Read Lengua Sur 2 Reyes 15 Bible Online

2 Reyes 15 - Lengua Sur bible

2 Reyes 15

¹Apcheynawók axta apteme wesse' apwányam Azarías, Amasías axta apketche, wesse' apwányam nak Judá, ekweykmo axta veintisiete apyeyam apteme wesse' apwányam Jeroboam.

²Dieciséis apyeyam apagkok axta apkeynamo apteme wesse' apwányam, cincuenta y dos apyeyam axta apteme wesse' apwányam ma'a Jerusalén. Jecolías axta ekwesey egken, eñama axta Jerusalén.

³Leklamók axta apwáxok Wesse' egegkok ektémakxa aqsok apkelane m'a Azarías, ekhawo ektémakxa axta aqsok apkelane m'a Amasías, apyáp axta.

⁴Axta eyke kólmassésseykmok ma'a kélpeykessamókxa axta chá'a aqsok kéleykmássesso, apkelméssamakxa nak makham aqsok apkelnapma m'a énxet'ák, tén han apkelwatnamakxa nak makham aqsok ekmátsa nak ekpaqneyam éten agkok.

⁵Aplegassáseykegkók axta Wesse' egegkok ma'a wesse' apwányam, apchahaya negmasse ektepelchamaxche egyempehek ekwokmoho apketsapa, apxakko' apagko' axta aphak wesse' apwányam ma'a apxagkok apyawe nak, kélwátéssessegkek axta aptamheykha, keñe axta apmeykekxo aptamheykha m'a apketche Jotam, apkeláneykha axta m'a apchókxa'.

⁶Ektémakxa axta apweynchámeykha Azarías, tén han ekyókxoho aqsok apkelane, hágkek eknaqtáxésamaxche m'a weykcha'áhak apagkok axta apkelwesse'e apkelwányam nak Judá.

⁷Xama axta apketsapma Azarías, kélátawanyegwákxeyk axta xamo' ma'a apyapmeyk nano', cham'a David Tegma Apwányam apagkok. Tén axta apyaqmagkasa apteme wesse' apwányam ma'a apketche Jotam.

⁸Apcheynawók axta apteme wesse' apwányam Zacarías ma'a Israel, Jeroboam axta apketche, ekweykmo axta treinta y ocho apyeyam apteme wesse' apwányam Azarías, wesse' apwányam nak Judá, seis pelten axta han apteme wesse' apwányam ma'a Samaria.

⁹Asagkek axta eyke ektémakxa aqsok apkelane nápaqtók Wesse' egegkok, ektéma axta m'a apyapmeyk nano', hakte axta elwátesseykmok apkelane mey'assáxma, aptémakxa axta m'a Jeroboam, Nabat axta apketche, apkelánéseykegko axta melya'assáxma m'a énxet'ák Israel.

¹⁰Keñe axta Salum, Jabés axta apketche, apkelánekxo aptáhakxa yaqwayam yenmexek ma'a, apketámegkek axta han ma'a ekpayho nak Ibleam, apchaqhak axta han, keñe axta apyaqmagkassama apteme wesse' apwányam.

¹¹Ektémakxa axta apweynchámeykha m'a Zacarías, hágkek eknaqtáxésamaxche m'a weykcha'áhak apagkok axta m'a apkelwesse'e apkelwányam nak Israel.

¹²Temék axta m'a aptémakxa axta Wesse' egegkok apkeltennasso m'a Jehú, apkeltennassama axta etnahagkok chá'a apkelwesse'e Israel ma'a apketchek nak ekweykekxoho m'a apketchek aptawán'ák nak.

¹³Apkeynawók axta apteme wesse' apwányam Salum, Jabés axta apketche, ekweykmo axta treinta y nueve apyeyam apteme wesse' apwányam ma'a Ozías, wesse' apwányam nak Judá. Xama pelten apagko' axta eyke apteme wesse' apwányam ma'a Samaria,

¹⁴hakte apweykmek axta Menahem ma'a Samaria, apkeñama m'a Tirsá, Gadí axta apketche, keñe apketámeykegko m'a Salum, apchaqhak axta keñe apyaqmagkasa apteme wesse' apwányam.

¹⁵Ektémakxa axta apweynchámeykha Salum, tén han apkeláneykekxo axta yaqweykenxa etnéssesek ma'a Zacarías, hágkek eknaqtáxésamaxche m'a weykcha'áhak apagkok axta m'a apkelwesse'e apkelwányam nak Israel.

¹⁶Tén axta Menahem apmasséssekmo m'a tegma apwányam nak Tífsah, apsawhawók axta apkelma ekyókxoho aqsok ekhéyak axta m'a, tén han ma'a xapop agkok nak, eyeynamókxa m'a Tirsá, keñe axta apkelpáxqatchásegko han chá'a awokma'ák ma'a ekyókxoho kelán'ák lós'awo'. Aptemék axta xa ektáha nak, hakte axta kólmeykessásegkok átog ma'a tegma apwányam nak.

¹⁷Apcheynawók axta apteme wesse' apwányam Menahem ma'a Israel, Gadí axta apketche, ekweykmo axta treinta y nueve apyeyam apteme wesse' apwányam ma'a Azarías, wesse' apwányam nak Judá, diez apyeyam axta weykmok apteme wesse' apwányam ma'a Samaria.

¹⁸Asagkek axta eyke ektémakxa aqsok apkelane nápaqtók Wesse' egegkok, hakte axta elwátesseykmok apkelane m'a mey'assáxma, aptémakxa axta m'a Jeroboam, Nabat axta apketche, apkelánéseykegko axta melya'assáxma m'a énxet'ák Israel. Keñe apyennaqtamakxa axta makham,

¹⁹aptaxnegweykmek axta apchókxa m'a Pul, wesse' apwányam axta Asiria, keñe Menahem apkelmésa treinta y tres mil kilos sawo élmope élmomnáwa, yaqwayam enxoho epasmok énnaqtéssesek ma'a aptémakxa nak wesse' apwányam.

²⁰Apkeltamhók axta han chá'a eyánmagkasek Menahem apyókxoho apkelwesse'e nak Israel, medio kilo sawo ekmope ekmomnáwa, yaqwayam eyánmagkasek ma'a wesse' apwányam Asiria. Tén axta aptaqháwo makham apmeyákxo apchókxa m'a wesse' apwányam Asiria, massék axta apha m'a apchókxa nak.

²¹Ektémakxa axta apweynchámeykha Menahem, keñe han ekyókxoho aqsok apkelane, hágkek eknaqtáxésamaxche m'a weykcha'áhak apagkok axta m'a apkelwesse'e apkelwányam nak Israel.

²²Natámen apketsapma axta, keñe apyaqmagkasa apteme wesse' apwányam ma'a apketche Pecahías.

²³Apcheynawók axta apteme wesse' apwányam Pecahías ma'a Israel, Menahem axta apketche, ekweykmo axta cincuenta apyeyam apteme wesse' apwányam ma'a Azarías, wesse' apwányam nak Judá, apqánet apyeyam axta apteme wesse' apwányam ma'a Samaria.

²⁴Asagkek axta eyke ektémakxa aqsok apkelane nápaqtók Wesse' egegkok, hakte axta elwátesseykmok apkelane m'a mey'assáxma, aptémakxa axta m'a Jeroboam, Nabat axta apketche, apkelánéseykegko axta melya'assáxma m'a énxet'ák Israel.

²⁵Keñe axta xama sẽlpextétamo apkemha apmonye' apagkok apwesey axta Pécah, Remalías axta apketche, apkeláneykekxo yaqweykenxa etnéssesek, cincuenta énxet Galaad axta han appasmo apketámegko m'a tegma apyennaqte nak wesse' apwányam apxagkok apyawe, keñe apchaqha, tén axta apyaqmagkasa apteme wesse' apwányam.

²⁶Ektémakxa axta apweynchámeykha Pecahías, tén han ekyókxoho aqsok apkelane, hágkek eknaqtáxésamaxche m'a weykcha'áhak apagkok axta m'a apkelwesse'e apkelwányam nak Israel.

²⁷Apcheynawók axta apteme wesse' apwányam Pécah ma'a Israel, Remalías axta apketche, ekweykmo axta cincuenta y dos apyeyam apteme wesse' apwányam ma'a Azarías, wesse' apwányam nak Judá, veinte apyeyam axta han apteme wesse' apwányam ma'a Samaria.

²⁸Asagkek axta eyke ektémakxa aqsok apkelane nápaqtók Wesse' egegkok, hakte axta elwátesseykmok apkelane m'a mey'assáxma, aptémakxa axta m'a Jeroboam, Nabat axta apketche, apkelánéseykegko axta melya'assáxma m'a énxet'ák Israel.

²⁹Apwokmek axta Tiglat-piléser, wesse' apwányam nak Asiria, aptémakxa axta wesse' apwányam Israel ma'a Pécah, apkelmeyk axta m'a tegma apkelyawe nak Iión, Abel-bet-maacá, Janóah, Quedes, Hasor, Galaad, Galilea keñe han ma'a ekyókxoho yókxexma nak Neftalí. Keñe axta m'a apheykha nak kañe' apkelmoma apnaqleykekxo m'a Asiria.

³⁰Keñe axta Oseas, Elá axta apketche, apkeláneykxo aptáhakxa yaqwánxa etnéssesek ma'a Pécah, Remalías axta apketche, apketámegkek axta keñe apchaqha. Cháxa ektémakxa axta apyaqmagkassama apteme wesse' apwányam, ekweykmo axta veinte apyeyam apteme wesse' apwányam ma'a Jotam, Ozías axta apketche.

³¹Ektémakxa axta apweynchámeykha Pécah, tén han ekyókxoho aqsok apkelane, hágkek eknaqtáxésamaxche m'a weykcha'áhak apagkok axta m'a apkelwesse'e apkelwányam nak Israel.

³²Apcheynawók axta apteme wesse' apwányam Jotam ma'a Judá, Ozías axta apketche, ekweykmo axta apqánet apyeyam apteme wesse' apwányam ma'a Pécah, Remalías axta apketche.

³³Veinticinco apyeyam apagkok axta weykmok apcheynamo apteme wesse' apwányam, dieciséis apyeyam axta apteme wesse' apwányam ma'a Jerusalén. Jerusá axta ekwesey egken, Sadoc axta apketche.

³⁴Leklamók axta apwáxok Wesse' egegkok ektémakxa aqsok apkelane m'a Jotam, ektémakxa axta aqsok apkelane m'a Ozías, apyáp axta,

³⁵hakte apkeláneyak axta m'a átog ekyetno nak néten Wesse' egegkok tegma appagkanamap apagkok. Axta eyke kólmassésseykmok ma'a kélpeykessamókxa axta chá'a aqsok kéleykmássesso, apkelméssamakxa nak makham aqsok apkelnapma m'a énxet'ák, tén han apkelwatnamakxa nak makham aqsok ekmátsa nak ekpaqneyam éten agkok.

³⁶Ektémakxa axta apweynchámeykha Jotam, tén han ekyókxoho aqsok apkelane, hágkek eknaqtáxésamaxche m'a weykcha'áhak apagkok axta m'a apkelwesse'e apkelwányam nak Judá.

³⁷Cháxa apcheynamókxa axta han Wesse' egegkok apcháphasso Resín ektamagkok ma'a Judá, cham'a Resín, wesse' apwányam nak Siria, yetlo m'a Pécah, Remalías axta apketche.

³⁸Xama axta apketsapma Jotam, kélátawanyegwákxeyk axta m'a kélátawanyamakxa axta apyapmeyk nano', cham'a David Tegma Apwányam apagkok, apyáp nanók axta. Tén axta apyaqmagkassama apteme wesse' apwányam ma'a apketche Ahaz.