat axta ekwesey aptáwa', Salomón axta apketche kelwána;

¹²keñe axta Baaná, Ahilud apketche m'a ekpayho nak Taanac, Meguido tén han ma'a ekyókxoho nak Bet-seán, ekyetnama nak ma'a ekpayho nak Saretán, ekpayho nak nepyeyam ma'a Jezreel, eyeynamo m'a Bet-seán ekweykekxoho m'a Abel-meholá, teyp nak ma'a Jocmeam;

¹³keñe axta Ben-guéber ma'a ekpayho nak Ramot Galaad, apxawáya axta apkeláneykha m'a tegma apketkok nak Galaad, ektáha axta apagkok ma'a Jaír, Manasés axta apketche, tén axta han ma'a yókxexma Argob, ekyetnama nak ma'a Basán, apheykegkaxa axta sesenta tegma apkelyawe yetlo kélhaxtegkáseyak nepyáwa, tén han kélápeykekxexa chá'a atña'ák sawo ekyexwase;

¹⁴keñe axta Ahinadab, Idó axta apketche m'a ekpayho nak Mahanaim;

¹⁵keñe axta Ahimaas ma'a ekpayho nak Neftalí, apmoma axta aptéma aptáwa' m'a Basemat, Salomón axta apketche kelwána;

¹⁶keñe axta Baaná, Husai axta apketche m'a ekpayho nak Aser, tén han Alot;

¹⁷keñe axta Josafat, Parúah axta apketche m'a ekpayho nak Isacar;

¹⁸keñe axta Simí, Elá axta apketche m'a ekpayho nak Benjamín;

¹⁹keñe axta Guéber, Urí axta apketche m'a ekpayho nak yókxexma Gad, Sihón axta apchókxa, wesse' apwányam apagkok axta m'a amorreos, tén han Og, wesse' apwányam axta m'a Basán. Yetneyk axta han xama apkemha apmonye' aptamheykha ekyókxoho apchókxa.

²⁰Apxámok apagko' axta m'a énxet'ák Judá tén han Israel, aphawók axta m'a xapop ánek ekhéyak nak neyáwa wátsam ekwányam. Yetnegkek axta han ekxámokma nento, tén han negyá, yetnegkek axta m'a ekpayheykekxa egwáxok.

²¹Salomón axta apkeláneykha ekyókxoho apkelókxa, eyeynmo m'a wátsam Éufrates, ekweykekxoho m'a filisteos apchókxa', tén han ma'a néxa xapop nak Egipto, apyánmagkassama axta chá'a selyaqye eknegkenamaxche', apkeláneykha axta han chá'a aptemék Salomón, neyseksa apha makham.

²²Seis mil seiscientos kilos hótáhap apaktek axta chá'a kólsantagkasek ekyókxoho ekhem ma'a Salomón, keñe axta trece mil doscientos kilos ma'a hótáhap,

²³diez weyke kelennay'awók kélnaqmelasso nak, veinte weyke kelennay'awók kéléyak nak chá'a pa'at, cien nepkések, keñe meyke kélyetsete ekwánxa m'a xenaq, tén han yátapopyet, yánxenaq tén han ma'a náta eknaqmele agko' nak,

²⁴hakte apsawheykekxók axta apkeláneykha Salomón ekyókxoho apchókxa ekpayho nak taxnegwánxa ekhem ma'a Éufrates, eyeynmo m'a Tífsah ekweykekxoho m'a Gaza, tén han nepyeseksa m'a apyókxoho apkelwesse'e apkelwányam nak apchókxa', meyke ektáhakxa apheykha axta han apteméssessók ekyókxoho apheykegkaxa ekhéyak nak nepyáwa'.

²⁵Méko axta ektémakxa apheykha énxet'ák Judá, tén han Israel, eyeynmo m'a Dan ekweykekxoho m'a Beerseba, apyennaqtamakxa axta m'a Salomón, tásek axta chá'a apheykha xama m'a kóneg anmen yámet apkeneykekxa, tén han higo yámet.

²⁶Yetneyk axta han Salomón cuatro mil apkelyáqkassamakxa yátnáxeg, yaqwayam elyáqkasek chá'a m'a apnaqtehetchesso nak chá'a apkelyenyawasso, keñe axta doce mil ma'a sẽlpextétamo apkelchánte nak yátnáxeg.

²⁷Elsanták axta chá'a aqsok eyeyméxchexa m'a apkelámha apmonye'e nak chá'a nepyeseksa apkeltaqmelchesso apkelókxa, ekwákxo enxoho chá'a pelten apkelseykekxéssamakxa m'a wesse' apwányam Salomón, tén han ma'a meyk'a apagkok nak, yaqwayam enxoho megkeymaxcheyk xama aqsok.

²⁸Kólsantagkasek axta chá'a m'a apho nak hótáhap tén han pa'at yaqwayam etawagkok yátnáxeg, tén han aqsok kélnaqtósso kélpátegkesso nak chá'a aqsok.

²⁹Apméssegkek axta Dios ekyawe agko' apya'áseyak aqsok ma'a Salomón tén han apmopwána, tén han apya'áseykegkoho ekyawe agko', ekweykenxal'a xapop ánek ekhéyak nak neyáwa wátsam ekwányam,

³⁰apyeykhásseykmók axta ektémakxa apya'áseyak aqsok Salomón ma'a énxet'ák Egipto, tén han ma'a apheykha nak ekteyapmakxa ekhem.

³¹Apwanchek apagko' axta aqsok, axta exnawok xama énxet enxoho: apyeykhásseykmók axta ektémakxa apmopwána aqsok ma'a Etán, Zérah axta aptáwen neptámen, tén han ma'a Hemán, Calcol tén han Dardá, Mahol axta apketchek. Sawheykekxók axta apwesey m'a ekyókxoho apheykegkaxa nak pók énxet'ák nepyáwa'.

³²Apnaqtáxéssegkek axta tres mil amya'a segaqhássessamo nak senxeyenma, keñe mil cinco m'a amya'a ekmátsa nak.

³³Apxeyenmeyk axta ektémakxa m'a yenta'a keñe han ma'a aqsok kélcheneykekxa', eyeynmo m'a cedro yámet élaqnéyak nak Líbano, ekweykekxoho m'a pa'at élánteyapwayam nak nápakhaw'ék tegma; apxeyenmeyk axta han ma'a ektémakxa nak aqsok nawha'ák, náta, tén han ma'a aqsok élpexyaweykegkoho nak náxop kalxog, tén han ma'a kelasma.

³⁴Apkelye'eykekteyk axta apyókxoho énxet'ák apháxenweyktámho appeywa Salomón, eklegamaxchexa axta chá'a apxénamap ektémakxa apmopwána aqsok, apkeleñama m'a ekyókxoho apkelókxa nak keso náxop.